ନୂଆଦିଲ୍ଲୀ,୨୪ା୫:ବିଶେଷଜ୍ଞମାନେ ଆଦାନୀ ଗ୍ରୁପ୍ର ନିର୍ଦ୍ଦିଷ୍ଟ ବ୍ୟବସାୟିକ କାର୍ଯ୍ୟ ବିରୋଧରେ ଏକ ଟୁଲ୍କିଟ୍ର ପର୍ଦ୍ଦାଫାଶ କରିଛନ୍ତି। ଏଥିରେ କମ୍ୟୁନିଷ୍ଟ ନେତା, ପାକିସ୍ତାନୀ, ଇସ୍ଲାମୀୟ ମୌଳବାଦୀ, ବିଲିୟନେୟାର ଜର୍ଜ ସୋରୋସ ଏବଂ ପାଶ୍ଚାତ୍ୟ ରାଷ୍ଟ୍ରର ମିଳିତ ସମ୍ପୃକ୍ତି ରହିଛି। ଫାଇନାନ୍ସିଆଲ ଟାଇମ୍ସ ଏବଂ ଜର୍ଜ ସୋରେସ୍ଙ୍କ ସମର୍ଥତ୍ତ ଅର୍ଗାନାଇଜ୍ଡ କ୍ରାଇମ୍ ଆଣ୍ଡ କରପ୍ଶନ ରିପୋର୍ଟିଂ ପ୍ରୋଜେକ୍ଟ (ଓସିସିଆର୍ପି) ସମେତ ଗୋଟିଏ ଗୋଷ୍ଠୀ ବିଦେଶୀ ଗଣମାଧ୍ୟମରେ ପ୍ରକାଶିତ ରିପୋର୍ଟ ଉକ୍ତ ଟୁଲ୍କିଟ୍କୁ ପଦାରେ ପକାଇଛି। ୧୦ ବର୍ଷ ତଳେ ଆଦାନୀ ଗ୍ରୁପ୍ ଭାରତରେ କମ୍ ଦାମରେ ଆମଦାନି ହୋଇଥିବା ନିମ୍ନମାନର କୋଇଲାକୁ ଉଚ୍ଚ ଦରରେ ବିକ୍ରି କରୁଥିବା ଅଭିଯୋଗ ସମ୍ପର୍କରେ ରିପୋର୍ଟ ଉପରୋକ୍ତ ଗଣମାଧ୍ୟମରେ ପ୍ରକାଶ ପାଇଥିଲା। ସାମ୍ବାଦିକ ଆନନ୍ଦ ମାଙ୍ଗନାଲେ ଉକ୍ତ ପ୍ରଚାରଧର୍ମୀ ଲେଖା ଲେଖିବା ସହ ଏହାକୁ ସମର୍ଥନ କରିଥିଲେ ବୋଲି ବିଶେଷଜ୍ଞମାନେ କହିଛନ୍ତି। ଏହାକୁ ଅନେକେ ସେମାନଙ୍କ ସୋସିଆଲ ମିଡିଆ ହ୍ୟାଣ୍ଡେଲରେ ରିପୋଷ୍ଟ କରିଥିଲେ। ବିଶେଷଜ୍ଞମାନଙ୍କ କହିବା ଅନୁଯାୟୀ ବ୍ରିଟେନ୍ର ଫାଇନାନ୍ସିଆଲ ଟାଇମ୍ସ ମଧ୍ୟ ଏହି ଟୁଲ୍କିଟ୍ରେ ସାମିଲ ରହିଛି ଏବଂ ଏହାଦ୍ୱାରା ଆଦାନୀ ଗ୍ରୁପ୍ ବିରୋଧରେ ପ୍ରଚାରଧର୍ମୀ ନିବନ୍ଧ ପ୍ରକାଶ ପାଇଥିଲା। ଆଦାନୀ ଗ୍ରୁପ୍ ବିରୋଧରେ ଦୁଇ ବିଦେଶୀ ମିଡିଆ ସଂଗଠନ ଦି ଫାଇନାନ୍ସିଆ ଟାଇମ୍ସ ଏବଂ ଓସିସିଆର୍ପି ଅତୀତରେ ବାରମ୍ବାର ସମାନ ଅଭିଯୋଗ ଆଣି ସମାଲୋଚନା କରିବାରୁ ମାର୍କେଟ ଏହାକୁ ଗମ୍ଭୀରତାର ସହ ନେବା ବନ୍ଦ କରିଦେଇଥିଲା। ଫାଇନାନ୍ସିଆ ଟାଇମ୍ସର ଦୀର୍ଘଦିନ ପୁରୁଣା ଲେଖା କେବଳ କୋଳାହଳ ବୋଲି ଆମେରିକାର ଗ୍ଲୋବାଲ ବ୍ରୋକେରେଜ କାଣ୍ଟର ଫିଜ୍ଗେରାଲ୍ଡ କହିଛନ୍ତି।
ଆଦାନୀ ଗ୍ରୁପ୍ ବିରୋଧରେ ଫାଇନାନ୍ସିଆ ଟାଇମ୍ସ ବୁଧବାର ଭୋର ୪ଟା ୩୪ରେ ପ୍ରଚାରଧର୍ମୀ ଲେଖା ପୋଷ୍ଟ କରିବା ପରେ ୭ଟା ୪୯ରେ ଜଣେ ଖ୍ୟାତନାମା ସାମ୍ବାଦିକ ପ୍ରଚାରସର୍ବସ୍ବ ଲେଖା ପୋଷ୍ଟ କରିବାରୁ ଟୁଲ୍କିଟ ତାହାକୁ ସୋସିଆଲ ମିଡିଆରେ ଶେୟାର କରିବା ଆରମ୍ଭ କରିଥିଲା। ସେଦିନ ରାତି ୯ଟା ୪୨ରେ ଅନ୍ୟ ଜଣେ କର୍ମୀ ଓ କେତେଜଣ ଖ୍ୟାତନାମା ବ୍ୟକ୍ତି ଏହାକୁ ପୋଷ୍ଟ କରିଥିଲେ। ତେବେ ଭାରତୀୟ ଶେୟାର ବଜାର ଏହି ରିପୋର୍ଟକୁ ଗ୍ରହଣ କରି ନ ଥିବା ଜଣାପଡ଼ିଛି। କାରଣ ଗୁରୁବାର ନିଫ୍ଟରେ ଆଦାନୀ ଏଣ୍ଟରପ୍ରାଇସ୍ ସବୁଠୁ ଅଧିକ ଲାଭବାନ ହୋଇଛି। ଏହାର ଶେୟାର ମୂଲ୍ୟ ୭.୮୪ ପ୍ରତିଶତ ବୃଦ୍ଧି ପାଇଥିଲା। ସେହିପରି ୪.୭୩ ପ୍ରତିଶତ ବୃଦ୍ଧ ସହ ଆଦାନୀ ପୋର୍ଟସ ମଧ୍ୟ ଶୀର୍ଷ ୩ ଲାଭକାରୀ ସଂସ୍ଥା ମଧ୍ୟରେ ରହିଛି।