ଭୁବନେଶ୍ୱର,୩୧।୧(ବ୍ୟୁରୋ):ବିଏମ୍ସି ଦକ୍ଷିଣ-ପଶ୍ଚିମ ଜୋନ୍ ଡେପୁଟି କମିଶନର ଯୋଗେଶ୍ୱର ନାୟକଙ୍କ ନାଁରେ ଆସିଛି ସଙ୍ଗିନ ଅଭିଯୋଗ। ସେ ଘରେ ପଶି ଅସଦାଚରଣ ସହ ବ୍ଲାକମେଲ୍ କରୁଥିବା ନେଇ ଜଣେ ଅଭିନେତ୍ରୀ ଶ୍ରୀଲିଙ୍ଗରାଜ ଥାନାରେ ତାଙ୍କ ନାମରେ ଏତଲା ଦେଇଛନ୍ତି। ଅଭିଯୋଗ ଆଧାରରେ ପୋଲିସ ଡେପୁଟି କମିଶନର ଯୋଗେଶ୍ୱରଙ୍କ ବିରୋଧରେ ଏକ ମାମଲା (ନଂ.୨୭/୨୩) ରୁଜୁ କରିଛି। ଅନ୍ୟପକ୍ଷରେ ଡେପୁଟି କମିଶନର ଏହାକୁ ଖଣ୍ଡନ କରିବା ସହ ଅଭିନେତ୍ରୀ ପ୍ରିୟଙ୍କା ଦାଶଙ୍କ ନାମରେ ଥାନାରେ ପାଲଟା ଅଭିଯୋଗ କରିଛନ୍ତି। ପ୍ରିୟଙ୍କା ତାଙ୍କଠାରୁ ନେଇଥିବା ଟଙ୍କା ମାଗିବାକୁ ଯାଇଥିବାବେଳେ ସେ ଜାତିଆଣ ଆକ୍ଷେପ କରିବା ସହ ଜୀବନରୁ ମାରିଦେବାକୁ ଧମକ ଦେଇଥିବା ନେଇ ଯୋଗେଶ ତାଙ୍କ ଅଭିଯୋଗପତ୍ରରେ ଉଲ୍ଲେଖ କରିଛନ୍ତି। ପୋଲିସ ପ୍ରିୟଙ୍କାଙ୍କ ନାମରେ ମାମଲା (୨୮/୨୩) ରୁଜୁ କରିଛି। ଜଣେ ଏସିପି ପାହ୍ୟାର ଅଧିକାରୀ ଏହି ଦୁଇ ମାମଲାର ତଦନ୍ତ କରୁଥିବା ଜଣାପଡିଛି।
ସୁନ୍ଦରପଦା ଅଞ୍ଚଳରେ ରହୁଥିବା ପ୍ରିୟଙ୍କାଙ୍କ କହିବାନୁଯାୟୀ, ସେ ବିଭିନ୍ନ ଆଲ୍ବମ୍ ଓ ସିରିଏଲ୍ରେ ଅଭିନୟ କରନ୍ତି। ଏଥିସହ ତାଙ୍କର ବାପୁଜୀନଗରରେ ଏକ ୟୁନିସେକ୍ସ ପାର୍ଲର ରହିଛି। ଡେପୁଟୀ କମିଶନର ଯୋଗେଶ୍ୱର ଉକ୍ତ ପାର୍ଲରକୁ ଯିବା ଆସିବା କରିବା ଭିତରେ ସେମାନଙ୍କ ମଧ୍ୟରେ ସମ୍ପର୍କ ସୃଷ୍ଟି ଥିଲା। ହେଲେ ଏହାର ସୁଯୋଗ ନେଇ ଡେପୁଟି କମିଶନର ଯୋଗେଶ୍ୱର ପ୍ରାୟ ସମୟ ତାଙ୍କ ଘରକୁ ଯିବାଆସିବା କରିବା ସହ ବିବାହ କରିବାକୁ ବାଧ୍ୟ କରନ୍ତି। ଖରାପ କାମ କରିବାକୁ କୁହନ୍ତି। ସେ ଗୋଟେ ବୁଢା ଟେ। ମୋ ବୟସ ୨୯। ତାଙ୍କୁ ମୁଁ ବାହା ହେବି କି, ଏତେ ଖରାପ ଅବସ୍ଥା ଆସିଗଲା କି ବୋଲି ପ୍ରିୟଙ୍କା ଗଣମାଧ୍ୟମ ଆଗରେ କହିଛନ୍ତି। ଏହାସହ ଯୋଗେଶ୍ୱର ତାଙ୍କ ସ୍ତ୍ରୀଙ୍କର ଗୋଟିଏ ଆଲବମ୍ ପାଇଁ ୨ ଲକ୍ଷ ଟଙ୍କା ଦେଇଥିବା ପ୍ରିୟଙ୍କା ସ୍ବୀକାର କରିଛନ୍ତି। ଅନ୍ୟପଟେ ଡେପୁଟି କମିଶନର ଯୋଗେଶ୍ୱରଙ୍କ କହିବାନୁସାରେ, ବ୍ୟବସାୟରେ କ୍ଷତି ହେବାରୁ ପ୍ରିୟଙ୍କା ତାଙ୍କଠାରୁ ୪ ଲକ୍ଷ ନେଇଥିଲେ। ସେହି ଟଙ୍କା ମାଗିବାକୁ ଯିବାରୁ ମିଛ ଅଭିଯୋଗ ଆଣିବା ସହ ଜାତିକୁ ଆକ୍ଷେପ କରି ଗାଳିଗୁଳଜ କରିଥିବା କମିଶନର ତାଙ୍କ ଅଭିଯୋଗପତ୍ରରେ ଉଲ୍ଲେଖ କରିଛନ୍ତି। ଉଭୟଙ୍କ ଅଭିଯୋଗକୁ ଭିତ୍ତି କରି ଥାନାରେ ୨ଟି ମାମଲା ରୁଜୁ କରାଯାଇ ତଦନ୍ତ କରାଯାଉଛି ବୋଲି ଶ୍ରୀଲିଙ୍ଗରାଜ ଥାନା ଅଧିକାରୀ ଶରତପାତ୍ର କହିଛନ୍ତି।