କୁଜଙ୍ଗ,୧୫ା୨(ଡି.ଏନ୍.ଏ.): କୁଜଙ୍ଗ ବ୍ଲକ ଅନ୍ତର୍ଗତ ବାଲିଆ ପଞ୍ଚାୟତର ବଡ଼ଙ୍ଗ ଓ ପାରିଅଙ୍ଗ ଗଁାକୁ ଲୁଣା ନଦୀ ଉପରେ ସଂଯୋଗ କରିଥିବା ପୋଲକୁ ଗ୍ରାମ୍ୟ ଉନ୍ନୟନ ବିଭାଗ ବର୍ଷେ ତଳୁ ଭାଙ୍ଗି ଦେଇଥିଲା। ନୂଆ ପୋଲ ନିର୍ମାଣ କରିବା ନଁାରେ ବିଭାଗ ଚୁପ ହୋଇ ବସିଛି। ଫଳରେ ନଦୀ ଉପରେ ଅସ୍ଥାୟୀ ଭାବେ ନିର୍ମାଣ କରାଯାଇଥିବା ପାଦ ଚଲା ରାସ୍ତାରେ ୨ ଗ୍ରାମର ପ୍ରାୟ ୪ ହଜାରରୁ ଊର୍ଦ୍ଧ୍ୱ ଲୋକ ବିପଦସଙ୍କୁଳ ଅବସ୍ଥାରେ ଯାତାୟାତ କରିବା ସହ ହନ୍ତସନ୍ତ ହେଉଛନ୍ତି।
ଲୁଣା ନଦୀ ଉପରେ ନିର୍ମିତ ପୋଲକୁ ୨୦୨୨ ଏପ୍ରିଲରେ ଗ୍ରାମ୍ୟ ଉନ୍ନୟନ ବିଭାଗ ଭାଙ୍ଗି ନୂତନ ପୋଲ ନିର୍ମାଣ ପାଇଁ ଯୋଜନା କରିଥିଲା। ଏଥି ନିମନ୍ତେ ପାଖାପାଖି ୧୯ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଥିଲା। କିନ୍ତୁ କାମ ଆରମ୍ଭ ପୂର୍ବରୁ ମୃତ୍ତିକା ପରୀକ୍ଷାରେ ଦେଖାଗଲା ଯେ, ସେ ସ୍ଥାନରେ ଅଧିକ ପଙ୍କ ଅଛି। ଯଦି ଏହି ବ୍ୟୟ ଅଟକଳ ଓ ଡ୍ରଇଂ ଅନୁସାରେ ପୋଲ କରାଯାଏ ତାହା ହେଲେ ପୋଲର ସ୍ଥାୟିତ୍ୱ ରହିବ ନାହିଁ। ତେଣୁ ବିଭାଗ ପୁନର୍ବାର ଏକ ପୋଲର ନକ୍ସା କରି ମୁଖ୍ୟଯନ୍ତ୍ରୀଙ୍କ ନିକଟକୁ ମଞ୍ଜୁରୀ ନିମନ୍ତେ ପଠାଇ ଥିଲା। ନକ୍ସା ମଞ୍ଜୁରୀ ପରେ ପ୍ରାୟ ୪ ମାସ ତଳୁ ୨ କୋଟି ୭୩ ଲକ୍ଷ ଟଙ୍କା ବ୍ୟୟ ଅଟକଳର ଏକ ପ୍ରସ୍ତାବ ମୁଖ୍ୟଯନ୍ତ୍ରୀଙ୍କ ମଞ୍ଜୁରୀ ନିମନ୍ତେ ପଠାଯାଇଥିଲେ ବି ତାହା ଆଜିଯାଏ ମଞ୍ଜୁର ମିଳିନାହିଁ। ଏ ସମ୍ପର୍କରେ ବିଭାଗୀୟ ସହକାରୀ ଯନ୍ତ୍ରୀ ଜୟନ୍ତ କୁମାର ପୃଷ୍ଟିଙ୍କୁ ପଚାରିବାରେ ମାତ୍ର ୧୫ ଦିନ ହେବ କାର୍ଯ୍ୟରେ ଯୋଗ ଦେଇଛି। ବଡ଼ଙ୍ଗ ପୋଲ ସଂକ୍ରାନ୍ତରେ ଖବର ପାଇଲା ପରେ ସମ୍ପୃକ୍ତ କନିଷ୍ଠ ଯନ୍ତ୍ରୀଙ୍କଠାରୁ ଜାଣିବାକୁ ପାଇଲି ଏଷ୍ଟିମେଟ୍ ମୁଖ୍ୟଯନ୍ତ୍ରୀଙ୍କ ନିକଟକୁ ଯାଇଛି। ହେଲେ ଅଦ୍ୟାବଧି ମଞ୍ଜୁରୀ ମିଳିନାହିଁ। ଆଗାମୀ ସପ୍ତାହକ ମଧ୍ୟରେ ଏଷ୍ଟିମେଟ୍ର ମଞ୍ଜୁରୀ ମିଳିବା ଲାଗି ବୋଲି ସେ ପଦକ୍ଷେପ ନେବେ। ପରେ ଟେଣ୍ଡର କରାଯାଇ କାମ ହେବ। ସୂଚନାଯୋଗ୍ୟ, ୨୦୨୨ ବର୍ଷା ଋତୁରେ ଜନସାଧାରଣ ପୋଲ ନ ଥିବାରୁ ଯାତାୟାତରେ ଅସୁବିଧାର ସମ୍ମୁଖୀନ ହୋଇଥିଲେ। ଛୋଟ ପିଲାଙ୍କୁ ସେହି ବିପଦ ସଙ୍କୁଳ ରାସ୍ତାରେ ସ୍କୁଲ୍କୁ ଛାଡିବାକୁ ଅଭିଭାବକ ରାଜି ହୋଇ ନ ଥିଲେ। ଗ୍ରାମରେ କୌଣସି ରୋଗୀଙ୍କୁ ନେବାକୁ ହେଲେ ଆମ୍ବୁଲାନ୍ସ ଯାଇ ପାରୁନାହିଁ। ଆଗକୁ ବର୍ଷାଦିନ ଆସୁଛି। ଭରା ନଦୀରେ ଅସ୍ଥାୟୀ ରାସ୍ତା ରହିବ ନାହିଁ। ତେଣୁ ଯଥାଶୀଘ୍ର ପୋଲ ନିର୍ମାଣ କରିବାକୁ ନାଏବ ସରପଞ୍ଚ ସମରେନ୍ଦ୍ର ପ୍ରଧାନ, ପବିତ୍ର ନାୟକ, ସୁଦର୍ଶନ ବାରିକ ଓ ପ୍ରକାଶ ପ୍ରଧାନ ପ୍ରମୁଖ ଦାବି କରିଛନ୍ତି। ଯଦି ଆଗାମୀ ୧୫ ଦିନ ମଧ୍ୟରେ ବିଭାଗ ପୋଲ ନିର୍ମାଣ ପାଇଁ ପଦକ୍ଷେପ ନ ନିଏ ତେବେ ଗ୍ରାମବାସୀ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବେ ବୋଲି ଚେତାବନୀ ଦେଇଛନ୍ତି।