ସେମିଳିଗୁଡା/ସୁନାବେଡା, ୨୭ା୨(ସ୍ବ.ପ୍ର.):ଆନ୍ଧ୍ରପ୍ରଦେଶ ସରକାର, ଓଡିଶାର ସୀମାନ୍ତବର୍ତ୍ତୀ କୋଟିଆକୁ ନେଇ ବହୁ ବାଦ ବିବାଦ ପରେ ଓଡିଶା ସରକାର କୋଟିଆ ଅଞ୍ଚଳର ଆଦିବାସୀଙ୍କ ବିକାଶ ପାଇଁ କେତେକ ଯୋଜନା କରିଥିଲେ। ଏଠାକାର ଜଳବାୟୁ ଅନୁସାରେ ଉକ୍ତ ଅଞ୍ଚଳରେ ଷ୍ଟ୍ରବେରି ଚାଷ କରାଯାଇଥିଲା। କୃଷି ବିଭାଗର ଅଧିକାରୀମାନେ ଅଞ୍ଚଳ ପରିଦର୍ଶନ କରି ପ୍ରାୟ ୩ ଏକର ଜମି ଚିହ୍ନଟ କରିଥିଲେ। ଏଥିପାଇଁ କାଣ୍ଟି ପଞ୍ଚାୟତର ଉପରକାଣ୍ଟି ଡଙ୍ଗର ମାଳିକୁ ଏସଏଚଜି ମାଧ୍ୟମରେ ଜମି ସମତୁଲ ଓ ବେଡ଼ ବନାଇବାକୁ କହିଥିଲେ। ଗତ ଦୁଇ ମାସ ତଳେ ତତ୍କାଳୀନ ବିଡ଼ିଓ, ଆଇଟିଡ଼ିଏ, କୃଷି, ଉଦ୍ୟାନ, ଓଏଲଏମ ଓ ଏପିଓ ଅଧକାରୀଙ୍କ ନିର୍ଦ୍ଦେଶମୁତାବକ ଲକ୍ଷଧିକ ଟଙ୍କା ଖର୍ଚ୍ଚ କରି ଟ୍ରାକ୍ଟର ଓ କିଛି ଲୋକଙ୍କୁ ପାରିଶ୍ରମିକ ଦେଇ ଏସଏଚଜି ସଦସ୍ୟମାନେ ସବୁ କାମ କରିଥିଲେ। ମାତ୍ର ଏତେ ସବୁକାମ ପଇଁ ସମ୍ପୃକ୍ତ ଏସଏଚଜିକୁ ପ୍ରଶାସନ ପାରିଶ୍ରମିକ ଏବଂ କାର୍ଯ୍ୟରେ ବ୍ୟବହୃତ ସାମଗ୍ରୀ ଦେଇ ନ ଥିବା ବୋଲି ଏସଏଚଜି ସଭାନେତ୍ରୀ ମାରିୟମ ସାଆନ୍ତା,ସମ୍ପାଦିକା ମାରତା ସାଆନ୍ତା କହିଛନ୍ତି। ପ୍ରଶାସନ ଆମକୁ ସ୍ବାବଲମ୍ବୀ କରିବା ଆଳରେ ଠକିଦେଲା ବୋଲି ଉଭୟେ ପ୍ରକାଶ କରିଛନ୍ତି। କୋଟିଆ ଅଞ୍ଚଳର ଏସଏଚଜିକୁ ସ୍ବାବଲମ୍ବୀ କରିବା ସହ ଆର୍ଥିକ ସ୍ବଚ୍ଛଳ କରିବାକୁ ଜିଲା ପ୍ରଶାସନ ସହଯୋଗରେ ଆଇଟିଡ଼ିଏ ଷ୍ଟ୍ରବେରି ଚାଷ ପାଇଁ ଗତ ବର୍ଷ କୋଟିଆ ପଞ୍ଚାୟତ ଡୋଳିଆମ୍ବା ଗ୍ରାମକୁ ଚୟନ କରି ଷ୍ଟ୍ରବେରି ଚାଷ ଲାଗି ଉପକରଣ ଏବଂ ଚାରା ଯୋଗାଇ ଦେଇଥିଲା। ଚଳିତ ବର୍ଷ ସେହି କୋଟିଆ ଅଞ୍ଚଳର ଆଉ କିଛି ଗ୍ରାମକୁ ଷ୍ଟ୍ରବେରି ଚାଷ ପାଇଁ ଚିହ୍ନଟ କରାଯାଇ ପଟ୍ଟାଙ୍ଗି ବ୍ଲକର ନୂଆଗାଁ ପଞ୍ଚାୟତ ଓ ଗାଲିଗବଦରରେ ଚାଷ ମଧ୍ୟ ଆରମ୍ଭ ହୋଇଥିଲା। ଏସମ୍ପର୍କରେ କୋରାପୁଟ ଆଇଟିଡିଏ ଅଧିକାରୀ ଏସଏନ ମହାନ୍ତିଙ୍କୁ ପଚାରିବାରୁ ସେ ଉପରକାଣ୍ଟିରେ ଷ୍ଟ୍ରବେରି ଚାଷ ବିଷୟରେ ଜାଣି ନ ଥିବା କହି କୋଟିଆ ଅଞ୍ଚଳର କିଛି ଗ୍ରାମ ଏବଂ ପଟ୍ଟାଙ୍ଗି ବ୍ଲକ ନୂଆଗାଁର ଗାଲି ଗବଦର ତଦାରଖ ଦାୟିତ୍ୱରେ ଥିବା କହିଥିଲେ। ସେମିଳିଗୁଡା ବ୍ଲକ ବିଡ଼ିଓ ସବ୍ୟସାଚୀ ବେହେରାଙ୍କୁ ପଚାରିବା ଲାଗି ତାଙ୍କୁ ଫୋନ ଯୋଗେ ବାରମ୍ବାର ଯୋଗାଯୋଗ କରିଥିଲେ ମଧ୍ୟ ସେ ଫୋନ ଉଠାଇ ନ ଥିଲେ।