ଭୁବନେଶ୍ୱର,୨୨।୧୦(ବ୍ୟୁରୋ):କରୋନାରୁ ଆରୋଗ୍ୟ ପରବର୍ତ୍ତୀ ପରିଚାଳନା ସଂକ୍ରାନ୍ତରେ ବୁଧବାର ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏକ ଆଡ଼ଭାଇଜରି ଜାରି ହୋଇଛି। ସୁସ୍ଥ ହେବା ପରେ ମଧ୍ୟ ଅଧିକାଂଶ ଆକ୍ରାନ୍ତଙ୍କ ପାଖରେ ଅନ୍ୟକିଛି ରୋଗର ଲକ୍ଷଣ ଦେଖାଯାଉଛି। ତେଣୁ ଏକ୍ଷେତ୍ରରେ ବ୍ୟକ୍ତିଗତ ସ୍ତରରେ, ଗୋଷ୍ଠୀ ସ୍ତରରେ ଓ ହସ୍ପିଟାଲ ସ୍ତରରେ କ’ଣ କରିବାକୁ ହେବ ତାହା କୁହାଯାଇଛି। ଏ ନେଇ ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ସମସ୍ତ ଜିଲାପାଳ, ମହାନଗର ନିଗମ କମିଶନର, ଜିଲା ମୁଖ୍ୟ ଚିକିତ୍ସାଧିକାରୀ ଓ ମେଡିକାଲ କଲେଜର ସୁପରିଣ୍ଟେଣ୍ଡେଣ୍ଟଙ୍କୁ ଚିଠି ଲେଖି ଜଣାଇଛନ୍ତି।
ହସ୍ପିଟାଲ ସ୍ତରରେ ଦିଆଯାଇଥିବା ଆଡ଼ଭାଇଜରି ଅନୁସାରେ, ଜଣେ ରୋଗୀ ସୁସ୍ଥ ହୋଇ ହସ୍ପିଟାଲରୁ ଡିସ୍ଚାର୍ଜ ହେବାର ୭ଦିନ ମଧ୍ୟରେ ହସ୍ପିଟାଲ ପକ୍ଷରୁ ପ୍ରଥମ ଫଲୋଅପ୍ କରାଯିବ। ଶାରିରୀକ ଭାବେ ହେଉ କିମ୍ବା ଟେଲିଫୋନ୍ରେ ତାଙ୍କର ସ୍ବାସ୍ଥ୍ୟାବସ୍ଥା ବୁଝିବେ। ଏହାପରେ ଡିସ୍ଚାର୍ଜର ଚତୁର୍ଥ ସପ୍ତାହ ଓ ଦ୍ୱାଦଶ ସପ୍ତାହରେ ରେଗୁଲାର ଫଲୋଅପ୍ କରାଯିବ। ଯଦି କେହି ହୋମ୍ ଆଇସୋଲେଶନରେ ରହିଥିବେ ଏବଂ ସେ କିଛି ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଥିବେ, ତେବେ ସେ ନିକଟ ସ୍ବାସ୍ଥ୍ୟ କେନ୍ଦ୍ରକୁ ଯାଇପାରିବେ। ତେବେ ଗୁରୁତର ରୋଗୀଙ୍କ କ୍ଷେତ୍ରରେ ଫଲୋଅପ୍କୁ ଅଧିକ ଗୁରୁତ୍ୱ ଦିଆଯିବ। ସେହିପରି ଅନେକ ରୋଗରେ ପୀଡ଼ିତ ଥିବା ଆକ୍ରାନ୍ତ ସୁସ୍ଥ ହେବାପରେ ସେମାନଙ୍କ ଫଲୋଅପ୍କୁ ମଧ୍ୟ ଆଡ୍ଭାଇଜରିରେ ଅଧିକ ଗୁରୁତ୍ୱ ଦିଆଯାଇଛି।
ସୁସ୍ଥ ହେବା ପରେ କ’ଣ କରିବେ
ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବ୍ୟକ୍ତିଗତ ସ୍ତରରେ ମଧ୍ୟ କେତେକ ପରାମର୍ଶ ଦିଆଯାଇଛି। ସୁସ୍ଥ ହେବା ପରେ ସାମାଜିକ ଦୂରତା ବଜାୟ ରଖିବା ସହିତ ମାସ୍କ ପିନ୍ଧିବା, ହାତ ସଫା କରିବା, ସାନିଟାଇଜର ବ୍ୟବହାର କରିବାକୁ ପଡ଼ିବ। ପାଣି ବହୁତ ପିଇବେ। ଯଦି ସ୍ବାସ୍ଥ୍ୟବସ୍ଥା ଠିକ୍ ଲାଗୁଛି, ତେବେ ଘର କାମ ସହିତ ନିଜ ପ୍ରଫେଶନାଲ କାମ କରିପାରିବେ। ପ୍ରତିଦିନ ଯୋଗ, ବ୍ୟାୟାମ, ମେଡିଟେଶନ କରିବା ଉଚିତ। ପୁଷ୍ଟିକର ଖାଦ୍ୟ ଖାଇବା ସହିତ ପର୍ଯ୍ୟାପ୍ତ ଶୋଇବା ଉଚିତ। ମଦ ଓ ଧୁମ୍ରପାନଠାରୁ ଦୂରେଇ ରହିବା ଉଚିତ। ସେହିପରି ଗୋଷ୍ଠୀସ୍ତରରେ କୁହାଯାଇଛି ଯେ, ଯେଉଁ ରୋଗୀ ସୁସ୍ଥ ହେଉଛନ୍ତି ସେମାନେ ନିଜ ଅଭିଜ୍ଞତାକୁ ସାଙ୍ଗ ଓ ବନ୍ଧୁବର୍ଗରେ ବାଣ୍ଟିବେ।