ନୂଆଦିଲ୍ଲୀ,୮।୩ : ଲାଇନ ଅଫ ଆକ୍ଟୁଆଲ କଣ୍ଟ୍ରୋଲ (ଏଲଏସି)ରେ ଭାରତ ଏବଂ ଚାଇନା ମଧ୍ୟରେ ଚାଲିଥିବା ତିକ୍ତତା ମଧ୍ୟରେ ସାମରିକ ଗୁପ୍ତଚର ସଂସ୍ଥା ଭାରତୀୟ ସୈନ୍ୟ ବ୍ୟବହାର କରୁଥିବା ଚାଇନାର ମୋବାଇଲ ଫୋନ ବ୍ୟବହାର ବିରୁଦ୍ଧରେ ଏକ ସତର୍କ ସୂଚନା ଜାରି କରିଛି। ଏହି ଅଞ୍ଚଳରେ ନିୟୋଜିତ ଯବାନମାନଙ୍କୁ ସତର୍କତା ଅବଲମ୍ବନ କରିବାକୁ ଏବଂ ନିଜ ଫୋନକୁ ବଦଳାଇ ଅନ୍ୟ କମ୍ପାନୀର ଫୋନ ବ୍ୟବହାର କରିବାକୁ ପରାମର୍ଶ ଦିଆଯାଇଛି।
ରିପୋର୍ଟ ଅନୁଯାୟୀ, ଜାରି ତାଲିକାରେ ଭାରତୀୟ ବଜାରରେ ମିଳୁ ଥିବା ୧୧ ଜଣାଶୁଣା ଚାଇନିଜ ମୋବାଇଲ ବ୍ରାଣ୍ଡ ରହିଛି। ଯେଉଁଥିରେ ୱାନପ୍ଲସ, ଓପୋ ଏବଂ ରିଅଲମି ମୋବାଇଲ ବ୍ରାଣ୍ଡ ଅଛି। ସାମରିକ ବ୍ୟକ୍ତି ଏବଂ ପରିବାର’ ଭାରତକୁ ଶତ୍ରୁ ଭଳି ମନୋଭାବ ରଖୁଥିବା ଦେଶରେ ତିଆରି ମୋବାଇଲ ଫୋନ କିଣିବା କିମ୍ବା ବ୍ୟବହାର ନ କରିବାକୁ କୁହାଯାଇଛି।
ବରିଷ୍ଠ ଅଧିକାରୀଙ୍କ ଅନୁଯାୟୀ, ଏହା ପ୍ରଥମ ଥର ନୁହେଁ ଯେ ଏଭଳି ସୂଚନା ଜାରି କରାଯାଇଛି। କିନ୍ତୁ ଏହାର ଉଦ୍ଦେଶ୍ୟ ଏପର୍ଯ୍ୟନ୍ତ ପ୍ରଚାର କରାଯାଇ ନାହିଁ। ବାର୍ତ୍ତା ସର୍ବଦା ସ୍ପଷ୍ଟ। ଚାଇନାର ଉଦ୍ଦେଶ୍ୟ ଏବଂ ସେହି ଦେଶରେ ତିଆରି ମୋବାଇଲ ଫୋନ ବ୍ୟବହାର ଦ୍ୱାରା ଜଡିତ ବିପଦ ସମ୍ପର୍କରେ ସମସ୍ତେ ଜାଣନ୍ତି।
ଚାଇନାର ମୋବାଇଲ ଆପ ଏବଂ ଫୋନ ବ୍ୟବହାର ସହ ଜଡିତ ଡାଟା ଉଲ୍ଲଂଘନ ଏବଂ ବିପଦ ପ୍ରସଙ୍ଗ ପ୍ରଥମେ ୨୦୨୦ରେ ସାମ୍ନାକୁ ଆସିଥିଲା। ଗଲଓ୍ବାନ ଘାଟିର ସଂଘର୍ଷ ପରେ ଭାରତ ସରକାର ଅନେକ ଚାଇନିଜ ମୋବାଇଲ ଆପ ଉପରେ ପ୍ରତିବନ୍ଧକ ଲଗାଇଥିଲେ, କିନ୍ତୁ ବିପଦ କେବଳ ଆପ୍ସରେ ସୀମିତ ନୁହେଁ। ଅନେକ ବିଶେଷଜ୍ଞ ଏହି ଫୋନ ସହିତ ଜଡିତ ବିପଦକୁ ମଧ୍ୟ ସୂଚାଇ ଦେଇଛନ୍ତି, ଯାହା ଗୁପ୍ତଚର କିମ୍ବା ସମ୍ବେଦନଶୀଳ ତଥ୍ୟ ସଂଗ୍ରହରେ ବ୍ୟବହାର କରାଯାଇପାରିବ ।
ଅଧିକାରୀମାନେ କହିଛନ୍ତି ଚାଇନା ଭଳି ଦେଶକୁ ବିଶ୍ୱାସ କରିବା ଉଚିତ ନୁହେଁ। ଯାହାର ବିସ୍ତାରର ଏକ ଉଚ୍ଚାଭିଳାଷୀ ଯୋଜନା ଅଛି ଏବଂ ଗତ କିଛି ବର୍ଷ ମଧ୍ୟରେ ଏଲଏସିରେ ସ୍ଥିତି ପରିବର୍ତ୍ତନ କରିବାକୁ ଚେଷ୍ଟା କରାଯାଇଛି। ଏହି ଡିଭାଇସ ଗୁଡିକ ଆମର ସୈନିକ ଏବଂ ନିୟୋଜନ ସ୍ଥାନ ଚିହ୍ନଟ କରିପାରିବ । ତେଣୁ ଏଜେନ୍ସିଗୁଡିକ ସତର୍କ ସୂଚନା ଜାରି କରିଛନ୍ତି। ଅତୀତରେ ଆମେ ମଧ୍ୟ ଅନେକ ପଦକ୍ଷେପ ନେଇଛୁ। ପ୍ରତିରକ୍ଷା ଏଜେନ୍ସିମାନେ ପରାମର୍ଶ ଦେଇଛନ୍ତି ଯେ ସମସ୍ତ ୟୁନିଟ ଅନ୍ୟ ଫୋନକୁ ବଦଳାନ୍ତୁ । ୩୦ ମାର୍ଚ୍ଚ ୨୦୨୩ ସୁଦ୍ଧା ସମାପ୍ତି ରିପୋର୍ଟରେ ଅନ୍ତର୍ଭୁକ୍ତ ମୋବାଇଲ ଫୋନ ବଦଳରେ ଅନ୍ୟ କମ୍ପାନୀର ମୋବାଇଲ ଫୋନ ବ୍ୟବହାର କରିବାକୁ ପରାମର୍ଶ ଦିଆଯାଇଛି।