ଦୋହା,୧୬।୬: ସୁନୀଲ ଛେତ୍ରୀଙ୍କ ନେତୃତ୍ୱାଧୀନ ଭାରତୀୟ ଫୁଟ୍ବଲ ଦଳ ଏସିଆନ ଫୁଟ୍ବଲ କନ୍ଫେଡେରେଶନ (ଏଏଫ୍ସି) ଏସିଆନ କପ୍ କ୍ୱାଲିଫାୟର୍ସର ତୃତୀୟ ରାଉଣ୍ଡରେ ପ୍ରବେଶ କରିଛି। ସ୍ଥାନୀୟ ଜାସିମ ବିନ୍ ହମାଦ ଷ୍ଟାଡିୟମରେ ମଙ୍ଗଳବାର ୨୦୨୨ ଫିଫା ବିଶ୍ୱକପ୍ ତଥା ଏସିଆନ କପ୍ କ୍ୱାଲିଫାୟର୍ସରେ ଭାରତ ଓ ଆଫଗାନିସ୍ତାନ ମୁହଁାମୁହିଁ ହୋଇଥିଲେ। ତେବେ ଏହି ମ୍ୟାଚ୍ ୧-୧ ଗୋଲରେ ଅମୀମାଂସିତ ରହିଛି। ୭୫ତମ ମିନିଟ୍ରେ ଆଫଗାନିସ୍ତାନ ଗୋଲକିପର ଓଭାୟସ ଅଜିଜି ଆତ୍ମଘାତୀ ଗୋଲ ସ୍କୋର କରିବା ପରେ ଭାରତ ୧-୦ରେ ଅଗ୍ରଣୀ ହୋଇଥିଲା। ଏହାପରେ ୮୨ତମ ମିନିଟ୍ରେ ହୋସେନ ଜମାନୀ ଗୋଲ ଦେଇ ମ୍ୟାଚ୍କୁ ଅମୀମାଂସିତ ରଖିଥିଲେ। ଫିଫା ବିଶ୍ୱକପ୍ ଯୋଗ୍ୟତା ପର୍ଯ୍ୟାୟରୁ ବାଦ୍ ପଡିଥିଲେ ମଧ୍ୟ ଏହି ଡ୍ର ସହ ଭାରତ ଏସିଆନ୍ କପ୍ କ୍ୱାଲିଫାୟର୍ସର ତୃତୀୟ ରାଉଣ୍ଡରେ ପ୍ରବେଶ କରିଛି। ଏହି ମୁକାବିଲାରେ ଆଉ ମାତ୍ର ଗୋଟିଏ ସ୍କୋର କରିଥିଲେ ଛେତ୍ରୀ ବିଶ୍ୱର ସର୍ବକାଳୀନ ଟପ୍ ଗୋଲ ସ୍କୋରର ତାଲିକାରେ ସ୍ଥାନ ପାଇଥାନ୍ତେ। ୩୬ ବର୍ଷୀୟ ଛେତ୍ରୀ ୭୪ ଟି ଗୋଲ ସ୍କୋର କରିଛନ୍ତି। ମ୍ୟାଚ୍ ଡ୍ର ରଖି ଭାରତ ୭ ପଏଣ୍ଟ ପାଇ କାତାର, ଓମାନ ତଳକୁ ରହି ତୃତୀୟ ସ୍ଥାନ ଅଧିକାର କରିଛି।