କାବୁଲ,୨୦।୮: ଆଫଗାନିସ୍ତାନ ଜାତୀୟ ଟିମ୍ର ଫୁଟବଲ ଖେଳାଳି ଜାକି ଅନଓ୍ବାରୀଙ୍କ ପରଲୋକ ଘଟିଛି। କାବୁଲ ବିମାନବନ୍ଦରରେ ଆମେରିକାର ଏକ ବିମାନରୁ ଖସି ପଡ଼ିବା ଯୋଗୁ ତାଙ୍କର ମୃତ୍ୟୁ ଘଟିଥିବା ନେଇ ସ୍ପଷ୍ଟ ହୋଇଛି।
ଜାକି ଆଫଗାନିସ୍ତାନର ଜଣେ ଯୁବ ଫୁଟବଲ ଖେଳାଳି ଥିଲେ। ଆମେରିକାର ସୈନ୍ୟ ବିମାନରୁ ଖସି ପଡ଼ିଥିଲେସେ। ସୋମବାର ତାଙ୍କର ମୃତ୍ୟୁ ଘଟିଥିବା ବେଳେ ଆଫଗାନ ରାଷ୍ଟ୍ରୀୟ ଫୁଟବଲ୍ ଟିମ୍ ପକ୍ଷରୁ ଏକ ଫେସବୁକ୍ ପୋଷ୍ଟ କରି ଏନେଇ ୧୮ ଅଗଷ୍ଟରେ ସୂଚନା ଦିଆଯାଇଛି।
କହିରଖୁଛୁ, ତାଲିବାନ କ୍ଷମତା ଦଖଲ ପରେ ହଜାର ହଜାର ସଂଖ୍ୟାରେ ଆଫଗାନିସ୍ତାନ ନାଗରିକ ଦେଶ ଛାଡ଼ି ଅନ୍ୟତ୍ର ଚାଲିଯିବାକୁ ଚାହୁଁଛନ୍ତି। ଏହି କ୍ରମରେ ସୋମବାର ହାମିଦ କରଜଇ ଅନ୍ତରାଷ୍ଟ୍ରୟ ବିମାନବନ୍ଦରରେ ଲୋକମାନେ ଏକତ୍ର ହୋଇଥିଲେ। ସେମାନଙ୍କ ମଧ୍ୟରେ ଜାକି ଥିଲେ। ବିମାନରେ ଚଢ଼ିବା ପାଇଁ ଧାଁ ଧଉଡ ଆରମ୍ଭ ହୋଇଥିଲା। ଏପରିକି ଲୋକମାନେ ବିମାନ ଚକ ଉପରେ ମଧ୍ୟ ବସି ଯାଉଥିଲେ। ବିମାନ ଉଡିବା ପରେ ଲୋକଙ୍କ ସନ୍ତୁଳନ ବିଗିଡ଼ି ଯାଇଥିଲା। ଫଳରେ ୩ ଜଣ ଲୋକ ଖସି ପଡ଼ିଥିଲେ। ସେମାନଙ୍କ ମୃତଦେହକୁ କିଛି କୋଠାର ଛାତରୁ ଉଦ୍ଧାର କରାଯାଇଥିଲା। ତେବେ ମୃତକଙ୍କ ମଧ୍ୟରେ ଜାକି ଥିବା ଜଣାପଡ଼ିଛି।