ଲକ୍ଷ୍ନୌ,୨୭।୮ : ବରିଷ୍ଠ ନେତା ଗୁଲାମ ନବୀ ଆଜାଦ ଇସ୍ତଫା ଦେବା ପରେ କଂଗ୍ରେସ ଏକ ବଡ଼ ଅସୁବିଧାର ସମ୍ମୁଖୀନ ହୋଇଛି। ସେ ଜମ୍ମୁ-କଶ୍ମୀରରେ କଂଗ୍ରେସର ମୁଖ୍ୟ ଚେହେରା ଥିଲେ। ଶୁକ୍ରବାର କଂଗ୍ରେସର ପ୍ରାଥମିକ ସଦସ୍ୟତା ସମେତ ସମସ୍ତ ପଦବୀରୁ ସେ ଇସ୍ତଫା ଦେଇଛନ୍ତି। ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ବିରୋଧରେ ଗୁରୁତର ଅଭିଯୋଗ ଆଣି ସେ ତାଙ୍କ ଆଚରଣକୁ ପିଲାଳିଆମି ବୋଲି କହିଛନ୍ତି। ଗୁଲାମନବୀ ଅଭିଯୋଗ କରିଛନ୍ତି ଯେ ରାହୁଲ ବରିଷ୍ଠ ନେତାଙ୍କ ସହ ପରାମର୍ଶ କରନ୍ତି ନାହିଁ ଏବଂ ଦଳର ଅଧିକାଂଶ ନିଷ୍ପତ୍ତି ବ୍ୟକ୍ତିଗତ ସଚିବ ହିଁ ନେଇଥାନ୍ତି।
ଏନେଇ ଉତ୍ତରପ୍ରଦେଶ ଉପ-ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଗୁଲାମ ନବୀ ଆଜାଦ କଂଗ୍ରେସ ଛାଡିବା ପରେ କହିଛନ୍ତି ଯେ କିଛି ଦିନ ପରେ କେବଳ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ଭଦ୍ରା ହିଁ କଂଗ୍ରେସରେ ରହିବେ। ସେ କହିଛନ୍ତି ଯେ ବର୍ତ୍ତମାନ ସୁଦ୍ଧା ବହୁ ନେତା କଂଗ୍ରେସ ଛାଡିଛନ୍ତି। ଅଗାମୀ ଦିନରେ ମଧ୍ୟ ଏଭଳି ଧାରା ଜାରି ରହିବାର ଯଥେଷ୍ଟ ସମ୍ଭାବନା ରହିଛି ବୋଲି କେଶବ କହିଛନ୍ତି।