ଦୁବାଇ, ୫।୧୦: ଦିଲ୍ଲୀ କ୍ୟାପିଟାଲ୍ସ ପରେ ଏବେ ଆଇପିଏଲ୍ର ଆଉ ଏକ ଦଳ ସନ୍ରାଇଜର୍ସ ହାଇଦ୍ରାବାଦ୍ ପାଇଁ ଖରାପ ଖବର। ହାଇଦ୍ରାବାଦ୍ ଦଳର ସବୁଠାରୁ ଅଭିଜ୍ଞ ବୋଲର ଭୁବନେଶ୍ୱର କୁମାର ଆଘାତଜନିତ ସମସ୍ୟା ଲାଗି ଚଳିତ ଆଇପିଏଲ୍ରୁ ବାହାରି ଯାଇଛନ୍ତି। ଭୁବନେଶ୍ୱରଙ୍କ ଜଂଘରେ ଆଘାତ ଲାଗିଛି। ଚେନ୍ନାଇ ସୁପର୍ କିଙ୍ଗ୍ସ ବିପକ୍ଷ ମ୍ୟାଚ୍ରେ ୧୯ତମ ଓଭର ବୋଲିଂ କରୁଥିବାବେଳେ ତାଙ୍କ ଜଂଘରେ ଆଘାତ ଲାଗିଥିବା ଜଣାପଡ଼ିଛି। ଏହି କାରଣରୁ ସେ ନିଜ ଓଭର ପୁରା ବୋଲିଂ କରି ପାରି ନ ଥିଲେ ଏବଂ ଅଧାରୁ ପଡ଼ିଆ ଛାଡ଼ି ଚାଲିଯାଇଥିଲେ। ଯେଉଁଥି ପାଇଁ ତାଙ୍କୁ ଚଳିତ ଆଇପିଏଲ୍ର ବଳକା ମ୍ୟାଚ୍ରୁ ବାହାର ହେବାକୁ ପଡ଼ିଛି। ଏହି ଡାହାଣହାତୀ ଦ୍ରୁତ ବୋଲର ମଧ୍ୟ ଭାରତର ଆଗାମୀ ଅଷ୍ଟ୍ରେଲିଆ ଗସ୍ତରୁ ବାଦ୍ ପଡ଼ିବାର ସମ୍ଭାବନା ସୃଷ୍ଟି ହୋଇଛି। ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ବରିଷ୍ଠ ଅଧିକାରୀ ନାମ ଗୋପନ ରଖିବା ସର୍ତ୍ତରେ ଖବର ସରବରାହ ସଂସ୍ଥା ପିଟିଆଇକୁ କହିଛନ୍ତି, ‘ବୋଧହୁଏ ଭୁବନେଶ୍ୱରଙ୍କ ଆଘାତ ଗ୍ରେଡ୍-୨ କିମ୍ବା ଗ୍ରେଡ୍-୩ ସ୍ତରର। ଯାହାର ଅର୍ଥ ତାଙ୍କୁ ସୁସ୍ଥ ହେବାକୁ ୬ରୁ ୮ ସପ୍ତାହ ସମୟ ଲାଗିପାରେ। ଫଳରେ ସେ ଭାରତର ଆଗାମୀ ଅଷ୍ଟ୍ରେଲିଆ ଗସ୍ତରୁ ବାଦ୍ ପଡ଼ିବାର ସମ୍ଭାବନା ସୃଷ୍ଟି ହୋଇଛି।’
ଉଲ୍ଲେଖଯୋଗ୍ୟ, ଭୁବନେଶ୍ୱରଙ୍କ ପୂର୍ବରୁ ଦିଲ୍ଲୀ କ୍ୟାପିଟାଲ୍ସର ଅଭିଜ୍ଞ ସ୍ପିନର ଅମିତ୍ ମିଶ୍ରା ମଧ୍ୟ ଆଙ୍ଗୁଠିରେ ଆଘାତ କାରଣରୁ ଚଳିତ ଆଇପିଏଲ୍ରୁ ବାଦ୍ ପଡ଼ିଛନ୍ତି।