ନୂଆଦିଲ୍ଲୀ,୨୬ ।୮: ଆଫଗାନିସ୍ତାନରେ ତାଲିବାନ ଶାସନ ପରେ ଏବେ ଭାରତରେ ନିଶା କାରବାର ବଢିଯାଇ ପାରେ ବୋଲି ଆଶଙ୍କା କରାଯାଉଛି । ଏହାକୁ ଦେଖି ଭାରତୀୟ ଏଜେନ୍ସି ଏବେଠାରୁ ପ୍ରସ୍ତୁତ ହୋଇ ଗଲେଣି । ଏହାକୁ ଦୃଷ୍ଟିରେ ରଖି ସନ୍ଦେହ କରାଯାଉଥିବା ଜାହାଜ ଓ ନାବିକଙ୍କ ଡାଟା ରେକର୍ଡ କରାଯାଉଛି । ଏହାସହ ଡ୍ରଗ୍ସ ହଟସ୍ପଟ ଗୁଡିକୁ ବି ଚିହ୍ନଟ କରାଯାଉଛି । ଖୁବଶୀଘ୍ର ଦେଶର ବିଭିନ୍ନ ସ୍ଥାନରେ ବଡି ସ୍କାନର ଲଗାଇବାର ବ୍ୟବସ୍ଥା ବି କରାଯାଉଛି । ସେହିପରି ବାହାରୁ ଆସୁଥିବା ପାର୍ସଲ ଗୁଡିକ ପାଇଁ ନୂଆ ପାରାମିଟର ପ୍ରସ୍ତୁତ କରାଯାଇପାରେ ବୋଲି ଜଣାପଡିଛି । ସୂଚନାଯୋଗ୍ୟ, ତାଲିବାନର ଆୟର ମୁଖ୍ୟ ସ୍ରୋତ ହେଉଛି ମାଦକ ଦ୍ରବ୍ୟର ବ୍ୟବସାୟ । ସରକାରୀ ଡାଟା ସୂଚନା ଅନୁଯାୟୀ, ବିଶ୍ୱରେ ଅଫିମ ଯେତିକି ବ୍ୟବହାର କରାଯାଏ ଏହାର ୮୦ ପ୍ରତିଶତ ଆଫଗାନିସ୍ତାନରୁ ଆସିଥାଏ । ଆଫଗାନିସ୍ତାନରୁ ପାକିସ୍ତାନ ହୋଇ ଏହି ମାଦ ଦ୍ରବ୍ୟ ଗୁଡିକ ବିଶ୍ୱର ବିଭିନ୍ନ ଦେଶକୁ ଯାଇଥାଏ । ଭାରତ ଏହାର ଏକ ମୁଖ୍ୟ ରାସ୍ତା । ଏଜେନ୍ସିଙ୍କ ନିକଟରେ ଥିବା ସରକାରୀ ନକ୍ସାରୁ ଜଣାପଡୁଛି ମାଦକ ଦ୍ରବ୍ୟ କିପରି ଆଫଗାନିସ୍ତାନରୁ ପାକିସ୍ତାନ ଓ ଭାରତ ଦେଇ ବିଭିନ୍ନ ଦେଶକୁ ଯାଉଛି ।