ଚେନ୍ନାଇ, ୧୫।୨ : ରବିଚନ୍ଦ୍ରନ ଅଶ୍ୱିନ ବୋଲିଂ ପରେ ବ୍ୟାଟିଂରେ ନିଜ କରାମତି ଦେଖାଇଛନ୍ତି। ଏଠାରେ ଚାଲିଥିବା ଇଂଲଣ୍ଡ ବିପକ୍ଷ ଦ୍ୱିତୀୟ ଟେଷ୍ଟର ପ୍ରଥମ ଇନିଂସରେ ୫ ଉଇକେଟ ହାତେଇଥିବା ଅଶ୍ୱିନ ଦ୍ୱିତୀୟ ପାଳିରେ ହାସଲ କରିଛନ୍ତି ଶତକ। ଆଉ ତାଙ୍କ ଅଲରାଉଣ୍ଡର ପ୍ରଦର୍ଶନ ଯୋଗୁ ତୃତୀୟ ଦିନ ସୁଦ୍ଧା ବିଜୟ ଦ୍ୱାରରେ ପହଞ୍ଚି ସାରିଛି ଟିମ୍ ଇଣ୍ଡିଆ।
ପ୍ରଥମ ଇନିଂସରେ ୧୯୫ ରନ୍ର ଅଗ୍ରଣୀ ହାସଲ କରିଥିବା ଭାରତୀୟ ଦଳ ତା’ର ଅସମାପ୍ତ ଦ୍ୱିତୀୟ ଇନିଂସ ସ୍କୋର (୫୪/୧)ରୁ ବ୍ୟାଟିଂ ଆରମ୍ଭ କରି ବିପର୍ଯ୍ୟୟର ସମ୍ମୁଖୀନ ହୋଇଥିଲା। ମାତ୍ର ୧୦୬ ରନ୍ ମଧ୍ୟରେ ୬ ଉଇକେଟ ହରାଇ ସଙ୍କଟରେ ପଡ଼ିଥିଲା ଟିମ୍ ଇଣ୍ଡିଆ। ଏହାପରେ ଅଧିନାୟକ ବିରାଟ କୋହଲି ଓ ଅଶ୍ୱିନ ସପ୍ତମ ଉଇକେଟ ପାଇଁ ଯୋଡ଼ିଥିଲେ ୯୬ ରନ୍। କୋହଲି (୬୨) ଆଉଟ୍ ହେବା ପରେ ଅଶ୍ୱିନ ନିମ୍ନ କ୍ରମର ବ୍ୟାଟ୍ସମ୍ୟାନଙ୍କ ସହ ମିଶି ନିଜ ଶତକ ପୂରଣ କରିଥିଲେ। ୧୪୮ ବଲ ଖେଳି ଅଶ୍ୱିନ (୧୦୬) ହାସଲ କରିଥିଲେ କ୍ୟାରିୟରର ୫ମ ଶତକ। ତାଙ୍କ ଇନିଂସରେ ଥିଲା ୧୪ ଚୌକା ଓ ଗୋଟିଏ ଛକା। ଘରୋଇ ଭାରତୀୟ ଦଳ ଦ୍ୱିତୀୟ ଇନିଂସରେ ୨୮୬ ରନ୍ କରିବାକୁ ସକ୍ଷମ ହୋଇଥିଲା। ଆଉ ପ୍ରତିପକ୍ଷ ଦଳ ଆଗରେ ଛିଡ଼ା କରିଥିଲା ୪୮୨ ରନ୍ର ବିଶାଳ ଟାର୍ଗେଟ। ଜବାବରେ ଇଂଲଣ୍ଡ ତୃତୀୟ ଦିନ ଶେଷ ପର୍ଯ୍ୟନ୍ତ ଖେଳି ୩ ଉଇକେଟ ହରାଇ ୫୩ ରନ୍ କରିବାକୁ ସକ୍ଷମ ହୋଇଛି। ଡାନିଏଲ ଲରେନ୍ସ (୨୫) ଓ ଅଧିନାୟକ ଜୋ ରୁଟ୍ (୨) ଅପରାଜିତ ଅଛନ୍ତି। ଭାରତୀୟ ଦଳ ପକ୍ଷରୁ ଅକ୍ଷର ପଟେଲ ୨ ଉଇକେଟ ନେଇଥିବାବେଳେ ଅଶ୍ୱିନ ହାତେଇଛନ୍ତି ଗୋଟିଏ ସଫଳତା।