ମାର୍ଗାଓ, ୧୬।୪(ପି.ଟି.)-ଭାରତର ପ୍ରଥମ ଦଳ ଭାବେ ଏଏଫ୍ସି ଚାମ୍ପିୟନ୍ସ ଲିଗ୍ର ଗ୍ରୁପ୍ ଷ୍ଟେଜ୍ ଖେଳିଥିବା ଏଫ୍ସି ଗୋଆ ନିଜ ଓପନିଂ ମ୍ୟାଚରେ ପ୍ରଶଂସନୀୟ ପ୍ରଦର୍ଶନ କରିଛି। ଫ୍ରେଞ୍ଚ୍ ବିଶ୍ୱକପ ବିଜେତା ଲୌରେଣ୍ଟ ବ୍ଲାଙ୍କ୍ଙ୍କ ପ୍ରଶିକ୍ଷଣପ୍ରାପ୍ତ କାତାରର ଅଲ୍-ରାୟାନ ସହିତ ବୁଧବାର ଅନୁଷ୍ଠିତ ମ୍ୟାଚକୁ ଗୋଲଶୂନ୍ୟ ଡ୍ର ରଖି ଗୋଆ ଉଲ୍ଲେଖନୀୟ ସଫଳତା ପାଇଛି। ଗୋଆର ପ୍ରଭାବୀ ପ୍ରଦର୍ଶନରେ ଚକିତ ହୋଇଥିଲେ ପୂର୍ବତନ ପ୍ୟାରିସ ସେଣ୍ଟ-ଜର୍ମନ ମ୍ୟାନେଜର ବ୍ଲାଙ୍କ୍। ଅଲ୍-ରାୟାନ ଆଧିପତ୍ୟ ବିସ୍ତାର କରିବାକୁ ଚେଷ୍ଟା କରିଥିଲେ ହେଁ ପୂରା ମ୍ୟାଚରେ ଗୋଆ ଦଳ ତାକୁ ପ୍ରତିହତ କରିବାରେ ସକ୍ଷମ ହୋଇଥିଲା। ଗୋଆର ଯୁବ ଗୋଲକିପର ଧୀରଜ ସିଂ ୮୭ତମ ମିନିଟରେ ଚମତ୍କାର ସେଭ୍ କରି ପ୍ରତିପକ୍ଷ ଦଳର ଆଶାରେ ପାଣିଭରି ଦେଇଥିଲେ। ଇଶାନ ପଣ୍ଡିତଙ୍କ ପ୍ରଦର୍ଶନ ମଧ୍ୟ ବହୁତ ଭଲ ରହିଥିଲା।
ଜବାହରଲାଲ ନେହେରୁ ଷ୍ଟାଡିୟମରେ ଆଶାନୁରୂପ ଅଲ୍-ଆୟାନ ଆରମ୍ଭରୁ ଆକ୍ରମଣାତ୍ମକ ଖେଳିଥିଲା। ୟାସିନେ ବ୍ରାହିମି ଆକ୍ରମଣର ନେତୃତ୍ୱ ନେଇଥିଲେ। ତେବେ ଗୋଆ ରକ୍ଷଣଭାଗ ଏହାର ସଫଳ ପ୍ରତିହତ କରିଥିଲା। ଏଫ୍ସି ଗୋଆର ଶୃଙ୍ଖଳିତ ଖେଳ ବିପକ୍ଷ ଦଳକୁ ନିରାଶ କରିଥିଲା। କୋଚ୍ ଜୁଆନ ଫେରାଣ୍ଡୋ ଦଳୀୟ ପ୍ରଦର୍ଶନରେ ବେଶ୍ ସନ୍ତୋଷ ପ୍ରକାଶ କରିଛନ୍ତି। ଏକ ପ୍ରିମିୟର ପ୍ରତିଯୋଗିତାରେ ଶକ୍ତିଶାଳୀ ଦଳ ବିପକ୍ଷରେ ସମକକ୍ଷ ପ୍ରଦର୍ଶନ କରି କ୍ଲିନ୍ ଶିଟ୍ ପାଇବା ବହୁତ ବଡ଼ କଥା। ୨୦୧୯-୨୦ ସିଜନରେ ଇଣ୍ଡିଆନ ସୁପରଲିଗ୍ (ଆଇଏସଏଲ) ବିଜେତା ଶିଲ୍ଡ ହାସଲ କରି ଏଫ୍ସି ଗୋଆ ୨୦୨୧ ଏଏଫ୍ସି ଚାମ୍ପିୟନ୍ସ ଲିଗ୍ ଗ୍ରୁପ୍ ଷ୍ଟେଜ୍ ପାଇଁ ଯୋଗ୍ୟତା ଅର୍ଜନ କରିଥିଲା। ଗ୍ରୁପ୍ ପର୍ଯ୍ୟାୟରେ ଅଲ୍-ରାୟାନ ବ୍ୟତୀତ ଗୋଆ ଅନ୍ୟତମ ଶକ୍ତିଶାଳୀ କ୍ଲବ ପେର୍ସେପୋଲିସ ଏଫ୍ସି (ଇରାନ) ଓ ଅଲ୍ ଓ୍ବାହଦା (ୟୁଏଇ)କୁ ଭେଟିବା କାର୍ଯ୍ୟକ୍ରମ ରହିଛି। ଗୋଆ ଶେଷଥର ପାଇଁ ଏକମାସ ପୂର୍ବରୁ ଆଇଏସ୍ଏଲ ପ୍ଲେ-ଅଫ୍ରେ ମୁମ୍ବାଇ ସିଟି ଏଫ୍ସି ବିପକ୍ଷରେ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ଫୁଟ୍ବଲ ଖେଳିଥିଲା। ଅନ୍ୟପକ୍ଷରେ ଅଲ୍-ଆୟାନ ଷ୍ଟାର୍ସ ଲିଗ୍ରେ ଏହାର ଶେଷ ମ୍ୟାଚ ଏପ୍ରିଲ ୯ରେ ଖେଳିଥିଲା।
