ବମ୍ବେ: ମନୋରଞ୍ଜନ ଦୁନିଆରେ ଅନେକ ସମ୍ପର୍କ ଉଦାହରଣ ପାଲଟୁଥିବା ବେଳେ କିଛି ବେଳ ଅବେଳରେ ଭାଙ୍ଗିଯାଏ। ଏଥିଲାଗି ବେଶ ସମୟ ମଧ୍ୟ ଲାଗେ ନାହିଁ। କଳାକାରଙ୍କ ଡେଟିଂ ଖବର ସାମ୍ନାକୁ ଆସିବା ପରେ ପ୍ରଶଂସକ ଚକିତ ହୋଇଥାନ୍ତି। ଏହି କ୍ରମରେ ଜଣାଶୁଣା ଟେଲିଭିଜନ ଅଭିନେତ୍ରୀ ବର୍ଖା ସେନଗୁପ୍ତା ପୁଣି ପ୍ରେମରେ ପଡ଼ିଥିବା ଚର୍ଚ୍ଚା ହେଉଛି।
୪୩ ବର୍ଷୀୟ ବର୍ଖା ପୂର୍ବରୁ ବିବାହିତା। ସ୍ବାମୀଙ୍କଠାରୁ ଅଲଗା ରହୁଥିଲେ ହେଁ ଏଯାଏ ଛାଡ଼ପତ୍ର ହୋଇନାହିଁ। ଏହାସତ୍ତ୍ୱେ ସେ ଅଭିନେତା ତଥା ନିର୍ମାତା ଆଶିଷ ଶର୍ମାଙ୍କୁ ଡେଟ୍ କରୁଥିବା କୁହାଯାଉଛି। ବର୍ଖା ନିଜର ବ୍ୟକ୍ତିଗତ ଜୀବନ ବିଷୟରେ ମୁହଁ ଖୋଲିବାକୁ ଚାହୁଁ ନ ଥିବାରୁ ସମ୍ପର୍କକୁ ନେଇ ଚୁପ୍ ରହି ଆସୁଛନ୍ତି।
ତେବେ ବର୍ଖା ଟେଲିଭିଜନ ଅଭିନେତା ଇନ୍ଦ୍ରନୀଲ ସେନଗୁପ୍ତାଙ୍କ ସ୍ତ୍ରୀ। ୨୦୦୮ରେ ଦୁହିଁଙ୍କ ବିବାହ ହୋଇଥିଲା। ବିବାହରୁ ଉଭୟଙ୍କ ଏକ ଝିଅ ରହିଛି। ଇନ୍ଦ୍ରନୀଲଙ୍କ ଅନ୍ୟ ସମ୍ପର୍କକୁ ନେଇ ବରଖାଙ୍କ ସହ ମତଭେଦ ଦେଖାଦେଇଥିଲା। ସେବେଠାରୁ ବରଖା ସ୍ବାମୀଙ୍କଠାରୁ ଅଲଗା ରହିଆସୁଛନ୍ତି। ଦୁଇ ବର୍ଷ ପୂର୍ବେ ଏହି ଦମ୍ପତ୍ତିଙ୍କ ଛାଡ଼ପତ୍ର ଖବର ସାମ୍ନାକୁ ଆସିଥିଲା। ମାତ୍ର ଏଯାଏ ତାଙ୍କର ଛାଡ଼ପତ୍ର ହୋଇନାହିଁ।