ବମ୍ବେ: ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟାକୁ ନେଇ ଚର୍ଚ୍ଚା ଥମି ନ ଥିବା ବେଳେ ଆଉ ଜଣେ ଅଭିନେତ୍ରୀ ଆତ୍ମହତ୍ୟା କରିବାକୁ ଧମକ ଦେଇଛନ୍ତି। ଟେଲିଭିଜନ ଶୋ’ ‘ଖତରୋ କେ ଖିଲାଡ଼ି’ରେ ନଜର ଆସିଥିବା ଭୋଜପୁରୀ ଅଭିନେତ୍ରୀ ରାଣୀ ଚାଟାର୍ଜୀଙ୍କ ପୋଷ୍ଟକୁ ନେଇ ଏଭଳି ଆଲୋଚନା ହେୁଛି। ରାନୀ ସୋସିଆଲ ମିଡିଆରେ ଏକ ଲମ୍ବା ପୋଷ୍ଟ ଲେଖିଛନ୍ତି। ସେ ଏବେ ଡିପ୍ରେସନ୍ରେ ଅଛନ୍ତି। ଏହି କାରଣରୁ ନିଜକୁ କ୍ଷତି ପହଞ୍ଚାଇପାରନ୍ତି ବୋଲି କହିବା ସହ ପୋଷ୍ଟ ଶେଷରେ ହାସ୍ଟ୍ୟାଗ୍ ସୁଇସାଇଡ୍ ଲେଖିଛନ୍ତି। ଏପରିକି ପୋଷ୍ଟରେ ସେ ମୁମ୍ବାଇ ପୋଲିସକୁ ଟ୍ୟାଗ୍ କରିଛନ୍ତି।
ରାଣୀଙ୍କୁ ଦୀର୍ଘ ବର୍ଷ ଧରି ଧନଞ୍ଜୟ ସିଂହ ନାମକ ବ୍ୟକ୍ତି ହଇରାଣ କରି ଆସୁଛନ୍ତି। ଫଳରେ ସେ ବିବ୍ରତ ହୋଇଯାଇଛନ୍ତି। ସେ ମୋଟା, ବୁଢ଼ୀ ବୋଲି ଧନଞ୍ଜୟ କହୁଛନ୍ତି। ଏପରିକି ଯଦି ସେ କିଛି କାମ କଲେ ତାହା ବେକାର ବୋଲି ସେ କୁହନ୍ତି ବୋଲି ରାଣୀ ପୋଷ୍ଟରେ ଲେଖିଛନ୍ତି। ପ୍ରିୟଜନ ଏହାକୁ ଧ୍ୟାନ ନଦେବା ଲାଗି କହୁଥିଲେ। ହେଲେ ଆଉ ସହି ହେଉନାହିଁ। ସେ ଚାହାନ୍ତି ରାଣୀ ମରିଯାଆନ୍ତୁ। ଏଣୁ ଜୀବନ ବିଷାଦଗ୍ରସ୍ତ ହୋଇଗଲାଣି ବୋଲି ରାଣୀ କହିବା ସହ ଯଦି ତାଙ୍କର କିଛି ହୁଏ ତେବେ ଧନଞ୍ଜୟ ଦାୟୀ ରହିବେ ବୋଲି ରାଣୀ ଲେଖିଛନ୍ତି। ସେ ସାଇବର୍ ସେଲ୍ରେ ଏ ନେଇ ଅଭିଯୋଗ ମଧ୍ୟ କରିଥିବା କହିଛନ୍ତି। ଏହି ପୋଷ୍ଟ ଭାଇରାଲ ହେଉଥିବା ବେଳେ ପ୍ରଶଂସକମାନେ ଏଭଳି ନ କରିବାକୁ ଅପିଲ କରିଛନ୍ତି।