ପୋଟେରୁ,୧ା୫(ଡି.ଏନ୍.ଏ.): ମାସେ ତଳେ ଲକ୍ଷାଧିକ ଟଙ୍କା ବ୍ୟୟରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ରାସ୍ତା କାର୍ଯ୍ୟ ହୋଇଥିଲା। ମାତ୍ର ଅତି ନିମ୍ନମାନର କାର୍ଯ୍ୟ ଯୋଗୁ ମାସେ ଗଲାନି, ରାସ୍ତାରୁ ପିଚୁ ଉଠି ଏହା ନଷ୍ଟ ହୋଇଗଲାଣି। ରାସ୍ତାର ଅଧିକାଂଶ ସ୍ଥାନରୁ ପିଚୁ ଉଠି ମୋରମ୍ ଦେଖାଗଲାଣି। କାର୍ଯ୍ୟ କରୁଥିବା ଠିକାଦାର ଗୋଟିଏ ରାତି ମଧ୍ୟରେ ତରବରରେ ଅତି କମ ପିଚୁ ମିଶ୍ରିତ ବିଜୁରିରେ ରାସ୍ତା କରି ରୋଲିଂ ନ କରିବାରୁ ଏବେ ରାସ୍ତାର ଅବସ୍ଥା ଏପରି ହୋଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଗ୍ରାମ୍ୟ ନିର୍ମାଣ ବିଭାଜନ-୨ ପକ୍ଷରୁ ଏମ୍ପିଭି-୫ ଗ୍ରାମଠାରୁ ଭାୟା କୁମ୍ଭାଗୁଡା ପର୍ଯ୍ୟନ୍ତ ୨.୧୦୦ କିମି ପିଚୁ ରାସ୍ତା ଉନ୍ନତୀକରଣ ପାଇଁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଲକ୍ଷାଧିକ ଟଙ୍କାର ଟେଣ୍ଡରକୁ ପ୍ରମୋଦ ସ୍ବାଇଁ ନାମକ ଠିକାଦାର କାର୍ଯ୍ୟ କରିବାକୁ ଦାୟିତ୍ୱ ନେଇଥିଲେ। ତେବେ ଠିକ୍ ରୂପେ କାର୍ଯ୍ୟ ନ କରି ଅତି ନମ୍ନମାନର କାମ କରିଥିବାରୁ ରାସ୍ତା ନିର୍ମାଣର ମାସେ ମଧ୍ୟ ଗଲାନି। ରାସ୍ତା ସାରା ଫାଟ ସୃଷ୍ଟି ହେବା ସହ ରାସ୍ତା ଉପରୁ ପିଚୁ,ବଜୁରି ସବୁ ଉଠିଗଲାଣି। ଏହି ରାସ୍ତାଦେଇ କୌଣସି ଭାରି ଯାନ ଯାତାୟାତ କରୁନି। ନଚେତ୍ ବର୍ତ୍ତମାନ ରାସ୍ତା ସବୁ ନଷ୍ଟ ହୋଇସାରନ୍ତାଣି। ପୁରୁଣା ରାସ୍ତା ଉପରେ ଅଳ୍ପ ପରିମାଣର ପିଚୁ ଦେଇ ରାସ୍ତା କାର୍ଯ୍ୟ କରାଯାଇଥିବାରୁ ଏପରି ଅବସ୍ଥାହୋଇଛି। ଗୋଡରେ ଆଡେଇ ଦେଲେ ପିଚୁ ଉଠି ଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏସମ୍ପର୍କରେ ଆର୍ଡି ଯନ୍ତ୍ରୀଙ୍କୁ ପଚାରିବାରୁ ସେ କହିଲେ, ସେ ନୂତନ ଭାବେ ଏଠାରେ ଯୋଗ ଦେଇଛନ୍ତି। ଏହି କାମ ସମ୍ପର୍କରେ ତାଙ୍କ ପାଖରେ କୌଣସି ସୂଚନା ନାହିଁ।