ବଲାଙ୍ଗୀର, ୧୦ା୫(ବୀରେନ୍ଦ୍ର କୁମାର ଝାଙ୍କର):ବଲାଙ୍ଗୀର ରାଜ ପରିବାରର ସାନବୋହୂ ଅଦ୍ରିଜା ମଞ୍ଜରୀ ସିଂ ଗୁରୁବାର ସ୍ଥାନୀୟ ଏକ ହୋଟେଲଠାରେ ଏକ ଖବରଦାତା ସମ୍ମିଳନୀ କରି ତାଙ୍କ ପାରିବାରିକ ନିର୍ଯାତନା ପ୍ରସଙ୍ଗ ଉଠାଇ ନ୍ୟାୟ ମାଗିଛନ୍ତି। ପୁଣି ଥରେ ସେ ତାଙ୍କ ସ୍ବାମୀ ଅର୍କେଶ ନାରାୟଣ ସିହଦେଓ, ଦେଢ଼ଶୁର କଳିକେଶ ନାରାୟଣ ସିଂଦେଓ ଏବଂ ଶ୍ୱଶୁର ଅନଙ୍ଗ ଉଦୟ ସିଂହଦେଓଙ୍କ ବିରୋଧରେ ନିର୍ଯାତନା ଅଭିଯୋଗ ଆଣିଛନ୍ତି। ତାଙ୍କ ନିର୍ଯାତନା ସମ୍ପର୍କରେ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଜଣାଇଥିବା କହିଥିଲେ। ଏହାସତ୍ତ୍ୱେ ସେ ଏହି ପରିବାର ସଦସ୍ୟଙ୍କୁ ବିଜେଡି ଟିକେଟ ଦେଇଛନ୍ତି। ମହିଳାମାନଙ୍କ ପାଇଁ ମୁଖ୍ୟମନ୍ତ୍ରୀ ବହୁତ କିଛି କରୁଥିବା କୁହାଯାଉଛି। ତେବେ ମୁଖ୍ୟମନ୍ତ୍ରୀ ତାଙ୍କୁ ନ୍ୟାୟ ଦେଇନାହାନ୍ତି ବୋଲି ସେ କହିଥିଲେ। ଯେଭଳି ନିର୍ଯାତନା ତାଙ୍କୁ ଦିଆଯାଇଛି ତାହା ବଲାଙ୍ଗୀରର ଜନସାଧାରଣ ଜାଣନ୍ତୁ ଓ ଏହା ଉପରେ ବିଚାର କରି ଭୋଟ ଦିଅନ୍ତୁ ବୋଲି ସେ ନିବେଦନ କରିଥିଲେ। ଖବରଦାତା ସମ୍ମିଳନୀରେ ଅଦ୍ରିଜାଙ୍କ ସହ ଆଡଭୋକେଟ୍ ଦେବାଶିଷ ବିଶ୍ୱାଲ ଓ ସାମାଜିକ କର୍ମୀ ବିଜୁଳି ପ୍ରଧାନ ମଞ୍ଚାସୀନ ଥିଲେ।
ଅଦ୍ରିଜାଙ୍କ ଖବରଦାତା ସମ୍ମିଳନୀ ଉପରେ ସ୍ବାମୀ ଅର୍କେଶ ନାରାୟଣ ସିଂଦେଓଙ୍କୁ ପଚାରିବାରେ ସେ କହିଛନ୍ତି କିଛି ପର ସ୍ତ୍ରୀକୁ ନେଇ ରାଜନୀତି କରୁଛନ୍ତି। ତାଙ୍କ ପାରିବାରିକ ବିବାଦ ମାମଲା ଡେରାଡୁନ୍ କୋର୍ଟରେ ବିଚାରାଧୀନ ରହିଛି। ସେଠାକାର ଜଜ୍ ତାଙ୍କୁ ନ୍ୟାୟ ଦେବେ। ବଲାଙ୍ଗୀର ଆସି ଲୋକଙ୍କୁ ନ୍ୟାୟ ମାଗିଲେ କ’ଣ ହେବ ବୋଲି କହିଥିଲେ। ଅଦ୍ରିଜାଙ୍କ ଖବରଦାତା ସମ୍ମିଳନୀକୁ ନେଇ ସେ ସ୍ଥାନୀୟ କଂଗ୍ରେସ ଦଳ ବିଧାୟକ ପ୍ରାର୍ଥୀ ସମରେନ୍ଦ୍ର ମିଶ୍ର ଓ ବିଧାୟକ ନରସିଂହ ମିଶ୍ରଙ୍କୁ ସମାଲୋଚନା କରିଥିଲେ। ଏହା ସେମାନଙ୍କ ନିର୍ବାଚନ ପରାଜୟ ଲକ୍ଷଣ ବୋଲି କହିଥିଲେ। ଗଣମାଧ୍ୟମରେ ଅର୍କେଶଙ୍କ ଏଭଳି ମନ୍ତବ୍ୟ ପରେ କଂଗ୍ରେସ ବିଧାୟକ ପ୍ରାର୍ଥୀ ସମରେନ୍ଦ୍ର ମିଶ୍ର କହିଛନ୍ତି, କାହାରି ପାରିବାରିକ ବିବାଦରେ ତାଙ୍କର କୌଣସି ଭୂମିକା ନାହିଁ। ଜାଣିଶୁଣି ତାଙ୍କୁ ଏହି ବିବାଦକୁ ଟଣାଯାଉଛି ବୋଲି ସେ କହିଥିଲେ। ଅଦ୍ରିଜାଙ୍କ ଖବରଦାତା ସମ୍ମିଳନୀ ଉପରେ ତାଙ୍କ ଦେଢ଼ଶୁର ତଥା ବିଜେଡି ବିଧାୟକ ପ୍ରାର୍ଥୀ କଲିକେଶ କୌଣସି ମନ୍ତବ୍ୟ ଦେବାକୁ ମନା କରି ଦେଇଥିଲେ।