ଭୁବନେଶ୍ୱର, ୨୬ା୧୦(ବ୍ୟୁରୋ): ଚଳିତ ବର୍ଷର ଶେଷ ସୂର୍ଯ୍ୟୋପରାଗ ମଙ୍ଗଳବାର ଦୃଶ୍ୟମାନ ହୋଇଛି। ଏହା ଏସିଆ ଓ ୟୁରୋପରେ ଦୃଶ୍ୟମାନ ହୋଇଥିଲା। ୟୁରୋପ ମହାଦେଶରେ ଏହା ଅଧିକ ମାତ୍ରାରେ ଦୃଶ୍ୟମାନ ହୋଇଥିବାବେଳେ ଏସିଆରେ ଆଂଶିକ ଭାବେ ଦେଖାଯାଇଛି। ଓଡ଼ିଶାରେ ମଧ୍ୟ ଆଂଶିକ ସୂର୍ଯ୍ୟୋପରାଗ
ସ୍ପଷ୍ଟ ଭାବେ ଦୃଶ୍ୟମାନ ହୋଇଛି। ଗୋଟିଏ ସରଳରେଖାରେ ସୂର୍ଯ୍ୟ, ଚନ୍ଦ୍ର ଓ ପୃଥିବୀ ଥିବାବେଳେ ଚନ୍ଦ୍ରର ଛାଇ ପୃଥିବୀର ଯେଉଁ ସବୁ ଅଞ୍ଚଳରେ ପଡ଼ିଛି, ସେଠାରେ ସୂର୍ଯ୍ୟୋପରାଗ ଦେଖାଯାଇଛି। ୟୁରୋପ ମହାଦେଶରେ ପ୍ରଥମେ ଅପରାହ୍ନ ୨ଟା ୨୮ ମିନିଟ୍ରେ ପରାଗ ଆରମ୍ଭ ହୋଇଥିଲା। ଭାରତରେ ଅପରାହ୍ନ ୪ଟା ୨୯ ମିନିଟ୍ରୁ ପରାଗ ଆରମ୍ଭ ହୋଇଥିଲା ଏବଂ ସର୍ବାଧିକ ସମୟ ଧରି ଦୃଶ୍ୟମାନ ହୋଇଥିଲା। ଲେହରେ ୫୫ ପ୍ରତିଶତ ସୂର୍ଯ୍ୟ ଘୋଡ଼େଇ ହୋଇଥିବାବେଳେ ଦିଲ୍ଲୀ, ନୋଏଡା, ଅମୃତସର, କୋଲକାତା ଭଳି ସ୍ଥାନରେ ଆଂଶିକ ସୂର୍ଯ୍ୟୋପରାଗ ଦେଖାଯାଇଛି। ଭୁବନେଶ୍ୱରରେ ଅପରାହ୍ନ ୪ଟା ୫୬ରୁ ୫ଟା ୧୬ ପର୍ଯ୍ୟନ୍ତ ପ୍ରାୟ ୨୦ ମିନିଟ୍ ପାଇଁ ସୂର୍ଯ୍ୟୋପରାଗ ଦେଖାଯାଇଥିଲା। ସୂର୍ଯ୍ୟର ମାତ୍ର ୧୦ରୁ ୧୫ ପ୍ରତିଶତ ଅଂଶ ଘୋଡ଼େଇ ହୋଇଥିଲା। ସେହିପରି ପୁରୀ ସମେତ ରାଜ୍ୟର ଅନ୍ୟାନ୍ୟ ସ୍ଥାନରେ ମଧ୍ୟ ସୂର୍ଯ୍ୟୋପରାଗ ଦେଖିବାକୁ ମିଳିଥିଲା। ଓଡ଼ିଶାରେ ସନ୍ଧ୍ୟା ୬ଟା ୨୬ ମିନିଟ୍ରେ ପରାଗ ଶେଷ ହୋଇଥିଲା। ସନ୍ଧ୍ୟା ହୋଇଯାଇଥିବାରୁ ପରାଗ ଛାଡ଼ିଥିଲେ ମଧ୍ୟ ଘରେ ରୋଷେଇକୁ ବାରଣ କରାଯାଇଥିଲା। ବୁଧବାର ସକାଳେ ଲୋକେ ସୂର୍ଯ୍ୟ ଦର୍ଶନ କରିବା ପରେ ଘର ଧୁଆଧୋଇ ସହ ସ୍ନାନ ସାରି ଠାକୁର ପୂଜା କରିବେ ବୋଲି ଜଣାପଡ଼ିଛି।
ସେପଟେ ପରାଗ ସ୍ପର୍ଶର ୧୨ଘଣ୍ଟା ପୂର୍ବରୁ ଲୋକେ ପାକତ୍ୟାଗ ଓ ଦେବ ନୀତି ନିଷେଧ କରିଥିଲେ। ଅର୍ଥାତ୍ ମଙ୍ଗଳବାର ଭୋର ୪ଟା ୫୬ରୁ ପାକତ୍ୟାଗ ହୋଇଥିଲା। ଲୋକେ ଏହାକୁ ବିଶ୍ୱାସର ସହ ପାଳିଥିଲେ। ଦେବଦେବୀ ପୂଜା ନିଷେଧ ହୋଇଥିବାରୁ ରାତିରୁ ଉଠି ଲୋକେ ଠାକୁର ପୂଜା ମଧ୍ୟ ସାରିଥିଲେ। ପବିତ୍ର କାର୍ତ୍ତିକ ମାସ ଚାଲୁଥିବାରୁ ହବିଷିଆଳିମାନେ ରାତି ୨ଟାରୁ ଗାଧୋଇ ଠାକୁର ପୂଜା ଶେଷ କରି ମନ୍ଦିର ଯାଇ ପୂଜାର୍ଚ୍ଚନା କରିଥିଲେ। ଅପରପକ୍ଷେ ଘରେ ରୋଷେଇ ବନ୍ଦ ରହିଥିବାରୁ ଅନେକ ଲୋକ ବାହାରେ ଶୁଖିଲା ଖାଦ୍ୟ କିଣି ଖାଉଥିବା ଦେଖିବାକୁ ମିଳିଥିଲା।
