ନୂଆଦିଲ୍ଲୀ,୨୯।୧୧(ପି.ଟି.):ଶ୍ରଦ୍ଧା ଓ୍ବାଲ୍କର ବୀଭତ୍ସ ହତ୍ୟା ମାମଲାର ଆତଙ୍କ ମନରୁ ଲିଭି ନ ଥିବାବେଳେ ପୂର୍ବ ଦିଲ୍ଲୀରେ ଅନୁରୂପ ଏକ ହତ୍ୟା ଘଟଣା ପଦାକୁ ଆସିଛି। ଶ୍ରଦ୍ଧାଙ୍କୁ ତାଙ୍କ ଲିଭ୍-ଇନ୍-ପାର୍ଟନର ଆଫତାବ ପୁନାଓ୍ବାଲା ହତ୍ୟା କରି ୩୫ ଖଣ୍ଡ କରିଥିଲେ ଏବଂ ସେଗୁଡ଼ିକୁ ୧୮ ଦିନ ଯାଏ ଫ୍ରିଜ୍ରେ ରଖି ଜଙ୍ଗଲ ମଧ୍ୟରେ ଫିଙ୍ଗିଥିଲେ। ପାଣ୍ଡବ ନଗର ଅଞ୍ଚଳରେ ଜଣେ ବ୍ୟକ୍ତିଙ୍କୁ ତାଙ୍କ ସ୍ତ୍ରୀ ଓ ପୁଅ ହତ୍ୟା କରିବା ପରେ ମୃତଦେହକୁ ୧୦ ଖଣ୍ଡ କରି ଫ୍ରିଜ୍ରେ ରଖିବା ସହ ପ୍ରମାଣ ଲୁଚାଇବା ଲାଗି ଏହାକୁ ବିଭିନ୍ନ ସମୟରେ ନେଇ ଦୂରରେ ଫିଙ୍ଗିଦେଇଥିଲେ। ପୋଲିସ ସୋମବାର ଅଭିଯୁକ୍ତା ମହିଳା ଓ ତାଙ୍କ ପୁଅଙ୍କୁ ଗିରଫ କରିଛି। ପୋଲିସ ସୂଚନା ଅନୁଯାୟୀ ଅଞ୍ଜନ ଦାସ (୪୫)ଙ୍କୁ ତାଙ୍କ ସ୍ତ୍ରୀ ପୁନମ(୪୮) ଏବଂ ସାବତ ପୁଅ ଦୀପକ (୨୫) ହତ୍ୟା କରିଥବା ସ୍ବୀକାର କରିଛନ୍ତି। ଗତ ଜୁନ୍ ମାସରେ ମୃତଦେହର ବିଭିନ୍ନ ଅଙ୍ଗ କଲ୍ୟାଣପୁରୀ ଅଞ୍ଚଳର ରାମଲୀଳା ମଇଦାନ ଓ ଅନ୍ୟ ସ୍ଥାନରୁ ମିଳିଥିଲା। ତାହା ଅଞ୍ଜନଙ୍କ ଶରୀରର ଅଙ୍ଗ କି ନୁହେଁ, ତାହାର ଡିଏନ୍ଏ ପରୀକ୍ଷା ପାଇଁ ପଠାଯିବ। ଅଭିଯୁକ୍ତା ସ୍ତ୍ରୀ ଓ ସାବତ ପୁଅଙ୍କ ବିରୋଧରେ ଆଇପିସିର ଧାରା ୩୦୨(ହତ୍ୟା) ଓ ୨୦୧(ପ୍ରମାଣ ନଷ୍ଟ ଓ ଭୁଲ ତଥ୍ୟ ଦେବା)ରେ ପାଣ୍ଡବ ନଗର ଥାନାରେ ମାମଲା ରୁଜୁ ହୋଇଛି।
ବିହାରରେ ଅଞ୍ଜନଙ୍କର ଅନ୍ୟ ଜଣେ ସ୍ତ୍ରୀ ଓ ୮ ପୁଅ ଅଛନ୍ତି, ଯାହା ସେ ପୁନମ୍ଙ୍କୁ ଲୁଚାଇଥିଲେ। ଏହା ବ୍ୟତୀତ ସେ ସାବତ ଝିଅ ଏବଂ ସାବତ ପୁଅଙ୍କ ସ୍ତ୍ରୀ ଉପରେ ପାପ ନଜର ପକାଉଥିବା ସନ୍ଦେହ କରି ମାଆ-ପୁଅ ତାଙ୍କୁ ହତ୍ୟା କରିଥିବା କହିଛନ୍ତି। ସେମାନେ ଅଞ୍ଜନଙ୍କ ପାନୀୟରେ ନିଦ ଔଷଧ ମିଶାଇ ତାଙ୍କୁ ସଂଜ୍ଞାହୀନ କରିଦେବା ପରେ ଛୁରି ଓ ଡାଗର ସାହାଯ୍ୟରେ ହତ୍ୟା କରିଥିଲେ।ଏହା ପରେ ତାଙ୍କ ତଣ୍ଟି କାଟି ରକ୍ତ ସମ୍ପୂର୍ଣ୍ଣ ବାହାରିଯିବା ପର୍ଯ୍ୟନ୍ତ ଅପେକ୍ଷା କରିଥିଲେ। ଏହା ପରେ ମାଆ-ପୁଅ ମୃତଦେହକୁ ୧୦ ଖଣ୍ଡ କରି ଫ୍ରିଜ୍ରେ ରଖିବା ସହ ୩/୪ ଦିନ ମଧ୍ୟରେ ପୂର୍ବ ଦିଲ୍ଲୀର ବିଭିନ୍ନ ସ୍ଥାନରେ ଫିଙ୍ଗିଥିଲେ ଓ ଖପୁରିକୁ ପୋତିଦେଇଥିଲେ ବୋଲି ପୋଲିସକୁ କହିଛନ୍ତି। ମେ’ ମାସରେ ଏହି ହତ୍ୟାକାଣ୍ଡ ଘଟିଥିଲା। ଜୁନ୍ରେ ପୋଲିସ ମୃତଦେହର ଖଣ୍ଡ ବିଖଣ୍ଡିତ ଅଂଶ ପାଇବା ପରେ ଉକ୍ତ ଅଞ୍ଚଳର ସିସିଟିଭି ଫୁଟେଜ୍ ଯାଞ୍ଚ କରିଥିଲା। ମୃତଦେହ ଅଞ୍ଜନଙ୍କର ବୋଲି ଚିହ୍ନଟ ହେବା ପରେ ଏନେଇ ପରିବାର ପକ୍ଷରୁ ନିଖୋଜ ଅଭିଯୋଗ ଦାଏର ହୋଇ ନ ଥିବାରୁ ପୁନମ୍ ଓ ଦୀପକଙ୍କ ଉପରେ ପୋଲିସର ସନ୍ଦେହ ହୋଇଥିଲା। ଜେରା ବେଳେ ସେମାନଙ୍କ କଥାରେ ତାଳମେଳ ରହି ନ ଥିଲା ଏବଂ ଶେଷରେ ସେମାନେ ଅପରାଧ ଘଟାଇଥିବା ସ୍ବୀକାର କରିଥିଲେ ବୋଲି ପୋଲିସ କହିଛି।