ସମର୍ଥନ ଯୋଗାଡ଼ କରୁଛନ୍ତି ଆର୍ମଡ ଡିସିପି: ସିପାହିଙ୍କ ସ୍ତ୍ରୀ
9:02 amApril 7, 2021April 7, 2021 / 43

ଭୁବନେଶ୍ୱର, ୬ା୪(ବ୍ୟୁରୋ): ସିପାହୀଙ୍କୁ ଝିଅ ଯୋଗାଇବାକୁ ବାଧ୍ୟ କରୁଥିବା ଆର୍ମଡ ଡିସିପିଙ୍କ ବିରୋଧରେ ମଙ୍ଗଳବାର ପୁଣି ଏକ ଅଭିଯୋଗ ଆସିଛି। ଓଏସ୍‌ଏପି ଡିସିପି ବିଜୟ କୁମାର ସାହୁ ବାଟାଲିୟନ ସଂଘ କର୍ମକର୍ତ୍ତାଙ୍କ ଜରିଆରେ ଘର ଘର ବୁଲି ନିଜ ସପକ୍ଷରେ ସମର୍ଥନ ଯୋଗାଡ କରୁଥିବା ସିପାହୀଙ୍କ ସ୍ତ୍ରୀ ଗଣମାଧ୍ୟମ ଆଗରେ ପ୍ରକାଶ କରିଛନ୍ତି। ସେହିପରି ସିପାହୀଙ୍କ ବାବଦରେ ବିଜୟ ଦେଇଥିବା ମତକୁ ମଧ୍ୟ ଖଣ୍ଡନ କରିଛନ୍ତି। ଡିସିପି ନିଜେ କଟକ, ଭୁବନେଶ୍ୱରରେ ୧୦ବର୍ଷ ରହିଥିବାବେଳେ ସିପାହୀ ୩ବର୍ଷରୁ ଊର୍ଦ୍ଧ୍ୱ ଚାକିରି କଲେ କ’ଣ ଅସୁବିଧା ବୋଲି ସିପାହୀଙ୍କ ସ୍ତ୍ରୀ ପ୍ରଶ୍ନ ଉଠାଇଛନ୍ତି। ଅନ୍ୟପଟେ, ଏହି ଘଟଣାରେ ପୋଲିସ ୩ ଜଣଙ୍କ ବୟାନ ରେକର୍ଡ କରିଛି।
ସୂଚନାଯୋଗ୍ୟ, ନୀହାର ନାୟକ ସପ୍ତମ ବାଟାଲିଅନର ଫ୍ୟାମିଲି ୱେଲ୍‌ଫେୟାର ସେଣ୍ଟରରେ ଟେଲରିଂ ସିପାହୀ ଭାବେ କାର୍ଯ୍ୟ କରନ୍ତି। ସେ ସେଠାରେ ମହିଳାଙ୍କୁ ଟେଲରିଂ ଶିଖାନ୍ତି। ପୋଲିସ କର୍ମଚାରୀଙ୍କ ଝିଅ, ସ୍ତ୍ରୀ ଓ ଭଉଣୀମାନେ ସେଠାକୁ ହସ୍ତଶିଳ୍ପ ଓ ଟେଲରିଂ ଶିଖିବାକୁ ଆସନ୍ତି। ନୀହାରଙ୍କ ସ୍ତ୍ରୀଙ୍କ ଅଭିଯୋଗ ଅନୁଯାୟୀ, ଡିସିପି ବିଜୟ ଉକ୍ତ ୱେଲ୍‌ଫେୟାର ସେଣ୍ଟରକୁ ଶିଖିବାକୁ ଆସୁଥିବା ଝିଅ ବୋହୂଙ୍କୁ ତାଙ୍କ ପାଖକୁ ପଠାଇବାକୁ ସ୍ବାମୀଙ୍କୁ ବାଧ୍ୟ କରୁଥିଲେ। ଝିଅ ନ ଯୋଗାଇଲେ ଅନ୍ୟତ୍ର ବଦଳି ସହ ଚାକିରିରୁ ବାହାର କରିଦେବାକୁ ଧମକ ଦେଉଥିଲେ। ଶେଷରେ ସୋମବାର ନୀହାର ଅତ୍ୟଧିକ ମାନସିକ ଚାପରେ ପଡ଼ି ଫିନାଇଲ୍‌ ପିଇ ଆତ୍ମହତ୍ୟା ଉଦ୍ୟମ କରିଥିବା ଓଏସ୍‌ଏପି ସିପାହୀ ନୀହାରଙ୍କ ସ୍ତ୍ରୀ ସୋମବାର ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀଙ୍କୁ ଭେଟି ଘଟଣା ସମ୍ପର୍କରେ ଅଭିଯୋଗ କରିଥିଲେ। ଏ ସଂକ୍ରାନ୍ତରେ ଡିସିପି ବିଜୟଙ୍କୁ ପଚାରିବାରୁ ତାଙ୍କ ବିରୋଧରେ ହୋଇଥିବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି।