ନୟାଗଡ଼ ଅଫିସ,୧୮ା୫:ସ୍ବାମୀ ସ୍ତ୍ରୀ ମଧ୍ୟରେ ହୋଇଥିବା ଝଗଡ଼ାକୁ ସମାଧାନ ପାଇଁ ଥାନାକୁ ଡକାଇ ଭାପୁରର ସୁନିଲ କୁମାର ମହାନ୍ତିଙ୍କୁ ମାଡ଼ମରା ଘଟଣାକୁ ସପ୍ତାହେ ବିତିଛି । ହେଲେ ଘଟଣାର ତଦନ୍ତ କରାଯାଇ ସବ୍ଇନ୍ସପେକ୍ଟରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ବରଂ ଘଟଣାକୁ ରଫାଦଫା କରିବାକୁ ଚାପ ପଡୁଛି। ପୁଣି ଗିରଫ କରିବାର ଭୟ ଦେଖାଯାଉଥିବା ଅଭିଯୋଗ ହେଉଛି।
ସୂଚନା ଅନୁଯାୟୀ, ସ୍ବାମୀ ସ୍ତ୍ରୀ ମଧ୍ୟରେ ହୋଇଥିବା ଝଗଡ଼ାକୁ ନେଇ ଥାନାରେ ଅଭିଯୋଗ ହୋଇଥିଲା।
ଏ ସଂକ୍ରାନ୍ତରେ ପୋଲିସ ଏକ ମାମଲା ରୁଜୁ କରିଥିଲା ା ଉକ୍ତ ଘଟଣାର ସମାଧାନ ପାଇଁ ଗତ ୧୦ ତାରିଖରେ ଫତେଗଡ଼ ଥାନାର ସବ୍ଇନ୍ସପେକ୍ଟର ଅରୂପ ନାୟକ ଫୋନ ଯୋଗେ ଭାପୁରର ସୁନିଲ କୁମାର ମହାନ୍ତିଙ୍କୁ ଥାନାକୁ ଡକାଇଥିଲେ । ସୁନିଲ ଥାନାରେ ପହଞ୍ଚି କେଶ କୋର୍ଟରେ ବିଚାରଧୀନ ରହିଥିବା ନିଜର ପକ୍ଷ ରଖିଥିଲେ ।
ତେବେ ସବ୍ଇନ୍ସପେକ୍ଟର କିଛି ନ ଶୁଣି ସ୍ବାମୀ ସ୍ତ୍ରୀ ଭଲରେ ଚଳିବ କହି ଅଭିଯୋଗର ସମାଧାନ ହୋଇଗଲା ବୋଲି କହିଥିଲେ।
ଏପରିକି ଏକ ନିଷ୍ପତ୍ତି ପତ୍ରରେ ଦସ୍ତଖତ ନେଇ ଯାଇ ବିବାଦ ନ କରିବାକୁ ପରାମର୍ଶ ଦେଇଥିଲେ। ପରେ ଥାନା ପଛପଟକୁ ଡାକି ପ୍ଲାଷ୍ଟିକ ପାଇପରେ ମାଡ଼ ମାରିଥଲେ । ପ୍ରତିବାଦ କରିବାରୁ ମିଥ୍ୟା କେଶରେ ଥାନାରେ ପୁରାଇ ଦେବେ ବୋଲି ଧମକ ଦେଇଥିଲେ। ଏନେଇ ନୟାଗଡ ଏସ୍ପିଙ୍କ ନିକଟରେ ଅଭିଯୋଗ ହୋଇଛି। ଏପରି କି ଜାତୀୟ ମାନବାଧିକାର କମିଶନଙ୍କ ନିକଟରେ ମାମଲା ରୁଜୁ ହୋଇଛି । ଏନେଇ ସୁନିଲ କୁହନ୍ତି, ସ୍ତ୍ରୀଙ୍କ ସହ ବିବାଦ ଘଟଣାରେ ପୂର୍ବରୁ ମୋ ନଁାରେ ମାମଲା ରହିଛି। ଯାହାକି କୋର୍ଟରେ ବିଚାରଧୀନ ରହିଛି। ଏଭଳି ସ୍ଥଳେ ପୁଣି ମୋତେ ଥାନାକୁ ଡକାଇ ସବ୍ଇନ୍ସପେକ୍ଟର ମାଡ ମାରିଲେ । ମୁଁ ଅଭିଯୋଗ କରିବାରୁ ମୋତେ ଓ ମୋ ପରିବାରକୁ ଫସାଇବାକୁ ଉଦ୍ୟମ କରାଯାଉଛି ।
ସବ୍ଇନ୍ସପେକ୍ଟରଙ୍କ ବିରୋଧରେ ହୋଇଥିବା ଅଭିଯୋଗକୁ ପ୍ରତ୍ୟାହାର କରିବାକୁ ଚାପ ପଡୁଛି ।
ପୁଣି ଆମ ନଁାରେ ମାମଲା ରୁଜୁକରି ଗିରଫ କରିବାକୁ ବାରମ୍ବାର ଧମକାଉଛନ୍ତି। ପୋଲିସର ଗୁଣ୍ଡାଗିରି ବିରୋଧରେ ଅଭିଯୋଗ କରିବା କ’ଣ ଭୁଲ। ଘଟଣାର ତଦନ୍ତ ହେବା ନିହାତି ଦରକାର କହି ସେ କାନ୍ଦି ପକାଇଥିଲେ।
