ଲଣ୍ଡନ,୫ା୧୨: ସହେଲ ଅଞ୍ଚଳରେ ସ୍ଥିରତା ଆଣିବା ପାଇଁ ଜାତିସଂଘର ୧୫,୦୦୦ ବହୁରାଷ୍ଟ୍ରୀୟ ସୈନ୍ୟଙ୍କ ନେତୃତ୍ୱ ନେଉଛି ଫ୍ରାନ୍ସ। ଅପରେଶନ ନ୍ୟୁକମ୍ବେ ନାମରେ ଚାଲିଥିବା ଏହି ୩ ବର୍ଷିଆ ମିଶନରେ ବ୍ରିଟେନର ୩୦୦ ସୈନ୍ୟ ସାମିଲ ହୋଇଛନ୍ତି। ମାଲି ହେଉଛି ଅନେକ ସହେଲ ରାଷ୍ଟ୍ର ମଧ୍ୟରୁ ଅନ୍ୟତମ, ଯେଉଁଠି ଜେହାଦୀ ବିଦ୍ରୋହୀଙ୍କ ପ୍ରାଦୁର୍ଭାବ ବଢ଼ିବା ସହ ସ୍ଥିତି ସଙ୍ଗିନ ହେବାରେ ଲାଗିଛି। ନଭେମ୍ବର ୨୫ରେ ପ୍ରକାଶିତ ବୈଶ୍ୱିକ ଆତଙ୍କବାଦ ସୂଚକାଙ୍କ ଅନୁସାରେ ଇସ୍ଲାମିକ୍ ଷ୍ଟେଟ୍ର କେନ୍ଦ୍ରସ୍ଥଳ ମଧ୍ୟପ୍ରାଚ୍ୟରୁ ଆଫ୍ରିକା ଓ ଦକ୍ଷିଣ ଏସିଆର କେତେକ ଅଞ୍ଚଳକୁ ସ୍ଥାନାନ୍ତର ହେବାରେ ଲାଗିଛି। ଗତବର୍ଷ ଉପସାହାରୀୟ ଆଫ୍ରିକାରେ ଆଇଏସ୍ ପକ୍ଷରୁ କରାଯାଇଥିବା ନରସଂହାର ୬୭% ବଢ଼ିଛି। ଏହି ଅଞ୍ଚଳରେ ଆଇଏସ୍ର ପ୍ରଭାବ ବିସ୍ତାର ସମ୍ପୃକ୍ତ କ୍ଷେତ୍ରର ଅନେକ ଦେଶରେ ଆତଙ୍କବାଦ ବୃଦ୍ଧିର କାରଣ ପାଲଟିଥିବା ଗ୍ଲୋବାଲ ଟେରରିଜମ୍ ଇଣ୍ଡେକ୍ସରେ ଦର୍ଶାଯାଇଛି। ଉପସାହାରୀୟ ଆଫ୍ରିକାର ୧୦ ଦେଶ ମଧ୍ୟରୁ ୭ ରାଷ୍ଟ୍ର ବୁର୍କିନା ଫାସୋ, ମୋଜାମ୍ବିକ୍, ଡିଆର୍ସି, ମାଲି, ନାଇଜର, କ୍ୟାମେରୁନ ଓ ଇଥିଓପିଆରେ ସବୁଠୁ ବେଶି ଆତଙ୍କବାଦ ମୁଣ୍ଡ ଟେକିଛି। ଏଥିରେ ଆହୁରି ଦର୍ଶାଯାଇଛି ଯେ, ୨୦୧୯ରେ ଏହି ଦେଶଗୁଡ଼ିକରେ ଆଇଏସ୍ ଆତଙ୍କବାଦଜନିତ ମୃତ୍ୟୁ ସଂଖ୍ୟା ୯୮୨ ଥିଲା, ଯାହାକି ମୋଟ ମୃତ୍ୟୁସଂଖ୍ୟାର ୪୧%।
ମୃତ ନେତା ଓସାମା ବିନ୍ ଲାଡେନ ୧୯୯୬ରେ ଆଫଗାନିସ୍ତାନରେ ଅଭିଯାନ ପୂର୍ବରୁ ସୁଡାନକୁ ଆତଙ୍କର ଚରାଭୂଇଁ ଭାବେ ବାଛିଥିଲେ। ୨୦୧୦ରେ ବୋକୋ ହାରାମକୁ ଆତଙ୍କବାଦୀ ସଙ୍ଗଠନ ଘୋଷଣା କରାଯିବା ପରେ ଏହି ଗୋଷ୍ଠୀ ୨୦୧୪ରେ ନାଇଜେରିଆର ଚିବୋକ୍ରେ ଶତାଧିକ ସ୍କୁଲ ଛାତ୍ରୀଙ୍କୁ ଅପହରଣ କରିଥିଲା। ସାମ୍ପ୍ରତିକ ସମୟରେ ଜେହାଦୀ ଗୋଷ୍ଠୀଗୁଡ଼ିକ ମଧ୍ୟରେ ଆତଙ୍କବାଦର ବିସ୍ତାର ନେଇ ପ୍ରତିଦ୍ୱନ୍ଦ୍ୱିତା ବଢ଼ିବାରେ ଲାଗିଛି। ଆମେରିକାର ପରରାଷ୍ଟ୍ର ବିଭାଗର ଆତଙ୍କବାଦ ନିରୋଧୀ କୋଅର୍ଡିନେଟର ତଥା ଆମ୍ବାସାଡର ନାଥନ୍ ସେଲ୍ସଙ୍କ ମତରେ ଉଭୟ ଆଇଏସ୍ ଏବଂ ଅଲ୍-କାଏଦା ସେମାନଙ୍କ ଅଧିକାଂଶ ଅପରେଶନକୁ ସିରିଆ ଓ ଇରାକ୍ରୁ ପଶ୍ଚିମ ଓ ପୂର୍ବ ଆଫ୍ରିକାକୁ ସ୍ଥାନାନ୍ତର କରିଛନ୍ତି। ଫଳରେ ଆଫ୍ରିକା ପାଇଁ ଆତଙ୍କବାଦ ଏକ ବଡ଼ ଚ୍ୟାଲେଞ୍ଜ ଭାବେ ଉଭା ହୋଇଛି। ଫରାସୀ ବିଶେଷଜ୍ଞ ଓଲିଭିଏର୍ ଗୁଇଟା ଏହାକୁ ଲକ୍ଷ୍ୟକରି ଭବିଷ୍ୟବାଣୀ କରିଛନ୍ତି ଯେ, ଆଗାମୀ ୨୦ ବର୍ଷ ଧରି ଆଫ୍ରିକା ମଧ୍ୟପ୍ରାଚ୍ୟର ସ୍ଥାନ ନେବାକୁ ଯାଉଛି। ବାସ୍ତବରେ ଏହି ମହାଦେଶ ଜେହାଦୀଙ୍କ ଯୁଦ୍ଧଭୂମିରେ ପରିଣତ ହେବାକୁ ଯାଉଛି।