ବ୍ରହ୍ମପୁର ଅଫିସ , ୧।୭ – ଗଞ୍ଜାମ ଜିଲାରେ କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ହୁ ହୁ ହୋଇ ବଢ଼ିବାରେ ଲାଗିଛି । ସେହିପରି ମୃତ୍ୟୁ ସଂଖ୍ୟା ମଧ୍ୟ ଦୁଇ ଅଙ୍କ ପାର ହୋଇ ସାରିଲାଣି । ଏଭଳି ସାଙ୍ଘାତିକ ସ୍ଥିତିକୁ ନଜରରେ ରଖି ଜିଲାପାଳ ବିଜୟ ଅମୃତା କୁଲାଙ୍ଗେ ମହାନଗରରେ ଗତ ଶନିବାର ଠାରୁ ୪ ଦିନିଆ ସଟଡାଉନ ଘୋଷଣା କରିଥିଲେ। ଗତକାଲି ତାରି ଅବଧି ସରିଥିଲା। ବୁଧବାର ସକାଳୁ ସକାଳୁ ବ୍ରହ୍ମପୁର ସହରର ବିଭିନ୍ନ ଛକରେ ଲୋକଙ୍କ ଅକଥନୀୟ ଭିଡ ଦେଖିବାକୁ ମିଳିଥିଲା। ବଜାରରେ ଆଗକୁ କୌଣସି ସାମଗ୍ରୀ ମିଳିବ ନାହିଁ ତାହା ଭାବି ଲୋକେ ବିଭିନ୍ନ ବଜ଼ାର, ଭେଣ୍ଡିଂ ଜୋନ୍, ତେଜରାତି ଦୋକାନ, ଫଳ ଦୋକାନ , ଡ୍ରେସ ଦୋକାନ ,ଖେଳ ସାମଗ୍ରୀ ବିକ୍ରି ହେଉଥିବା ଦୋକାନ ,ବହି ଦୋକାନ ପ୍ରଭୁତି ରେ ବୁଧବାର ଅସମ୍ଭାଳ ଭିଡ଼ ଲାଗି ରହିଥିଲା। ସେହିପରି ବୁଧବାର ବଡ଼ ଏକାଦଶୀ ଥିବାରୁ ସକାଳୁ ସକାଳୁ ମନ୍ଦିର ବାହାରେ ଭକ୍ତଙ୍କ ପ୍ରବଳ ଭିଡ ଜମି ରହିଥିଲା। ଦେଖିବାକୁ ମିଳିଥିଲା ସତେ ଯେମିତି ସମସ୍ତେ ଭୁଲି ଯାଇଥିଲେ ସାମାଜିକ ଦୂରତାକୁ। ଜିଲାରେ ୬ଟି ସର୍ତ୍ତରେ ଦୋକାନୀମାନଙ୍କୁ କରୋନା କଟକଣା କାର୍ଯ୍ୟକାରୀ କରିବାକୁ ଜିଲାପାଳ ସତର୍କ କରାଇଦେଇଛନ୍ତି ।
ଦିନକୁ ଦିନ ବ୍ରହ୍ମପୁର ସହରରେ କରୋନା ପଜେଟିଭ୍ ସଂଖ୍ୟା ବୃଦ୍ଧି ପାଉଛି । ସହରରେ ମୋଟ ୩୫ଟି ଅଞ୍ଚଳରୁ ସଂକ୍ରମିତ ଚିହ୍ନଟ ହୋଇଥିବା ନେଇ ମହାନଗର ନିଗମ ତରଫରୁ ମ୍ୟାପ ଜରିଆରେ ସୂଚନା ଦେଇଥିଲା। ଏପରିକି ଅତ୍ୟନ୍ତ ସମ୍ବେଦନଶୀଳ ୬ଟି ସାହିକୁ ନିଷିଦ୍ଧାଞ୍ଚାଳ ଘୋଷଣା କରାଯାଇଛି । ବ୍ରହ୍ମପୁର ସହରରେ କରୋନା ଯୋଦ୍ଧା ଡାକ୍ତର, ନର୍ସ ସ୍ବାସ୍ଥ୍ୟକର୍ମୀ ,ପୋଲିସ ସମେତ ସାଧାରଣ ଲୋକ ଆକ୍ରାନ୍ତ ହେଉଛନ୍ତି। ବର୍ତ୍ତମାନ ସମସ୍ତଙ୍କୁ ଗୋଷ୍ଠୀ ସଂକ୍ରମଣର ଚିନ୍ତା ଘାରିଛି। ଅନ୍ୟପଟେ ଜିଲାରେ ଅଦ୍ୟାବଧି ୧୪୭୨ ଜଣ କରୋନାରେ ସଂକ୍ରମିତ ହୋଇଥିବା ବେଳେ ୧୪ କରୋନା ସଂକ୍ରମିତଙ୍କ ମୃତ୍ୟୁ ଘଟିସାରିଲାଣି। ଲୋକେ ନିଜେ ସଚେତନ ଓ ସତର୍କ ରହିଲେ ହିଁ କରୋନା ସଂକ୍ରମଙ୍କୁ ବ୍ୟାପକ ହେବାରୁ ରୋକିହେବ ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି । ପୋଲିସ ଓ ପ୍ରଶାସନ ତରଫରୁ ସହରରେ ଯାଞ୍ଚ କଡାକଡି କରାଯାଉଥିଲେ ମଧ୍ୟ ଲୋକମାନଙ୍କର ଅସମ୍ଭାଳ ଭିଡକୁ ରୋକିବାରେ ଢିଲା ରହିଥିବା ଦେଖିବାକୁ ମିଳିଛି ।