କରାଚୀ,୧୩।୨: ପୂର୍ବତନ ପାକିସ୍ତାନ ଅଧିନାୟକ ଶାହିଦ ଆଫ୍ରିଦୀ ପାକିସ୍ତାନ ସୁପର ଲିଗ୍ (ପିଏସ୍ଏଲ୍)ରୁ ରବିବାର ସନ୍ନ୍ୟାସ ନେଇଛନ୍ତି। ଅଣ୍ଟା ଜନିତ ଆହତ ସମସ୍ୟା ଯୋଗୁ ସିଜିନ ମଝିରେ ଏଭଳି ନିଷ୍ପତ୍ତି ନେଇଥିବା କହିଛନ୍ତି ଭେଟେରାନ ଅଲରାଉଣ୍ଡର। ଏଥିସହିତ କେବଳ ପ୍ରଶଂସକଙ୍କ ପାଇଁ ଚଳିତ ପିଏସ୍ଏଲରେ ଅଂଶଗ୍ରହଣ କରିବାକୁ ନିଷ୍ପତ୍ତି ନେଇଥିଲେ ବୋଲି ସେ କହିଛନ୍ତି।
୬ ବର୍ଷ ତଳେ ଅନ୍ତର୍ଜାତୀୟ କ୍ରିକେଟକୁ ଅଲବିଦା କରିଥିବା ଆଫ୍ରିଦୀ ଟ୍ରେନିଂ ସେସନ ବେଳେ ଆହତ ହୋଇଥିଲେ। ଏହାବାଦ୍ ତାଙ୍କ କୋଭିଡ୍-୧୯ ରିପୋର୍ଟ ପଜିଟିଭ ଆସିଛି। ଗତ ରବିବାର କୁଏଟା ଗ୍ଲାଡିଏଟର୍ସ ପାଇଁ ଇସଲମାବାଦ୍ ୟୁନାଇଟେଡ୍ ବିପକ୍ଷରେ ସେ ଅନ୍ତିମ ପିଏସ୍ଏଲ ମ୍ୟାଚ୍ ଖେଳିଥିଲେ।
“ଗତ ୧୫-୧୬ ବର୍ଷ ହେଲା ମୁଁ ଅଣ୍ଟା ଜନିତ ସମସ୍ୟା ଦେଇ ଗତି କରୁଛି। ଏହା ସତ୍ତ୍ୱେ ମୁଁ ଖେଳୁଛି। କିନ୍ତୁ ବର୍ତ୍ତମାନ ସମସ୍ୟା ଏତେ ବଢ଼ି ଗଲାଣି ଯେ, ଏହା ମୋ ଜଙ୍ଘ, ଆଣ୍ଠୁକୁ ପ୍ରଭାବିତ କଲାଣି। ଏଣୁ ଗୋଇଠିରେ ମଧ୍ୟ ଯନ୍ତ୍ରଣା ହେଉଛି। ଆଉ ଏହାକୁ ସହ୍ୟ କରିପାରୁ ନାହିଁ” ବୋଲି ଆଫ୍ରିଦୀ କହିଛନ୍ତି। ଉଲ୍ଲେଖଯୋଗ୍ୟ, ୪୧ ବର୍ଷୀୟ କ୍ରିକେଟର ଅନ୍ତର୍ଜାତୀୟ ସ୍ତରରେ ୨୭ ଟେଷ୍ଟ, ୩୯୮ ଦିନିକିଆ, ୯୯ ଟି୨୦ ମ୍ୟାଚ୍ ଖେଳିଥିଲେ। ସେଥିରୁ ଯଥାକ୍ରମେ ୪୮, ୩୯୫, ୯୮ ଉଇକେଟ ନେବା ସହ ପ୍ରାୟ ୨୩ ହଜାର ରନ୍ ସଂଗ୍ରହ କରିଥିଲେ।
