ଚଣ୍ଡିଖୋଲ,୩ା୬(ଡି.ଏନ୍.ଏ.): କଟକ ଚାରବାଟିଆ ପୂର୍ତ୍ତ ବିଭାଗ ଡିଭିଜନ ଅଧୀନ ବଡ଼ଚଣା ଉପଖଣ୍ଡରେ ରହିଛି ବାଲିଚନ୍ଦ୍ରପୁର-ବେଣିପୁର ରାସ୍ତା। ଏହି ରାସ୍ତା ୧୦ କି.ମି. ୨ ମିଟର ନିର୍ମାଣ ପାଇଁ ଖର୍ଚ୍ଚ ହୋଇଛି ୨୨ କୋଟି ଟଙ୍କା। କେବଳ ରାସ୍ତାର ଉନ୍ନତୀକରଣ ନିମନ୍ତେ ପିଚୁକାର୍ଯ୍ୟ କରିବାକୁ ଏତେ ପରିମାଣର ଟଙ୍କା ବିଭାଗ ପକ୍ଷରୁ ଖର୍ଚ୍ଚ କରାଯାଇଛି, ଯାହାକି ୧ କିଲୋମିଟର ପିଛା ୨ କୋଟିରୁ ଊର୍ଦ୍ଧ୍ୱ ହେବ। ହେଲେ ରସ୍ତା ନିର୍ମାଣ ଶେଷ ହେବାର ମାସକ ପରେ ତାହା ଭାଙ୍ଗିବା ଓ ଦବିବା ଆରମ୍ଭ ହୋଇଛି। ସେଥିପାଇଁ ରାସ୍ତାର ଟିଗିରିଆ, ଖଡ଼ଗପୁର, ଗଜେନ୍ଦ୍ରପୁର ଓ କଳାଶ୍ରୀ ନିକଟରେ ପାଖାପାଖି ୧୫ଟି ସ୍ଥାନରେ ତାଳି ପଡ଼ିବା କାର୍ଯ୍ୟ ଚାଲିଛି। ଫଳରେ ଏହାକୁ ନେଇ ରାସ୍ତା କାର୍ଯ୍ୟରେ ହୋଇଥିବା ବ୍ୟାପକ ଅନିୟମିତତା ସମ୍ପର୍କରେ ସାଧାରଣରେ ପ୍ରଶ୍ନ ଉଠିଛି। ଏହି ରାସ୍ତାକୁ ୨ ଭାଗରେ ବିଭକ୍ତ କରାଯାଇ ଚାରବାଟିଆ ପୂର୍ତ୍ତ ବିଭାଗ ଡିଭିଜନ୍ ଟେଣ୍ଡର କରିଥିଲା।
କଳାଶ୍ରୀ ପର୍ଯ୍ୟନ୍ତ ୫ କି.ମି. ୫୦୦ ମିଟର ରାସ୍ତା ପାଇଁ ୯ କୋଟି ୯୭ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଥିବାବେଳେ କଳାଶ୍ରୀଠାରୁ ବେଣୀପୁର ପର୍ଯ୍ୟନ୍ତ ୫ କି.ମି. ୫୦୦ ମିଟର ପାଇଁ ୧୨ କୋଟି ୮୦ଲକ୍ଷ ଟଙ୍କା ବ୍ୟୟବରାଦ କରାଯାଇଥିଲା। ୨ ଠିକା କମ୍ପାନୀ ଏହି ରାସ୍ତା ନବୀକରଣ ଦାୟିତ୍ୱ ନେଇଥିଲେ। ସେଥିମଧ୍ୟରୁ ପ୍ରାରମ୍ଭିକ ପର୍ଯ୍ୟାୟରେ ବାଲିଚନ୍ଦ୍ରପୁରଠାରୁ କଳାଶ୍ରୀ ପର୍ଯ୍ୟନ୍ତ ୫ କି.ମି. ୫୦୦ ମିଟର ରାସ୍ତା ନିର୍ମାଣ ସରିଥିବାବେଳେ ୨ୟ ପର୍ଯ୍ୟାୟରେ କଳାଶ୍ରୀଠାରୁ ବେଣିପୁର ପର୍ଯ୍ୟନ୍ତ ରାସ୍ତା ନିର୍ମାଣ କରାଯାଇଥିଲା। ଏବେ କଳାଶ୍ରୀଠାରୁ ବେଣିପୁର ପର୍ଯ୍ୟନ୍ତ ନିର୍ମାଣ କରାଯାଇଥିବା ରାସ୍ତା ବାରମ୍ବାର ଭାଙ୍ଗିବା ସହିତ ତାଳିପଡ଼ିବା ଆରମ୍ଭ ହୋଇଛି। ୨୦୧୯ରେ ଏହି ରାସ୍ତା କେନ୍ଦ୍ରାପଡ଼ା ଜଳ ସମ୍ପଦ ଡିଭିଜନ ଅଧୀନରେ ଥିଲା। ରାସ୍ତାର ଲମ୍ବ ୧୦ କି.ମି. ୨୦୦ ମିଟର ଥିବାବେଳେ ପୂର୍ତ୍ତ ବିଭାଗ ଏହାକୁ ୧୧ କି.ମି. ୨୦୦ ମିଟର କରି ଟେଣ୍ଡର କରିଛି, ଯାହାକି ଗୋଟିଏ କିଲୋମିଟର ରାସ୍ତାର ଟଙ୍କା ହଡ଼ପ କରାଯାଇଥିବା ଅଭିଯୋଗ ହୋଇଛି।
ଏହି ରାସ୍ତା ନିର୍ମାଣରେ ବ୍ୟାପକ ଅନିୟମିତତା ହୋଇଥିବା ନେଇ ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି। ତେଣୁ ଏହାର ଉଚ୍ଚସ୍ତରୀୟ ତଦନ୍ତ ହେବାର ଆବଶ୍ୟକତା ରହିଛି ବୋଲି ସେମାନେ ପ୍ରକାଶ କରିଛନ୍ତି। ଏ ସମ୍ପର୍କରେ ବିଭାଗୀୟ ସହକାରୀ ଯନ୍ତ୍ରୀ ପ୍ରଫୁଲ୍ଲ କୁମାର ବେହେରାଙ୍କୁ ପଚାରିବାରେ ସେ କହିଛନ୍ତି, ରାସ୍ତାରେ ମାଟି ପକାଇବାରେ କିଛି ଦୋଷ ରହିଯାଇଛି, ଯେଉଁଥି ପାଇଁ ବାରମ୍ବାର ରାସ୍ତା ଦବୁଛି।
