ପାରାଦୀପ,୨୬ା୧୦(ସ୍ବ.ପ୍ର.): ଜଗତ୍ସିଂହପୁର ଜିଲା ପାରାଦୀପ ପିପିଏଲ ଟାଉନଶିପରେ ରହୁଥିବା ଗଗନ ବିହାରୀ ସାହୁଙ୍କ ୩ ବର୍ଷୀୟା ଝିଅ ଆଦ୍ୟାଶାଙ୍କୁ ମିଳିଛି ଇଣ୍ଡିଆ ବୁକ୍ ରେକର୍ଡ ସାର୍ଟିଫିକେଟ। ତାଙ୍କର ଅସାଧାରଣ ସ୍ମରଣଶକ୍ତି ପାଇଁ ଏହି ସାର୍ଟିଫିକେଟ ମିଳିଛି ବୋଲି ତାଙ୍କ ବାପା ଗଗନ କହିଛନ୍ତି। ଆଦ୍ୟାଶାଙ୍କ ଜନ୍ମ ୨୦୧୯ ଅଗଷ୍ଟ ୨୬ ରେ। ଏହି ୩ ବର୍ଷ ବୟସରେ ସେ ୪୫ ଗାଡ଼ିର ନାମ କହି ପାରୁଛନ୍ତି। ୫୩ ପ୍ରଜାତିର ପକ୍ଷୀଙ୍କ ନାମ କହିବା ସହ ଚିହ୍ନି ପାରୁଛନ୍ତି। ୪୭ ପ୍ରକାର ଫଳର ନାମ କହିବା ସହ ଚିହ୍ନଟ କରିପାରୁଛନ୍ତି। ୬୬ ପ୍ରାଣୀଙ୍କ ନାମ, ୧୫ ପ୍ରକାର ପରିବା, ୧୧ ପ୍ରକାର ଆକାର(ସ୍ପେସ୍), ଶରୀରର ୨୮ ଅଙ୍ଗ, ୭୩ଟି ଦେଶର ରାଜଧାନୀ ନାମ, ଭାରତର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ନାମ, ୭୧ ଶବ୍ଦର ପ୍ରତିଶବ୍ଦ, ୨୦ଟି ଦେଶର ଜାତୀୟ ପ୍ରତୀକର ନାମ, ୭୨ କବିତା ଆବୃତ୍ତି, ୮ଟି ଗ୍ରହର ନାମ, ୭ଟି ମହାଦୀପ ନାମ, ୫ଟି ମହାସାଗର ନାମ ଭଳି ଅନେକ ସାଧାରଣ ଜ୍ଞାନ ଅନର୍ଗଳ କହି ପାରୁଛନ୍ତି। ଏପରି ବିସ୍ମୟ ଶିଶୁଙ୍କ ଭବିଷ୍ୟତ ଉଜ୍ଜ୍ୱଳ ପାଇଁ ମା’ ବାପା ଓ ପିପିଏଲ ପରିବାର ନିଜକୁ ଭାଗ୍ୟବାନ ମନେ କରୁଛନ୍ତି ବୋଲି ଦର୍ଶାଇଛନ୍ତି। ଆଦ୍ୟାଶାଙ୍କ ପୈତୃକ ଗ୍ରାମ ଗଞ୍ଜାମ ଜିଲାରେ ବୋଲି ସୂଚନା ମିଳିଛି।