ବରଗଡ଼ ଅଫିସ,୧୫ା୧୦: ବରଗଡ଼ ପୌର ପରିଷଦ ଅନ୍ତର୍ଗତ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଶନିବାର ଅତିରିକ୍ତ ଜିଲା ଶିକ୍ଷାଧିକାରୀ(ଏଡିଇଓ) ଜ୍ୟୋତିକାନ୍ତ ସାହୁ ଛାତ୍ରୀଙ୍କ ଗହଣରେ ମଧ୍ୟାହ୍ନଭୋଜନ ଖାଇ ଖାଦ୍ୟର ଗୁଣବତ୍ତା ଯାଞ୍ଚ କରିଥିଲେ। ସ୍ଥାନୀୟ କାଉନସିଲର ସାରଳା ବଗର୍ତ୍ତି, ପ୍ରଧାନଶିକ୍ଷୟିତ୍ରୀ ରେଣୁଦାସ ଶର୍ମା ମଧ୍ୟ ଉପସ୍ଥିତ ରହି ଛାତ୍ରୀମାନଙ୍କ ସହିତ ବସି ମଧ୍ୟାହ୍ନଭୋଜନ ଖାଇ ମାନ ଯାଞ୍ଚ କରିଥିଲେ। ଏହି ଅବସରରେ ଏଡିଇଓ ସାହୁ ତଥା କାଉନସିଲର ବିଦ୍ୟାଳୟରେ ଚାଲିଥିବା ମଧ୍ୟାହ୍ନଭୋଜନ ସୁପରିଚାଳନା ସମ୍ବନ୍ଧରେ ପ୍ରଧାନଶିକ୍ଷୟିତ୍ରୀଙ୍କୁ ପଚାରି ବୁଝିଥିଲେ। ଏଥିସହିତ ଛାତ୍ରୀମାନେ ଭୋଜନ କରୁଥିବା ଭୋଜନସ୍ଥଳ ଓ ରୋଷେଇଘର ପରିଦର୍ଶନ କରିଥିଲେ। ପରିବେଶକୁ ଆହୁରି ସ୍ବଚ୍ଛ ରଖିବା ପାଇଁ ପାଚିକା ଓ ସହାୟିକାମାନଙ୍କୁ ପରାମର୍ଶ ଦେଇଥିଲେ। ଖାଇବା ପୂର୍ବରୁ ଛାତ୍ରୀମାନେ ଯେପରି ନିୟମିତ ହାତ ଧୋଇବେ ସେଥିପ୍ରତି ସ୍ବତନ୍ତ୍ର ଧ୍ୟାନ ଦେବାକୁ ମଧ୍ୟାହ୍ନଭୋଜନ ପରିଚାଳନା ଦାୟିତ୍ୱରେ ଥିବା ଶିକ୍ଷୟିତ୍ରୀଙ୍କୁ ଏଡିଇଓ ପରାମର୍ଶ ଦେଇଥିଲେ।
