ନୂଆଦିଲ୍ଲୀ,୮।୨: ଲିଭ୍-ଇନ୍ ପାର୍ଟନର ଶ୍ରଦ୍ଧା ଓ୍ବାଲ୍କରଙ୍କୁ ହତ୍ୟାକରି ଶରୀରକୁ ଖଣ୍ଡ ଖଣ୍ଡ କରିବା ପରେ ଅଭିଯୁକ୍ତ ଆଫତାବ ପୁନାଓ୍ବାଲା ସେଗୁଡ଼ିକୁ ଫିଙ୍ଗିବା ପୂର୍ବରୁ ଅସ୍ଥିଗୁଡ଼ିକୁ ଗୁଣ୍ଡ କରିଦେଇଥିଲେ। ଏଥିପାଇଁ ସେ ମାର୍ବଲ କଟିଂ ଓ ଗ୍ରାଇଣ୍ଡିଂ ମେଶିନ୍ ବ୍ୟବହାର କରିଥିଲେ ବୋଲି ଦିଲ୍ଲୀ ପୋଲିସ କୋର୍ଟରେ ଦାଖଲ କରିଥିବା ୬,୬୦୦ ପୃଷ୍ଠାର ଚାର୍ଜଶିଟ୍ରେ କୁହାଯାଇଛି। ଗତବର୍ଷ ମେ’ ୧୮ରେ ଶ୍ରଦ୍ଧାଙ୍କୁ ହତ୍ୟା କରିବା ପରେ ଆଫତାବ ଜମାଟୋରୁ ଚିକେନ୍ ରୋଲ ମଗାଇ ଖାଇଥିଲେ। ଶ୍ରଦ୍ଧା ଓ ଆଫତାବ ମେ’ରେ ଦିଲ୍ଲୀ ଯାଇଥିଲେ। ତେବେ ଆଫତାବଙ୍କର ଏକାଧିକ ଗର୍ଲଫ୍ରେଣ୍ଡ ଏବଂ ଅତ୍ୟଧିକ ବ୍ୟୟକୁ ନେଇ ସେମାନଙ୍କ ମଧ୍ୟରେ ଅନେକ ସମୟରେ ବଚସା ହେଉଥିଲା ବୋଲି ଚାର୍ଜଶିଟ୍ରେ କୁହାଯାଇଛି। ମେ’ ୧୮ରେ ସେମାନେ ମୁମ୍ବାଇ ଯିବାକୁ ଯୋଜନା କରିଥିଲେ। ହଠାତ ଆଫତାବ ଟିକେଟ ବାତିଲ କରିଦେବାରୁ ସେମାନଙ୍କ ମଧ୍ୟ ଝଗଡ଼ା ହୋଇଥିଲା ଏବଂ ଉତ୍ତ୍ୟକ୍ତ ହୋଇ ଆଫତାବ ଶ୍ରଦ୍ଧାଙ୍କ ତଣ୍ଟି ଚିପି ହତ୍ୟା କରିଥିଲେ। ହତ୍ୟା ପରେ ମୃତଦେହକୁ ଏକ ପ୍ଲାଷ୍ଟିକ୍ ବ୍ୟାଗ୍ରେ ଭର୍ତ୍ତିକରି ଫିଙ୍ଗିଦେବାକୁ ଅଭିଯୁକ୍ତ ଚିନ୍ତା କରିଥିଲେ। ଏପରି ହେଲେ ଶୀଘ୍ର ଧରାପଡ଼ିଯିବା ଆଶଙ୍କା କରି ସେ ଶରୀରକୁ ଖଣ୍ଡଖଣ୍ଡ କରିବା ପାଇଁ କରତ, ହାତୁଡ଼ି ଓ ୩ଟି ଛୁରି କିଣିଥିଲେ। ସେ ଆଙ୍ଗୁଠିଗୁଡ଼ିକୁ ଅଲଗା କରିବା ପାଇଁ ବ୍ଲୋଟର୍ଚ୍ଚ ବ୍ୟବହାର କରିଥିଲେ। ଶ୍ରଦ୍ଧାଙ୍କ ଶରୀରକୁ ୩୫ ଖଣ୍ଡ କରିବା ପରେ ଆଫତାବ ସେଗୁଡ଼ିକୁ ଫ୍ରିଜ୍ରେ ରଖିଥିଲେ। ଗର୍ଲଫ୍ରେଣ୍ଡମାନେ ଆସିବାକୁ ଥିଲେ ଆଫତାବ ଉକ୍ତ ଖଣ୍ଡଗୁଡ଼ିକୁ କିଚେନ୍କୁ ନେଇଯାଉଥିଲେ ବୋଲି ଚାର୍ଜଶିଟ୍ରେ ଉଲ୍ଲେଖ କରାଯାଇଛି।