ବମ୍ବେ: ହାତକୁ ଦୁଇ ହାତ ହୋଇଛନ୍ତି ଲୋକପ୍ରିୟ ଟେଲି ଅଭିନେତା ବିକ୍ରମ ସିଂହ ଚୌହାନ। ପ୍ରେମିକା ସ୍ନେହା ଶୁକ୍ଳାଙ୍କୁ ବିବାହ କରିଛନ୍ତି ସେ। କରୋନା ସଂକ୍ରମଣକୁ ଦୃଷ୍ଟିରେ ରଖି ଏହି ଉତ୍ସବ ବେଶ୍ ଗୋପନୀୟ ଭାବେ କରାଯାଇଛି। ଏଥିରେ କେବଳ ପରିବାର ଏବଂ ନିକଟ ସମ୍ପର୍କୀୟ ଲୋକ ଉପସ୍ଥିତ ଥିଲେ।
ଓ୍ବେବ୍ସିରିଜ ‘ବାରିଶ୍’ ସହ ଧାରାବାହିକ ‘ଯାଦୁ ହେ ଜିନ୍ନ କା’, ‘କୁବୁଲ ହେ’, ‘ଏକ ହସିନା ଥି’, ‘ଜାନା ନା ଦିଲ ସେ ଦୂର’ରେ ଅଭିନୟ କରିଛନ୍ତି ବିକ୍ରମ। ସବୁଥିରେ ତାଙ୍କ ଅଭିନୟକୁ ବେଶ୍ ପ୍ରଶଂସା କରାଯାଇଛି। ଏବେ ସେ ଜୀବନର ନୂଆ ଅଧ୍ୟାୟ ଆରମ୍ଭ କରିଛନ୍ତି। ବିବାହର ଏକ ଫଟୋ ଇନ୍ଷ୍ଟାଗ୍ରାମରେ ଶେୟାର କରି ସେ ଲେଖିଛନ୍ତି, ଆଜିଠାରୁ ଆମେ ଆଧିକାରିକ ଭାବେ ଏକ ହୋଇଯାଇଛୁ। ମା’ବାପା ଏବଂ ଭଗବାନଙ୍କ ଆଶୀର୍ବାଦରୁ ସ୍ନେହା ଏବଂ ମୁଁ ଜୀବନର ନୂଆ ଯାତ୍ରା ଆରମ୍ଭ କରୁଛି। ଏହି ଦିନରେ ବନ୍ଧୁମାନଙ୍କ ଗହଣରେ ରହିପାରୁନାହିଁ। ହେଲେ ଭଲପାଇବା ପାଇଁ ଧନ୍ୟବାଦ ବୋଲି ସେ ଲେଖିଛନ୍ତି।