ଗୋପ,୨୨।୨(ଡି.ଏନ୍.ଏ.): ଗୋପ-ନିମାପଡ଼ା ରାସ୍ତାରେ ଥିବା ଏକ ପେଟ୍ରୋଲ ପମ୍ପରେ ପେଟ୍ରୋଲରେ ପାଣି ମିଶିବାକୁ ନେଇ ରବିବାର ଉତ୍ତେଜନା ଦେଖାଯାଇଥିଲା। ବହୁ ଯୁକ୍ତିତର୍କ ପରେ ଟାଙ୍କି ମାଲିକ ବାଇକ୍ ଆରୋହୀଙ୍କୁ ଟଙ୍କା ଫେରାଇବାରୁ ପରିସ୍ଥିତି ଶାନ୍ତ ପଡ଼ିଥିଲା। ସୂଚନାଯୋଗ୍ୟ, ଗୋପ ହାପି କଲୋନୀର ବନମାଳୀ ସିଂ ଓ ତାଙ୍କ ମା ଜରୁରୀ କାର୍ଯ୍ୟରେ ବାହାରିଥିଲେ। ବାଇକ୍ରେ ତେଲ ନ ଥିବାରୁ ଗୋପ ବଜାରର ଶେଷ ଭାଗରେ ଥିବା ଏକ ପେଟ୍ରୋଲ ପମ୍ପରେ ୧୫୦ ଟଙ୍କାର ତେଲ ପକାଇଥିଲେ। ହେଲେ କିଛି ବାଟ ଯିବାପରେ ବାଟରେ ବାରମ୍ବାର ଗାଡ଼ି ବନ୍ଦ ହୋଇଥିଲା। କିଛି ବାଟ ବାଇକ୍କୁ ଗଡ଼ାଇ ଏକ ଗ୍ୟାରେଜରେ ଦେଖାଇବାରୁ ଗ୍ୟାରେଜ ମିସ୍ତ୍ରି ସଜାଡ଼ିବା ପରେ ପାଣି ମିଶା ପେଟ୍ରୋଲ ଯୋଗୁ ଏପରି ହୋଇଥିବା କହିଥିଲେ। ପରେ ବନମାଳୀ ଅନ୍ୟ ଏକ ପେଟ୍ରୋଲ ପମ୍ପରୁ ତେଲ ଆଣି ପକାଇବା ପରେ ଗାଡ଼ି ଷ୍ଟାର୍ଟ ହୋଇଥିଲା। ଏ ନେଇ ବନମାଳୀ ପ୍ରଥମେ ତେଲ ପକାଇଥିବା ପେଟ୍ରୋଲ ପମ୍ପରେ ପହଞ୍ଚତ୍ ପାଣିମିଶା ପେଟ୍ରୋଲ ଦେଉଥିବା ନେଇ ଟାଙ୍କି କର୍ମଚାରୀଙ୍କ ସହ ଯୁକ୍ତିତର୍କ ହୋଇଥିଲେ। ଏହାଦେଖି ଅନ୍ୟ ଲୋକମାନେ ମଧ୍ୟ ଭଲ ପେଟ୍ରୋଲ ଦେବାକୁ ଦାବି କରିଥିଲେ। ପ୍ରାୟ ୨୦/୨୫ ମିନିଟ ଧରି ପେଟ୍ରୋଲ ପମ୍ପରେ ଉତ୍ତେଜନା ଲାଗି ରହିଥିବା ଦେଖି ପମ୍ପ ମାଲିକ ପହଞ୍ଚି ବନମାଳୀଙ୍କୁ ପେଟ୍ରୋଲ ଦାମ ଫେରାଇବା ପରେ ପରିସ୍ଥିତି ଶାନ୍ତ ପଡିଥିଲା। ଏ ନେଇ ପେଟ୍ରୋଲ ପମ୍ପ ମାଲିକ କୌଣସି ମତାମତ ଦେବାକୁ ମନା କରିଥିବା ବେଳେ ପାଣି ମିଶା ପେଟ୍ରୋଲ ପକାଇଥିବା ବନମାଳୀ ସିଂ ଏପରି ଅଭିଯୋଗକୁ ନେଇ ଅସନ୍ତୋଷ ବ୍ୟକ୍ତ କରିବା ସହ ପେଟ୍ରୋଲିୟମ ମନ୍ତ୍ରୀଙ୍କ ନିକଟରେ ଅଭିଯୋଗ କରିବେ ବୋଲି କହିଥିଲେ।