କାବୁଲ, ୪।୬ : ତାଲିବାନ ଆଫଗାନିସ୍ତାନ ଦଖଲ କରିବା ପରେ ଦେଶର ସ୍ଥିତି ଅସ୍ଥିର ଏବଂ ଦୁର୍ବଳ ରହିଛି। ଆଫଗାନିସ୍ତାନକୁ କ୍ଷୁଧା ଏବଂ ରୋଗର ସଙ୍କଟରୁ ରକ୍ଷା କରିବା ପାଇଁ ଭାରତ କ୍ରମାଗତ ଭାବରେ ଗହମ, ଚିକିତ୍ସା ସହାୟତା ଏବଂ ଟିକା ପଠାଉଛି। ଭାରତ ଏବଂ ଆଫଗାନିସ୍ତାନ ମଧ୍ୟରେ ଐତିହାସିକ ଏବଂ ସାଂସ୍କୃତିକ ସମ୍ପର୍କ ରହିଛି। ତାଲିବାନ ସରକାରରେ ପ୍ରତିରକ୍ଷା ମନ୍ତ୍ରୀ ତଥା ସଂଗଠନର ପ୍ରତିଷ୍ଠାତା ମଲ୍ଲିକ ମହମ୍ମଦ ଓମାରଙ୍କ ପୁଅ ମଲ୍ଲିକ ୟାକୁବ କହିଛନ୍ତି ଯେ ତାଲିବାନ ଭାରତ ସହ ସମ୍ପର୍କକୁ ମଜବୁତ କରିବାକୁ ଚାହୁଁଛି। ତାଲିମ ପାଇଁ ଆଫଗାନିସ୍ତାନ ସାମରିକ ବାହିନୀକୁ ଭାରତ ପଠାଇବାକୁ ସେ ଇଚ୍ଛା ପ୍ରକାଶ କରିଛନ୍ତି।
ଏକ ଭାରତୀୟ ଚ୍ୟାନେଲ ସହିତ ବାର୍ତ୍ତାଳାପ ସମୟରେ ମଲ୍ଲିକା ୟାକୁବଙ୍କୁ ପଚରାଯାଇଥିଲା ଯେ ଆଫଗାନିସ୍ତାନ ସୈନିକମାନଙ୍କୁ ଭାରତରେ ଦୀର୍ଘ ବର୍ଷ ଧରି ତାଲିମ ଦିଆଯାଉଛି। ଯଦି ସୁଯୋଗ ଦିଆଯାଏ, ତେବେ ଆପଣ ସୈନିକମାନଙ୍କୁ ଭାରତକୁ ପଠାଇବାକୁ ଚାହୁଁଛନ୍ତି କି? ଯାକୁବ ଉତ୍ତର ଦେଇଥିଲେ, ହଁ, ଆମର ଏଥିରେ କୌଣସି ଅସୁବିଧା ନାହିଁ। ଆଫଗାନିସ୍ତାନ-ଭାରତ ସମ୍ପର୍କକୁ ମଜବୁତ କରିବା ଲାଗି ଆବଶ୍ୟକ ଭିତ୍ତିଭୂମି ପ୍ରସ୍ତୁତ କରିବାକୁ ତାଲିବାନ ଚାହୁଁଛି ବୋଲି ସେ କହିଛନ୍ତି।
ତାଙ୍କୁ ପଚରାଯାଇଥିଲା ଯେ, ପୂର୍ବ ସରକାରର ଅନେକ ଆଫଗାନିସ୍ତାନ ସୈନିକ, ଯେଉଁମାନେ ଭାରତରେ ତାଲିମ ପାଇଁ ଆସିଥିଲେ ସେମାନେ ଆଫଗାନିସ୍ତାନକୁ ପେରି ନାହାନ୍ତି। ସେମାନେ ଭାରତରେ ଅଛନ୍ତି। ଯଦି ସେମାନେ ଫେରି ଯାଆନ୍ତି, ତେବେ ଆପଣ ପୁନର୍ବାର ସେମାନଙ୍କୁ ଆଫଗାନିସ୍ତାନ ସେନାରେ ସାମିଲ କରିବାକ ପ୍ରସ୍ତୁତ କି? ଏହାର ଉତ୍ତରରେ ୟାକୁବ କହିଛନ୍ତି, ’ଆମେ ଏ ବାବଦରେ ଅନେକ ପଦକ୍ଷେପ ନେଇଛୁ ଏବଂ ବିଦେଶରେ ଉପସ୍ଥିତ ଥିବା ସମସ୍ତ ଆଫଗାନିସ୍ତାନକୁ ଫେରିବା ପାଇଁ ଅନୁରୋଧ କରିଛୁ। ସେମାନଙ୍କ ମଧ୍ୟରୁ ଅନେକ ଫେରି ଆସି ନିଜର କର୍ତ୍ତବ୍ୟ ପାଳନ କରୁଛନ୍ତି। ଯେଉଁମାନେ ଭାରତ ରହିଛନ୍ତି, ଆମେ ସେମାନଙ୍କୁ ଫେରିବା ପାଇଁ ଅନୁରୋଧ କରୁଛୁ। କାହାକୁ ଛାଡି ନଦେବା ଏହା ଆଫଗାନିସ୍ତାନର ପରମ୍ପରା ଏବଂ ଆମେ ଏଥିପାଇଁ ପ୍ରତିଶ୍ରୁତିବଦ୍ଧ।
ସେ କହିଛନ୍ତି ଯେ ଭାରତ ପଠାଇଥିବା ସହାୟତାକୁ ଆମେ ପ୍ରଶଂସା କରୁଛୁ ଏବଂ ଏନେଇ କୃତଜ୍ଞତା ଜଣାଉଛୁ। ଆଫଗାନିସ୍ତାନର ଲୋକଙ୍କ ପାଇଁ ଭାରତ ଏହାର ସହାୟତା ଜାରି ରଖିବ ବୋଲି ଆମେ ଆଶା କରୁଛୁ। ପାକିସ୍ତାନ ସହ ବର୍ତ୍ତମାନର ପ୍ରତିରକ୍ଷା ସମ୍ପର୍କକୁ ନେଇ ୟାକୁବ କହିଛନ୍ତି ଯେ କୂଟନୈତିକ ଏବଂ ରାଜନୈତିକ ସମ୍ପର୍କ ସ୍ଥାପନ ହେଲେ ହିଁ ପ୍ରତିରକ୍ଷା ସମ୍ପର୍କ ଆରମ୍ଭ ହୋଇପାରିବ। ଆମେ ସମସ୍ତ ଦେଶ ସହିତ ଆନ୍ତରିକ ସମ୍ପର୍କକୁ ଅପେକ୍ଷା କରିଛୁ କିନ୍ତୁ ଏପର୍ଯ୍ୟନ୍ତ ପ୍ରତିରକ୍ଷା ସମ୍ପର୍କରେ ଅଧିକ ଅଗ୍ରଗତି ହୋଇନାହିଁ।