ମୁମ୍ବାଇ,୨୯।୫: ନିଜ ଅଭିନୟରେ ଦର୍ଶକଙ୍କୁ ବାନ୍ଧି ରଖି ପାରିଥିବା ଅନୁପ୍ରିୟା ଗୋଏଙ୍କାଙ୍କୁ ଶନିବାର ୩୪ ବର୍ଷ ପୂରଣ ହୋଇଛି। ୧୯୮୭ ମେ’ ୨୯ରେ କାନପୁରଠାରେ ଜନ୍ମଗ୍ରହଣ କରିଥିଲେ। ଦିଲ୍ଲୀ ବିଶ୍ୱବିଦ୍ୟାଳୟରୁ କମର୍ସରେ ଗ୍ରାଜୁଏଟ୍ ହେବା ପରେ ଅଭିନୟକୁ କ୍ୟାରିଅର ଭାବେ ଗ୍ରହଣ କରିଥିବା ଅନୁପ୍ରିୟା ବହୁ ଓ୍ବେବସିରିଜ୍ରେ ବେଶ୍ ସଫଳ ହୋଇଛନ୍ତି। ୨୦୧୩ରେ ସାଉଥ୍ ଫିଲ୍ମ ପୋଟୁଗୁଡୁରେ ପ୍ରଥମେ ଅଭିନୟ କରିଥିଲେ। ଏହା ପରେ ବିବି ଜାସୁସ୍, ପାଠଶାଳା, ଡ୍ୟାଡ଼ି, ଟାଇଗର ଜିନ୍ଦା ହୈ, ପଦ୍ୱାବତ୍, ଓ୍ବାର ଆଦି ଫିଲ୍ମରେ ନିଜର ଅଭିନୟ ଦକ୍ଷତା ପ୍ରଦର୍ଶନ କରିସାରିଛନ୍ତି। ତେବେ ଏବେ ଏକ ଇଣ୍ଟିମେଟ୍ ସିନ୍ ନେଇ ସର୍ତ୍ତ ରଖିବା ଯୋଗୁ ସେ ବିବାଦୀୟ ହୋଇପଡ଼ିଛନ୍ତି। ପାଞ୍ଚାଳୀ ଓ୍ବେବ୍ସିରିଜ୍ରେ ଅଭିନୟ ନେଇ ପ୍ରଡକ୍ଟଶନ୍ ହାଉସ୍ ପକ୍ଷରୁ ଅନୁପ୍ରିୟାଙ୍କ ବିରୋଧରେ ଏଭଳି ଅଭିଯୋଗ ଅଣାଯାଇଛି। ଅନୁପ୍ରିୟା ଓ୍ବେବସିରିଜ୍ର ପ୍ରମୋଶନରେ ସହଯୋଗ କରୁ ନ ଥିବା ଅଭିଯୋଗ ହୋଇଛି। ଏନେଇ ଅନୁପ୍ରିୟା କହିଛନ୍ତି ଯେ, ଓ୍ବେବସିରିଜ୍ରେ ଇଣ୍ଟିମେଟ୍ ସିନ୍ ୩୦ ସେକେଣ୍ଡରୁ ଅଧିକ ହେବ ନାହିଁ ଏବଂ ଏହା ଡିମ୍ ଲାଇଟ୍ରେ ଶୁଟିଂ ହେବ ବୋଲି ସେ ସର୍ତ୍ତ ରଖିଥିଲେ। ମାତ୍ର ପ୍ରଡକ୍ଟଶନ୍ ହାଉସ୍ ପକ୍ଷରୁ ତାଙ୍କୁ ସମ୍ପୂର୍ଣ୍ଣ ବିବରଣୀ ପ୍ରଦାନ କରାଯାଇ ନ ଥିଲା। ଇଣ୍ଟିମେଟ୍ ସିନ୍ ସମୟ ସୀମା ୩ ରୁ ୪ ମିନିଟ୍ ରଖାଯାଇଥିଲା। ଏହା ଉଜ୍ଜଳ ଆଲୋକ ମଧ୍ୟରେ ଶୁଟିଂ କରାଯାଇଥିଲା। ସେହିପରି ଏହା ୪୫ ମିନିଟ୍ର ଏକ ଶର୍ଟ ଫିଲ୍ମ ବୋଲି କୁହାଯାଉଥିବା। ତେବେ ପ୍ରକୃତ ପକ୍ଷେ ଏହା ଏକ ଓ୍ବେବସିରିଜ୍ ଥିଲା। ତେଣୁ ସେ ପାଞ୍ଚାଳୀର ପ୍ରମୋଶନରେ ସହାୟତା କରିବାକୁ ମନା କରିଥିଲେ। ବିବାଦର ପ୍ରକୃତ ଘଟଣା ଜଣା ପଡ଼ିବା ପରେ ପ୍ରଶଂସକ ଅନୁପ୍ରିୟାଙ୍କ ପଦକ୍ଷେପକୁ ତାରିଫ୍ କରିବା ଆରମ୍ଭ କରିଛନ୍ତି।