ପୁରୁଷୋତ୍ତମପୁର,୬।୧୧ (ସିମାଞ୍ଚଳ ମିଶ୍ର): ଭଗବାନଙ୍କଠାରୁ ମଧ୍ୟ ଲୁଟିନେବାକୁ ଚୋରମାନେ ପଛାଉ ନାହାନ୍ତି। ଏଭଳି ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲାର ପ୍ରସିଦ୍ଧ ଇଷ୍ଟଦେବୀ ମା’ ତାରାତାରିଣୀଙ୍କ ପୀଠରେ। ଏହି ଚୋରି ଯୋଗୁ ମା’ଙ୍କ ନିତିକାନ୍ତିରେ ଦୁଇ ଘଣ୍ଟାରୁ ଉର୍ଦ୍ଧ୍ୱ ସମୟ ବିଳମ୍ବ ଘଟିଛି। ମଙ୍ଗଳବାର ବିଳମ୍ବିତ ରାତିରେ ମା’ଙ୍କ ଅଳଙ୍କାର ଓ ଟଙ୍କାକୁ ଚୋରମାନେ ନେଇଯାଇଛନ୍ତି। ଏଠାରେ ଏହା ଦ୍ୱିତୀୟ ଘଟଣା ପାଲଟିଛି।
୧୯୯୪ରେ ମା’ଙ୍କ ପୁରୁଣା ମନ୍ଦିର ଥିବା ସମୟରେ ଏଭଳି ଚୋରି ହୋଇଥିବା ବେଳେ ପୁଣି ଦୀର୍ଘ ୩୦ ବର୍ଷପରେ ତାହାର ପୁନରାବୃତ୍ତି ଘଟିଛି। ସେହି ସମୟରେ ଦୁର୍ବୃତ୍ତମାନେ ମା’ଙ୍କ ଚଳନ୍ତି ପ୍ରତିମାକୁ ଚୋରାଇ ନେଇଥିବା ବେଳେ ବର୍ତ୍ତମାନ ମା’ଙ୍କ ରୁପାର କିରଟି, ମୂଖା, ଛତା ଆଦି ଅଳଙ୍କାର ସହ ହୁଣ୍ଡିକୁ ଭାଙ୍ଗି ସେଥି ମଧ୍ୟରେ ଥିବା ଭକ୍ତଙ୍କ ଲକ୍ଷାଧିକ ଦାନ ଟଙ୍କାକୁ ମଧ୍ୟ ନେଇଯାଇଛନ୍ତି। ଦୁର୍ବୃତ୍ତମାନେ ଗେଟର ତାଲା ଭାଙ୍ଗିବା ସହ ଗର୍ଭଗୃହକୁ ଯିବା ନିମନ୍ତେ ରହିଥିବା ତିନୋଟି କବାଟର ତାଲାକୁ ଭାଙ୍ଗି ମନ୍ଦିରରେ ପ୍ରବେଶକରି ଗର୍ଭଗୃହରେ ରହିଥିବା ମା’ଙ୍କ ରୂପାର କିରଟି, ମୂଖା, ଛତାକୁ ଚୋରାଇ ନେଇଛନ୍ତି।
ବୁଧବାର ସକାଳୁ ମା’ଙ୍କ ପୂଜାପାଠ ଲାଗି ଆସିଥିବା ସେବାୟତ ଏହା ଦେଖି ଅନ୍ୟ ସେବାୟତମାନଙ୍କୁ ଜଣାଇଥିଲେ। ଏହାର ଖବରପାଇ ପୁରୁଷୋତ୍ତମପୁର ତହସିଲଦାର ବିନୋଦକୁମାର ବେହେରା,ଏସଡିପିଓ ରଜନିକାନ୍ତ ସାମଲ, ମନ୍ଦିର ନିର୍ବାହୀ ଅଧିକାରୀ ଟିକେ ରେଡି ଘଟଣାସ୍ଥଳକୁ ଆସି ପରିସ୍ଥିତିିକୁ ଦେଖି ସେବାୟତମାନଙ୍କ ସହ ଆଲୋଚନା କରିଛନ୍ତି। ମନ୍ଦିର ଚତୁଃପାର୍ଶର ପାରିପାର୍ଶ୍ୱିକ ସ୍ଥତତିକୁ ପରକ୍ଷିବା ସହ ସାଇଣ୍ଟିଫିକ ଟିମ ଓ ସନ୍ଧାନୀ କକୁର ସହାୟତାରେ ପୋଲିସ ପକ୍ଷରୁ ତଦନ୍ତ କରିବାରେ ଲାଗିଛନ୍ତି।
ମନ୍ଦିର ପରିସରରେ ସୁରକ୍ଷା ବ୍ୟବସ୍ଥା ନ ଥିବା ବେଳେ ସଠିକ ଭାବରେ ଆଲୋକିକରଣର ବ୍ୟବସ୍ଥା ନାହିଁ। ସିସିଟିଭି ଥାଇ ମଧ୍ୟ କାମ କରୁନି। ଫଳରେ ଏହାର ସୁଯୋଗ ନେଇ ଚୋର ମାନେ ବିନା ଦ୍ବିଧାରେ ଏଭଳି କାଣ୍ଡ ଘଟାଇଛନ୍ତି। ଆଉ ଏଥିଲାଗି ଲୋକେ ମନ୍ଦିର ପ୍ରଶାସନକୁ ହିଁ ଦାୟୀ କରିଛନ୍ତି।