ଚିତ୍ରକୋଣ୍ଡା,୨୫ା୧(ଡି.ଏନ୍.ଏ.): ଆସନ୍ତାକାଲି ପାଳନ ହେବ ୭୪ତମ ସାଧାରଣତନ୍ତ୍ର ଦିବସ। ଏହାର ଗୋଟିଏ ଦିନ ପୂର୍ବରୁ ଆନ୍ଧ୍ର ଓଡ଼ିଶା ସୀମାନ୍ତ ଆଦିବାସୀ ଅଧ୍ୟୁଷିତ ଉପାନ୍ତ ମାଲକାନଗିରି ଜିଲା ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳରେ ପାଳିତ ହୋଇଛି ବିଜୟ ଉତ୍ସବ। ୨୦୨୦ରେ ସ୍ବାଭିମାନ ଅଞ୍ଚଳ ଜନ୍ତୁରାଇରେ ମାଓବାଦୀ ଏବଂ ଜନତାଙ୍କ ମଧ୍ୟରେ ହୋଇଥିଲା ଖଣ୍ଡ ଯୁଦ୍ଧ। ସ୍ବାଭିମାନ ଅଞ୍ଚଳର ୩ଟି ଗ୍ରାମ ଯଥା ଜନ୍ତୁରାଇ, ଯୋଡ଼ାମ୍ବ ଏବଂ ସିନ୍ଧିବାଡ଼ି ଗ୍ରାମ ଏକତ୍ର ହୋଇ ମାଓବାଦୀଙ୍କ ଅତ୍ୟାଚାରରେ ଅସହ୍ୟ ହୋଇ ଟେକିଥିଲେ ମୁଣ୍ଡ ଏବଂ ସେମାନେ ଅସତ୍ୟକୁ ବଳି ଦେଇ ସତ୍ୟପଥରେ ସରକାର ତଥା ପ୍ରଶାସନକୁ ସହଯୋଗ କରି ସ୍ବାଭିମାନ ଆଞ୍ଚଳିକ ୨୦୨୦ ଜାନୁୟାରୀ ୨୫ ଦିନ ମାଓବାଦୀ କବଳରୁ ମୁକ୍ତ ହୋଇ ସ୍ବାଧୀନତା ପାଇଥିବା ସ୍ବାଭିମାନ ଅଞ୍ଚଳବାସୀ ପ୍ରକାଶ କରିବା ସହ ତ୍ରିରଙ୍ଗା ପତାକା ଉଠାଇ ବିଜୟ ଉତ୍ସବ ମନାଇଛନ୍ତି l ଉକ୍ତ ବିଜୟ ଉତ୍ସବ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଚିତ୍ରକୋଣ୍ଡା ଏସ୍ଡିପିଓ ଆର୍ଲେକ୍ସିଅସ କିସ୍ପୋଟା ଯୋଗଦାନ କରିଥିବା ବେଳେ ସମ୍ମାନିତ ଅତିଥି ଭାବେ ଦାରାଲା ବେଢ଼ା ବିଏସ୍ଏଫ୍ କ୍ୟାମ୍ପର ଏସି ଆଶିଷ କୁମାର, ପୋଲିସ ଇନ୍ସପେକ୍ଟର ଲକ୍ଷ୍ମୀନାରାୟଣ ମୁଦୁଲି, ଯୋଡ଼ାମ୍ବ ସରପଞ୍ଚ ପିଙ୍କି ହନ୍ତାଳ, ଓଆଇସି ଯୋଡ଼ାମ୍ବ ଓ ପାପରମେଟେଲା ଉପସ୍ଥିତ ଥିବାବେଳେ ସ୍ବାଭିମାନ ଅଞ୍ଚଳର ବହୁ ଜନସାଧାରଣ ଯୋଗଦେଇ ବିଜୟ ଉତ୍ସବ ମନାଇଥିଲେ।
