ନିକଟରେ ବଲିଉଡର ଗାୟିକା ତଥା ଇଣ୍ଡିଆନ ଆଇଡଲ ଜଜ ନେହା କକ୍କରଙ୍କ ବିବାହ ରୋହନପ୍ରୀତ ସିଂଙ୍କ ହେବ ବୋଲି ଚର୍ଚ୍ଚା ଚାଲିଛି। ଏବେ ଇଣ୍ଡିଆନ ଆଇଡଲ ହୋଷ୍ଟ ଆଦିତ୍ୟ ନାରାୟଣ ମଧ୍ୟ ତାଙ୍କ ବିବାହ ସମ୍ପର୍କରେ ଘୋଷଣା କରିଛନ୍ତି। ଦୀର୍ଘ ଦିନର ଗର୍ଲଫ୍ରେଣ୍ଡ ତଥା ଅଭିନେତ୍ରୀ ଶ୍ୱେତା ଅଗ୍ରୱାଲଙ୍କୁ ବିବାହ ହେବ ବୋଲି ଆଦିତ୍ୟ କହିଛନ୍ତି। ଆଦିତ୍ୟ ନାରାୟଣଙ୍କ ଅନୁଯାୟୀ, ଚଳିତବର୍ଷ ଶେଷ ସୁଦ୍ଧା ସେ ଶ୍ୱେତାଙ୍କୁ ବିବାହ କରିବାକୁ ଯାଉଛନ୍ତି। ୨୦୧୦ରେ ଶାପିତ୍ ଶୁଟିଂ ସମୟରେ ଆଦିତ୍ୟ ଶ୍ୱେତାଙ୍କୁ ଭେଟିଥିଲେ ଏବଂ ସେବେଠାରୁ ଦୁହେଁ ପରସ୍ପରକୁ ଡେଟ୍ କରିଆସୁଥିଲେ। ମୁଁ ଆରମ୍ଭରୁ ଶ୍ୱେତାଙ୍କୁ ମନ ଦେଇ ବସିଥିଲି। ସେତେବେଳେ ଆମେ ଦୁହେଁ ଛୋଟ ଥିଲୁ। ତେଣୁ କ୍ୟାରିୟର ଉପରେ ଧ୍ୟାନ ହେବାକୁ ଚାହୁଁଥିଲୁ। ଏହି କାରଣରୁ ପରସ୍ପର ବନ୍ଧୁ ଭାବରେ ରହିବାକୁ ନିଷ୍ପତ୍ତି ନେଇଥିଲୁ ବୋଲି ଆଦିତ୍ୟ ଏକ ସାକ୍ଷାତକାରରେ କହିଛନ୍ତି।
ଏକଦା ଇଣ୍ଡିଆନ୍ ଆଇଡଲ୍ କାର୍ଯ୍ୟକ୍ରମରେ ନେହା ଏବଂ ଆଦିତ୍ୟଙ୍କ ପ୍ରେମ ସମ୍ପର୍କକୁ ନେଇ ବେଶ୍ ଚର୍ଚ୍ଚା ହୋଇଥିଲା। ଆଦିତ୍ୟ ଖୋଲାଖୋଲି ଭାବରେ ନେହାଙ୍କୁ ପ୍ରେମ ନିବେଦନ କରିଥିଲେ। ଆଦିତ୍ୟଙ୍କ ପିତା ତଥା ପ୍ରସିଦ୍ଧ ଗାୟକ ଉଦିତ ନାରାୟଣ ମଧ୍ୟ ଏହି ସମ୍ପର୍କକୁ ସ୍ବୀକୃତି ଦେଇଥିଲେ। କିନ୍ତୁ କିଛିଦିନ ପରେ ଉଭୟ ଅଲଗା ହୋଇଯାଇଥିଲେ।