ନୂଆଦିଲ୍ଲୀ,୩୦/୧୦: ଚଳିତ ଦିନିକିଆ ବିଶ୍ୱକପରେ ଯଦି କୌଣସି ଟିମ୍ ସବୁଠୁ ଆଶ୍ଚର୍ଯ୍ୟକର ଖେଳ ପ୍ରଦର୍ଶନ କରିଛି, ସେ ହେଉଛି ଆଫଗାନିସ୍ଥାନ। ଆତଙ୍କବାଦ ଏବଂ ବିଭିନ୍ନ ସମସ୍ୟା ଦେଇ ଗତି କରୁଥିବା ଆଫଗାନିସ୍ଥାନ କ୍ରିକେଟରେ କିନ୍ତୁ ଆଗକୁ ବଢି଼ବା ଜାରି ରଖିଛି। ସୋମବାର ପୁଣି ଆଫଗାନିସ୍ଥାନ ଟିମ୍ ଏକ ବିପର୍ଯ୍ୟୟ ସୃଷ୍ଟି କରି ୧୯୯୬ ମସିହାର ଚାମ୍ପିୟନ ଟିମ୍କୁ ପରାସ୍ତ କରିଛି।
ଏହି ମ୍ୟାଚରେ ଶ୍ରୀଲଙ୍କା ଟିମ୍ ୪୯.୩ ବଲରେ ୨୪୧ ରନର ବିଜୟ ଲକ୍ଷ୍ୟ ଆଫଗାନିସ୍ଥାନ ଆଗରେ ରଖିଥିଲା। ଜବାବରେ ଆଫଗାନିସ୍ଥାନ ୪୫.୨ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଏହା ସହିତ ଚଳିତ ବିଶ୍ୱକପରେ ଆଫଗାନିସ୍ଥାନ ତିନି ପୂର୍ବ ଚାମ୍ପିୟନକୁ ମାଟି କାମୁଡ଼ାଇ ସେମିଫାଇନାଲ ଅଭିମୁଖେ ଆଗେଇ ଚାଲିଛି।
ଏହା ପୂର୍ବରୁ, ଅକ୍ଟୋବର ୧୫ ରେ ଆଫଗାନିସ୍ତାନ ପ୍ରଥମେ ଚାମ୍ପିୟନ ଇଂଲଣ୍ଡକୁ ୬୯ ରନରେ ପରାସ୍ତ କରି କ୍ରିକେଟ୍ ଜଗତକୁ ସ୍ତବ୍ଧ କରିଦେଇଥିଲା। ଏହାପରେ ଅକ୍ଟୋବର ୨୩ ରେ ଆଫଗାନିସ୍ତାନ ପଡୋଶୀ ପାକିସ୍ତାନକୁ ୮ ୱିକେଟରେ ପରାସ୍ତ କରି ଉତ୍ତେଜନା ସୃଷ୍ଟି କରିଥିଲା। ଉଭୟ ଇଂଲଣ୍ଡ ଏବଂ ପାକିସ୍ତାନ ପୂର୍ବତନ ଚାମ୍ପିୟନ ହୋଇଛନ୍ତି। ୧୯୯୨ ମସିହାରେ ଇମ୍ରାନ ଖାନଙ୍କ ଅଧିନାୟକତ୍ୱରେ ପାକିସ୍ତାନ ବିଶ୍ୱକପ ଜିତିଥିବାବେଳେ ଇଂଲଣ୍ଡ ୨୦୧୯ ରେ ଚାମ୍ପିୟନ ହୋଇଥିଲା।
ବର୍ତ୍ତମାନ ଆଫଗାନିସ୍ତାନ ଆଉ ତିନଟାଇମଞ୍ଚ ଖେଳିବ। ତିନି ନଭେମ୍ବରରେ ନେଦରଲ୍ୟାଣ୍ଡ୍ସ, ୭ ଏବଂ ୧୦ ନଭେମ୍ବରରେ କ୍ରମଶଃ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକାକୁ ଭେଟିବ। ତେବେ ଏଠାରୁ ଆଫଗାନିସ୍ତାନର ରାସ୍ତ ସାମାନ୍ୟ କଠିନ ମନେହୁଏ। କାରଣ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକାକୁ ହରାଇବା ସହଜ ହେବ ନାହିଁ। କିନ୍ତୁ ସେମିଫାଇନାଲ କୌଣସି ବି ପରିସ୍ଥିତିରେ ଏହି ଦୁଇ ଦଳକୁ ହରାଇବାକୁ ପଡିବ।
ବର୍ତ୍ତମାନ ସୁଦ୍ଧା ଆଫଗାନିସ୍ଥାନ ୬ ମ୍ୟାଚ୍ରୁ ୩ ବିଜୟ ସହିତ ୬ ପଏଣ୍ଟ ହାସଲ କରିଛି। ତେବେ ଯଦି ଦଳ ଆଗାମୀ ୩ ମ୍ୟାଚ ଜିତିନିଏ ତେବେ ସେମିଫାଇନାଲ ରାସ୍ତା ସମ୍ପୂର୍ଣ୍ଣ ସହଜ ହୋଇଯିବ। ବର୍ତ୍ତମାନ ପଏଣ୍ଟ ଟେବୁଲ ଦେଖିଲେ ଭାରତ ବ୍ୟତୀତ ଅନ୍ୟ ଏସିଆ ଟିମ୍ ଆଫଗାନିସ୍ଥାନ ତଳେ ରହିଛନ୍ତି।