ପଟ୍ଟାଙ୍ଗି,୨୦।୧୨(ଡି.ଏନ୍.ଏ.): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ସଦର ମହକୁମାଠାରୁ ୨କିମି ଦୂରରେ ଏକ ଗ୍ୟାସ ଟ୍ୟାଙ୍କର ଦୁର୍ଘଟଣା ଗ୍ରସ୍ତହୋଇ ପଡି ରହିଥିଲା। ଘଟଣାର ୩ ଦିନ ପରେ ଟ୍ୟାଙ୍କରରୁ ୯୭ ପ୍ରତଶତ ଗ୍ୟାସ କାଢିବା ପରେ ମଙ୍ଗଳବାର ସକାଳୁ ରାଜପଥରେ ଗାଡି ଚଳାଚଳ ଆରମ୍ଭ ହୋଇଛି। ମଧ୍ୟାହ୍ନ ୧୨ଟା ପରେ ଭାରି ଯାନ ଚଳାଚଳ ସ୍ବାଭାବିକ ହେବ ବୋଲି ସୂଚନା ମିଳିଛି।
ମିଳିଥିବା ସୂଚନା ମୁତାବକ, ଶନିବାର ଭୋରରେ ବିଶାଖାପାଟଣାରୁ ରାୟପୁର ଯାଉଥିବା ଏକ ଗ୍ୟାସ ଟ୍ୟାଙ୍କର ଭାରସାମ୍ୟ ହରାଇ ରାଜପଥରେ ଦୁର୍ଘଟଣା ଗ୍ରସ୍ତହୋଇ ଓଲଟି ପଡିଥିଲା। ଫଳରେ ଟ୍ୟାଙ୍କରରୁ ଗ୍ୟାସ ଲିକ୍ ହେବାରୁ ଦୁର୍ଘଟଣାସ୍ଥାନ ଦେଇ ଗାଡ଼ି ଚଳାଚଳ ବନ୍ଦ କରାଯାଇଥିଲା । ରବିବାର ସକାଳୁ କମ୍ପାନୀ କର୍ମଚାରୀ ଗ୍ୟାସ ଖାଲି କରିବାକୁ ଉଦ୍ୟମ ଆରମ୍ଭ କରିଥିଲେ। ହେଲେ ଧୀମା କାର୍ଯ୍ୟ ଯୋଗୁ ଟ୍ୟାଙ୍କରରୁ ଗ୍ୟାସ ଖାଲି କରିବା ବିଳମ୍ବ ହୋଇଥିଲା। ବହୁ କଷ୍ଟରେ ୯୭ ପ୍ରତିଶତ ଗ୍ୟାସ ଟ୍ୟାଙ୍କରରୁ ଖାଳି କରାଯାଇଛି। ଟ୍ୟାଙ୍କରରେ ଏବେ ବି ୩ ପ୍ରତିଶତ ଗ୍ୟାସ ଥିବା ବେଳେ ମଙ୍ଗଳବାର ଭୋରରୁ ଅଗ୍ନିଶମ ବିଭାଗ ଟ୍ୟାଙ୍କର ଉପରେ ପାଣି ମାରି ସମ୍ପୂର୍ଣ୍ଣ ଗ୍ୟାସ ଖାଲି କରିବାକୁ ଉଦ୍ୟମ ଚଳାଇଛି।
ଅନ୍ୟପକ୍ଷେ ଦୁଇ ରାଜ୍ୟ ଛତିଶଗଡ଼-ଆନ୍ଧ୍ର ପ୍ରଦେଶକୁ ଯାତାୟତ କରୁଥିବା ଗାଡ଼ିକୁ ଦୁର୍ଘଟଣା
ସ୍ଥଳଦେଇ ଯିବାକୁ ବାରଣ କରାଯାଇଥିଲା। ଏଭଳି ସ୍ଥିତିରେ ସୋମବାର ନାଲକୋ କମ୍ପାନୀର ଏକ ବସ୍କୁ ଦୁର୍ଘଟଣା ସ୍ଥଳଦେଇ ଆନ୍ଧ୍ରପ୍ରଦେଶ ଅଭିମୁଖେ ଛଡାଯାଇଥିବାରୁ ୩ ଦିନ ଧରି ଅଟକି ରହିଥିବା ମାଲବାହୀ ଟ୍ରକ ଡ୍ରାଇଭରଙ୍କ ସମେତ ଯାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିଲା।