ଗୋଆ,୨୮।୪: ଚଳିତ ଏଏଫ୍ସି ଚାମ୍ପିୟନ୍ସ ଲିଗ୍ରେ ଏଫ୍ସି ଗୋଆ ଆଉ ଏକ ମ୍ୟାଚ୍ ଡ୍ର ରଖିଛି। ଫାଟୋର୍ଡାସ୍ଥିତ ଜବାହରଲାଲ ନେହରୁ ଷ୍ଟାଡିୟମରେ ସୋମବାର ଖେଳାଯାଇଥିବା କାତାର କ୍ଲବ ଅଲ୍ ରାୟାନ ବିପକ୍ଷ ମ୍ୟାଚ୍କୁ ଗୋଆ ୧-୧ ଗୋଲ୍ ବ୍ୟବଧାନରେ ଡ୍ର ରଖିଛି। ମ୍ୟାଚର ତୃତୀୟ ମିନିଟ୍ରେ ଜର୍ଜ ଓର୍ଟିଜ ମେଣ୍ଡୋଜା ଗୋଲ ସ୍କୋର କରି ଗୋଆକୁ ଅଗ୍ରଣୀ କରାଇଥିଲେ। ଗୋଆ ବିଜୟ ଆଡକୁ ଅଗ୍ରସର ହେଉଥିବା ବେଳେ ରାୟାନ ତରଫରୁ ଅଲି ଫେରିଡୁନ ଅନ୍ତିମ ମୁହୂର୍ତ୍ତରେ ଅର୍ଥାତ୍ ୮୯ତମ ମିନିଟ୍ରେ ଗୋଲ ଦେଇ ମ୍ୟାଚ୍କୁ ସମାନ ସ୍ତରକୁ ଆଣିଥିଲେ। ଶେଷରେ ମ୍ୟାଚ୍ ଅମୀମାଂସିତ ରହିଥିଲା। ଅଳ୍ପକେ ବିଜୟ ହାତଛଡ଼ା ହୋଇଥିବାରୁ ଗୋଆ ନିରାଶ ହୋଇଛି। ପ୍ରଥମ ଭାରତୀୟ କ୍ଲବ ଭାବେ ଗୋଆ ଏଏଫ୍ସି ଚାମ୍ପିୟନ୍ସ ଲିଗ୍ରେ କୌଣସି ମ୍ୟାଚ୍ ଜିତି ଇତିହାସ ସୃଷ୍ଟି କରିଥାନ୍ତା। ତେବେ ଗୋଆର ଏହି ଆଶା ଶେଷରେ ଧୂଳିସାତ୍ ହୋଇଛି। ଗୋଆ ଏବେ ତା’ର ଷଷ୍ଠ ତଥା ଅନ୍ତିମ ମ୍ୟାଚ୍ ୨୯ ତାରିଖ ଗୁରୁବାର ଅଲ ଓ୍ବାହଦା ବିପକ୍ଷରେ ଖେଳିବ।
ଏଥିସହ ଗ୍ରୁପ୍ ଇ’ରେ ଗୋଆ ୫ଟି ମ୍ୟାଚ୍ ଖେଳି ୩ ଡ୍ର ଓ ୨ ପରାଜୟ ସହ ୩ ପଏଣ୍ଟ ହାସଲ କରି ତୃତୀୟ ସ୍ଥାନରେ ରହିଛି। ସେହିପରି ରାୟାନ ୫ ମ୍ୟାଚ୍ ଖେଳି ୨ଡ୍ର ଓ ୩ ପରାଜୟ ସହ ୨ ପଏଣ୍ଟ ପାଇ ଚତୁର୍ଥ ସ୍ଥାନରେ ରହିଛି। ପେରପୋଲିସ୍ ୫ ମ୍ୟାଚ୍ ଖେଳି ୪ ବିଜୟ, ଗୋଟିଏ ଡ୍ର ସହ ୧୨ ପଏଣ୍ଟ ପାଇ ଟେବୁଲ ଶୀର୍ଷରେ ରହିଛି। ମ୍ୟାଚ୍ରେ ରାୟାନ ବଲ୍ ପଜେଶନ, ପାସ୍ ଓ ପାସ୍ ଆକ୍ୟୁରେସିରେ ଗୋଆଠାରୁ ଯଥେଷ୍ଟ ଆଗରେ ରହିଥିଲା। ଗୋଆ ମଧ୍ୟ ଲଢୁଆ ପ୍ରଦର୍ଶନ କରିଥିଲା। ଉଭୟ ଦଳ ଅବଶ୍ୟ କେତୋଟି ସୁଯୋଗ ହାତଛଡ଼ା କରିଥିଲେ।
