କୋକସରା,୨୫।୭(ଡି.ଏନ୍.ଏ.): କଳାହାଣ୍ଡିରୁ ନବରଙ୍ଗପୁର ଜିଲାକୁ ସାର ଚାଲାଣ ଧରାପଡ଼ିବା ପରେ କଳାହାଣ୍ଡି ଜିଲା ପ୍ରଶାସନ ଏବଂ କୃଷି ବିଭାଗ ପକ୍ଷରୁ ଧରପଗଡ଼ ଜାରି ରହିଛି। ଧର୍ମଗଡ଼ ଉପ ଜିଲାପାଳଙ୍କ ନିର୍ଦ୍ଦେଶକ୍ରମେ କୋକସରା ବ୍ଲକର ବିଭିନ୍ନ ସାର ହୋଲସେଲ୍ ସମେତ ରିଟେଲ ଦୋକାନରେ ଚଢାଉ କରାଯାଇଛି।
ଶୁକ୍ରବାର କୋକସରା ଓ ମୋଟେର ଅଞ୍ଚଳରେ ଥିବା ସାର ଦୋକାନ ଓ ଗୋଦାମରେ ଯାଞ୍ଚ କରାଯାଇଥିବା ବେଳେ ଶନିବାର କୋକସରା ବ୍ଲକ ଲଡୁଗାଁ ଓ ଆମପାଣିରେ ଥିବା ୮ ସାର ଦୋକାନ ଓ ଗୋଦାମରେ ଚଢାଉ କରି ଯାଞ୍ଚ କରାଯାଇଥିଲା। ଶନିବାର କୋକସରା ଅତିରିକ୍ତ ତହସିଲଦାର କମଳାସନ ରଥ ଏବଂ କୋକସରା କୃଷି ବିଭାଗ କର୍ମଚାରୀ ଲଡୁଗାଁଠାରେ ଥିବା ଗୋୟଲ ସେଲସ୍ ଆଣ୍ଡ ସାର୍ଭିସ, ଅନୁପ କୁମାର ଅଗ୍ରୱାଲ ଆଣ୍ଡ କୋ, ଲିଙ୍ଗରାଜ ଟ୍ରେଡଂ କୋ, ମନୋଜ କୁମାର ଅଗ୍ରୱାଲଙ୍କ ହୋଲସେଲ୍ ଦୋକାନରେ ଚଢାଉ କରିଥିଲେ। ଏଥିସହ ଆମପାଣିରେ ଥିବା ଆସ୍ତିକ ଜେନେରାଲ ଷ୍ଟୋର, ବୁଢ଼ାରଜା ଏଗ୍ରୋ, ପ୍ରତିଭା ଫର୍ଟିଲାଇଜର ଓ ଦୀପକ ଫର୍ଟିଲାଇଜର ସାର ଦୋକାନ ଏବଂ ଗୋଦାମର ସମସ୍ତ କାଗଜପତ୍ର ସମେତ ଷ୍ଟକ ଷ୍ଟେଟମେଣ୍ଟ, ପରିବହନ ବିବରଣୀ ଯାଞ୍ଚ କରାଯାଇଛି। ତେବେ ଆମପାଣିଠାରେ ଥିବା ଦୀପକ ଫର୍ଟିଲାଇଜର ଦୋକାନରେ ରେଜିଷ୍ଟର ଓ ପି.ଓ.ଏସ୍ ମେଶିନରେ ଅନିୟମିତତା ଥିବା କାରଣରୁ କାର୍ଯ୍ୟାନୁଷ୍ଠାନ ନେବାକୁ ଉପଖଣ୍ଡ କୃଷି ଅଧିକାରୀଙ୍କୁ ରିପୋର୍ଟ ଦିଆଯାଇଛି ବୋଲି ଅତିରିକ୍ତ ତହସିଲଦାର ସୂଚନା ଦେଇଛନ୍ତି।