ଅତିରିକ୍ତ ତହସିଲଦାରଙ୍କୁ ଦୁର୍ବ୍ୟବହାର : ଭାଜପାର ପୂର୍ବତନ ଜିଲା ସଭାପତିଙ୍କ ନାମରେ ଏତଲା
6:00 amJuly 10, 2020July 10, 2020 / 21

ବାରିପଦା ଅଫିସ/ରାସଗୋବିନ୍ଦପୁର,୧୦ା୭(ଡି.ଏନ୍‌.ଏ.)- ମୟୂରଭଞ୍ଜ ଜିଲା ରାସଗୋବିନ୍ଦପୁର ତହସିଲ କାର୍ଯ୍ୟାଳୟରେ ପଶି ଅତିରିକ୍ତ ତହସିଲଦାରଙ୍କୁ ଧମକ ଦେଇଥିବା ଅଭିଯୋଗରେ ଭାଜପାର ପୂର୍ବତନ ଜିଲା ସଭାପତି କୃଷ୍ଣଚନ୍ଦ୍ର ମହାପାତ୍ରଙ୍କ ନାମରେ ଥାନାରେ ଅଭିଯୋଗ ହୋଇଛି। ରାସଗୋବିନ୍ଦପୁର ପୋଲିସ ଏନେଇ ଏକ ମାମଲା(ନଂ.୧୨୩/୨୦୨୦) ରୁଜୁ କରି ତଦନ୍ତ ଜାରି ରଖିଛି।
ପୋଲିସ ସୂଚନା ଅନୁସାରେ, ମଙ୍ଗଳବାର ଅପରାହ୍ନ ୪ଟାରେ କୃଷ୍ଣଚନ୍ଦ୍ର ତହସିଲ କାର୍ଯ୍ୟାଳୟକୁ ଯାଇ ତହସିଲଦାର ଦାୟିତ୍ୱରେ ଥିବା ଅତିରିକ୍ତ ତହସିଲଦାର ପ୍ରଭାତ କୁମାର ମହାପାତ୍ରଙ୍କ ଚ୍ୟାମ୍ପରରେ ପଶିଥିଲେ। ନିଜ କର୍ମୀମାନଙ୍କ ସହିତ କାର୍ଯ୍ୟାଳୟରେ ଲାଗିଥିତ୍ବା ସିସିଟିଭି କ୍ୟାମେରାକୁ ବନ୍ଦ କରିବା ସହିତ ଗାଳି କରିଥିଲେ। ବେଆଇନ ବାଲି ଚାଲାଣ ଅଭିଯୋଗରେ ଜବତ କରାଯାଇଥିବା ବଡ଼ମାପୁରର ଦିଲୀପ ନାୟକଙ୍କ ୨ଟି ଗାଡ଼ିକୁ ଛାଡ଼ି ଦେବା ପାଇଁ ଧମକ ଦେଇଥିଲେ। ଅନ୍ୟପକ୍ଷେ କୃଷ୍ଣଚନ୍ଦ୍ର ଆରଟିଆଇ ତଥ୍ୟ ମାଗିବାକୁ ଯାଇଥିବା ବେଳେ ଅତିରିକ୍ତ ତହସିଲଦାର ତଥ୍ୟ ନ ଦେଇ ତାଙ୍କ ନାମରେ ମିଥ୍ୟା ଅଭିଯୋଗ କରିଥିବା ଜିଲା ଭାଜପା ପକ୍ଷରୁ ପ୍ରେସ୍‌ ବିବୃତିରେ ସୂଚନା ଦିଆଯାଇଛି।