କାନପୁର,୨୯।୧୧: ସବୁ କିଛି ପରେ ମଧ୍ୟ ଟିମ୍ ଇଣ୍ଡିଆ ସପକ୍ଷରେ ଯାଇ ନାହିଁ କାନପୁର ଟେଷ୍ଟର ଫଳାଫଳ। ଶେଷରେ ଡ୍ର’ ସହ ଶେଷ ହୋଇଛି ନ୍ୟୁଜିଲାଣ୍ଡ ଓ ଭାରତ ମଧ୍ୟରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍। ୨୦୧୮ ପରେ ପ୍ରଥମ ଥର ପାଇଁ ଭାରତରେ କୌଣସି ଟେଷ୍ଟ ମ୍ୟାଚ୍ ଅମୀମାଂସିତ ଭାବେ ଶେଷ ହୋଇଛି। ଏଥିଲାଗି ଆଲୋକ ଅଭାବକୁ ଦାୟୀ କରାଯାଇପାରେ। କାରଣ ଆଲୋକ ଜନିତ ସମସ୍ୟା ଛିଡ଼ା ହୋଇ ନ ଥିଲେ ଭାରତୀୟ ଦଳକୁ ଆହୁରି କିଛି ଓଭର ମିଳିପାରିଥାନ୍ତା।
ମ୍ୟାଚ୍ର ଅନ୍ତିମ ତଥା ୫ମ ଦିନ ଭାରତକୁ ଜିତିବା ପାଇଁ ୯ ଉଇକେଟ ଦରକାର ଥିଲା। ପ୍ରଥମ ସେସନରେ ଭାରତୀୟ ବୋଲରଙ୍କୁ ନିରାଶ କରିଥିଲେ ଟମ ଲଥାମ (୫୨) ଓ ନାଇଟ୍ ଓ୍ବାଚମ୍ୟାନ୍ ଓ୍ବିଲିୟମ ସମରଭିଲ (୩୬)। ମାତ୍ର ଦ୍ୱତୀୟ ସେସନରେ ୩ ଉଇକେଟ ନେଇ ମ୍ୟାଚ୍ରେ ବିଜୟ ସମ୍ଭାବନା ସୃଷ୍ଟି କରିଥିଲେ ଭାରତୀୟ ସ୍ପିନର। ତା’ ପରେ ଅନ୍ତିମ ସେସନରେ ୧୮ ଓଭର ଓଭର ମଧ୍ୟରେ ରବୀନ୍ଦ୍ର ଜାଡେଜା ଓ ରବିଚନ୍ଦ୍ରନ ଅଶ୍ୱିନ ୫ ଉଇକେଟ ନେଇ ସାରିଥିଲେ। ଅନ୍ତିମ ୮ ଓଭରରେ ଭାରତକୁ ଜିତିବା ପାଇଁ ଦରକାର ଥିଲା ଗୋଟିଏ ଉଇକେଟ। ଶେଷ ଉଇକେଟ ଲାଗି ଭାରତୀୟ ଅଧିନାୟକ ଅଜିଙ୍କ୍ୟ ରାହାନେ ବ୍ୟାଟରଙ୍କ ଚାରିଆଡ଼େ ୮ ଫିଲ୍ଡର ଲଗାଇଥିଲେ। ଏହାସତ୍ତ୍ୱେ ଭାରତୀୟ ଦଳ ମ୍ୟାଚ୍ ଜିତିପାରି ନ ଥିଲା। ଭ୍ରମଣକାରୀ ନ୍ୟୁଜିଲାଣ୍ଡ ୯ ଉଇକେଟ ହରାଇ ୧୬୫ ରନ୍ କରିବାକୁ ସକ୍ଷମ ହୋଇଥିଲା। ପୂର୍ବରୁ ପ୍ରଥମ ଇନିଂସରେ ଭାରତ ୩୪୫ ରନ୍ କରିଥିବା ବେଳେ ୨୯୬ ରନ୍ କରିଥିଲା ନ୍ୟୁଜିଲାଣ୍ଡ। ତା’ ପରେ ଟିମ୍ ଇଣ୍ଡିଆ ଦ୍ୱିତୀୟ ଇନିଂସରେ ୭ ଉଇକେଟ ହରାଇ ୨୩୪ ରନ୍ କରି ପାଳି ଘୋଷଣା କରିଥିଲା ।