୪ଦିନ ପରେ ଦୋଳଯାତ୍ରା: ବ୍ୟବସାୟୀଙ୍କ କବଜାରେ ରାସ୍ତା ଦେଖାଦେବ ଟ୍ରାଫିକ ସମସ୍ୟା

ଗଞ୍ଜାମ,୭ା୩(ବିଦ୍ୟାଧର ସାହୁ): ଆଉ ଚାରି ଦିନ ପରେ ଗଞ୍ଜାମ ସହରରେ ଅନୁଷ୍ଠିତ ହେବ ଐତିହାସିକ ଦୋଳ ପୂର୍ଣ୍ଣମୀ ଯାତ୍ରା। କେଉଁ ଆବାହନ କାଳରୁ ଏଠାରେ ଏହି ଯାତ୍ରା ଅନୁଷ୍ଠିତ ହୋଇ ଆସୁଛି। ୧୧ରୁ ଆରମ୍ଭ ହେଉଥିବା ଏହି ଯାତ୍ରାରେ ସମସ୍ତ ସାହିର ପ୍ରାୟ ସୁସଜ୍ଜିତ ଷୋହଳଟି ଦୋଳ ବିମାନ ମେଢ଼ ବଜାରକୁ ଆସିବେ। ପ୍ରଥମେ ସ୍ଥାନ ଚି଼ହ୍ନଟ ପାଇଁ ପୂର୍ବାହ୍ନରେ ବାରଟି ମେଢ଼ ବଜାରକୁ ଆସି ନିଜ ନିଜ ସ୍ଥାନ ଚିହ୍ନଟ କରି ପୁଣି ନିଜ ସାହିକୁ ଫେରିବେ ଠାକୁର। ବିଭିନ୍ନ ସାହି ମେଢ଼ ବିରାଟ ଶୋଭାଯାତ୍ରାରେ ନାଚ ଗୀତରେ ସ୍ଥାନ ଚିହ୍ନଟ ପାଇ ଆସୁଥିବା ହେତୁ ବଜାର ସେହି ସମୟରେ ଜନଗହଳି ରହିବ। ବର୍ତ୍ତମାନ କିଛି ବ୍ୟବସାୟୀ ଦୋକାନ ଆଗକୁ ଆଣିବା ସହ ହୋଡିଂ ଏବଂ କିଛି ଦୋକାନ ସାମଗ୍ରୀ ରାସ୍ତା ଉପରେ ରଖୁଥିବା ଯୋଗୁଁ ନିଶ୍ଚିତ ଟ୍ରାଫିକ ସମସ୍ୟା ସୃଷ୍ଟି କରିବ। ଏହି ଯାତ୍ରା ପାଇଁ ଏନଏସି ପ୍ରଶାସନ ଓ ଥାନା ପୋଲିସ ପକ୍ଷରୁ ଦୁଇ ଦୁଇ ଥର ଶାନ୍ତି କମିଟିକୁ ନେଇ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି। ସେତେବେଳେ ଏହି ସମସ୍ୟା ସୃଷ୍ଟି ହେବ ବୋଲି ଆଲୋଚନା ହୋଇଥିଲେ ମଧ୍ୟ କୌଣସି ପ୍ରଶାସନ ଏଯାବତ କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ କିମ୍ବା ଉକ୍ତ ଦୋକାନୀ ମାନଙ୍କୁ ନୋଟିସ ମଧ୍ୟ ହୋଇନାହିଁ। ଏହି ଯାତ୍ରା ତିନି ଦିନ ଧରି ଅନୁଷ୍ଠିତ ହେବ। ପ୍ରତିବର୍ଷ ପ୍ରାୟ ଲକ୍ଷାଧିକ ଲୋକଙ୍କ ସମାଗମ ହେଉଛି। ତ୍ରିବେଣୀ ଛକ ଠାରୁ ସାନ ବଜାର ପର୍ଯ୍ୟନ୍ତ ହଜାର ହଜାର ବିଭିନ୍ନ ପସରା ପଡୁଛି। ଅନ୍ୟପଟେ ବିଭିନ୍ନ ସାହିରେ ଲାଗିଥିବା ଷ୍ଟ୍ରିଟ୍‌ ଲାଇଟଗୁଡ଼ିକ ଜଳୁନଥିବା ବେଳେ ଏହା ଯାତ୍ରା ପୂର୍ବରୁ ସଜଡ଼ାଯିବ କି ନାହିଁ ସନ୍ଧେହ ଘେରରେ ରହିଛି। ତେଣୁ ଯାତ୍ରା ପୂର୍ବରୁ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।