କେନ୍ଦୁଝର,୧୩ା୭(ନରେଶ ଚନ୍ଦ୍ର ପଟ୍ଟନାୟକ): ଟିପ ଚିହ୍ନ କେବଳ ଚିହ୍ନାଇ ଦେଲା ନାହିଁ ବରଂ ପୁଅକୁ ପରିବାର ନିକଟକୁ ଫେରାଇ ଆଣିବାରେ ସକ୍ଷମ ହେଲା । ଏଭଳି ଏକ ମର୍ମସ୍ପର୍ଶୀ ଘଟଣା ଦେଖିବାକୁ ମିଳିଛି କେନ୍ଦୁଝରରେ। ଗତ ୨୦୧୭ ଜୁନ୍ ୨ରେ ଜଣେ ୧୩ ବର୍ଷର ଭିନ୍ନକ୍ଷମ ତଥା ମୂକ ବଧିର ନାବାଳକ କେନ୍ଦୁଝର ସହର ବଜାରରେ ଅତି ଅସହାୟ ଭାବେ କାନ୍ଦି କାନ୍ଦି ବୁଲୁଥିବାର ଦେଖିବାକୁ ମିଳିଥିଲା। ଏ ସମ୍ପର୍କରେ ଖବର ପାଇ କେନ୍ଦୁଝର ଶିଶୁ ମଙ୍ଗଳ ସମିତି କର୍ମକର୍ତ୍ତା ନାବାଳକଙ୍କୁ ଉଦ୍ଧାର କରିଥିଲେ। କିନ୍ତୁ ନାବାଳକଟି ମୂକ ବଧିର ହୋଇ ଥିବାରୁ ତାଙ୍କ ଠାରୁ ଘର ଠିକଣା କିମ୍ବା ସହର ଠିକଣା କିମ୍ବା ନାମ, ଗ୍ରାମ ଆଦି କିଛି ହେଲେ ବି ସୂଚନା ମିଳି ପାରି ନ ଥିଲା । ଅର୍ଥାତ କହି ପାରୁ ନ ଥିଲେ। କେବଳ ଯାହା ବିକଳ ହୋଇ କାନ୍ଦୁଥିଲେ । ଫଳରେ ଦିବ୍ୟାଙ୍ଗ ନାବାଳକ ଶିଶୁଟିର ସୁରକ୍ଷା ଦୃଷ୍ଟିରୁ ତାଙ୍କୁ ତେଲକୋଇସ୍ଥିତ ଭିନ୍ନକ୍ଷମ ସଂସ୍ଥାକୁ ପଠାଇ ଦିଆଯାଇଥିଲା। ନାବାଳକଙ୍କ ବିଷୟରେ କିଛି ଜାଣିବା ପାଇଁ ମୁଦ୍ରିତ ଗଣମାଧ୍ୟମ ସଙ୍ଗକୁ ସାମାଜିକ ଗଣମାଧ୍ୟମରେ ଅନେକ ପ୍ରଚାର ପ୍ରସାର କରାଗଲା । ହେଲେ ତାଙ୍କ ପରିବାର ଲୋକଙ୍କର କୌଣସି ସୂଚନା ମିଳିି ପାରି ନ ଥିଲା । କିନ୍ତୁ ଏବେ ଦୀର୍ଘ ଛଅ ବର୍ଷ ପରେ ତାଙ୍କ ଆଧାରକାର୍ଡ ବନାଇବା ପାଇଁ ଟିପ ଚିହ୍ନ ନେବା ପରେ ପୂର୍ବରୁ ତାଙ୍କ ଆଧାରକାର୍ଡ ରହିଥିବା ଜଣାପଡ଼ିଥିଲା। ସେହି ଆଧାରକାର୍ଡରୁ ହିଁ ଦିବ୍ୟାଙ୍ଗ ନାବାଳକଙ୍କ ସମ୍ପର୍କରେ ଅନେକ ସୂଚନା ମିଳିଯାଇଥିଲା।
ଏହି ନାବାଳକ ଜଣକ ବିହାର ରାଜ୍ୟର ଦରଭଙ୍ଗା ଜିଲାର ରାମକିଶୋର ଯାଦବଙ୍କ ପୁଅ ବୋଲି ଜଣାପଡ଼ିଥିଲା। ପ୍ରଶାସନ ପକ୍ଷରୁ ରାମକିଶୋରଙ୍କ ସହ ଯୋଗାଯୋଗ କରାଯିବା ପରେ ସେ ମଙ୍ଗଳବାର ଆସି କେନ୍ଦୁଝରରେ ପହଞ୍ଚିଛନ୍ତି। କେନ୍ଦୁଝରରେ ପହଞ୍ଚିବା ପରେ ସେ ସେ ତାଙ୍କ ହଜିଲା ପୁଅକୁ ପାଇ ଖୁସିରେ ଅଧିର ହୋଇ ଉଠି କହିଛନ୍ତି ଯେ କୃଷ୍ଣଙ୍କୁ ବାସୁଦେବ ସିନା ଜନ୍ମ ଦେଇଥିଲେ କିନ୍ତୁ ନନ୍ଦରାଜ ତାକୁ ପାଳିଥିଲେ । ଯାହାର ଉଦାହରଣ ମୋ’ ପୁଅ କ୍ଷେତ୍ରରେ ଘଟିଛି। ଅନେକ ଚେଷ୍ଟା ପରେ ଅନେକ ବର୍ଷ ପରେ ଆଜି ପରିବାର ତାର ହଜିଲା ପୁଅକୁ ଫେରି ପାଇ ଥିବାରୁ ପ୍ରଶାସନ ଖୁସି ବ୍ୟକ୍ତ କରିଛନ୍ତି। ଏହା ଏକ ଅତି ଆନନ୍ଦର ମୁହୂର୍ତ୍ତ।