ରାଞ୍ଚି, ୯।୧୧: ବିଶ୍ୱ କ୍ରିକେଟରେ ଅନେକ ରେକର୍ଡ ସୃଷ୍ଟି କରିଥିବା ମହେନ୍ଦ୍ର ସିଂ ଧୋନୀ କ୍ରିକେଟ ପରେ ଏବେ ଟେନିସରେ ବି ଜଲଓ୍ବା ଦେଖାଇଛନ୍ତି। ଧୋନୀ ମଙ୍ଗଳବାର ରାଞ୍ଚିର ଜେଏସସିଏ ଷ୍ଟାଡିୟମରେ ଆରମ୍ଭ ହୋଇଥିବା ଝାଡଖଣ୍ଡ ଟେନିସ ଚାମ୍ପିଅନସିପରେ ଖେଳାଳି ଭାବରେ ଅଂଶଗ୍ରହଣ କରିଛନ୍ତି। କେବଳ ଏତିକି ନୁହେଁ, ତାଙ୍କର ପ୍ରଥମ ଡବଲ୍ସ ମ୍ୟାଚରେ ସେ ସିଧାସଳଖ ମ୍ୟାଚରେ ପ୍ରତିଦ୍ୱନ୍ଦ୍ୱୀଙ୍କୁ ପରାସ୍ତ କରିଥିଲେ।
ଦେଶ କ୍ରିକେଟ କ୍ଲବ ଦ୍ୱାରା ଆୟୋଜିତ ଜେଏସସିଏ ଟେନିସ ଟୁର୍ନାମେଣ୍ଟରେ ଟିମ ଇଣ୍ଡିଆର ପୂର୍ବତନ ଅଧିନାୟକ ତଥା ହେଲିକପ୍ଟର ସଟ ପାଇଁ ପ୍ରସିଦ୍ଧ ମହେନ୍ଦ୍ର ସିଂ ଧୋନୀ ପାର୍ଟନର ସୁମିତ ବଜାଜଙ୍କ ସହ ଟୁର୍ନାମେଣ୍ଟର ପ୍ରଥମ ମ୍ୟାଚ ୯-୦ ଜିତିଥିଲେ। ବଜାଜଙ୍କ ସହ ଧୋନୀ ମଧ୍ୟ ଭଲ ଟେନିସର ଏକ ଉଦାହରଣ ଉପସ୍ଥାପନ କରିଥିଲେ ଏବଂ ପ୍ରତିପକ୍ଷ ଦଳକୁ ମ୍ୟାଚ ଉପରେ ପ୍ରାଧାନ୍ୟ କରିବାକୁ ଦେଇ ନ ଥିଲେ।
ଏହି ଟେନିସ ମ୍ୟାଚ ବିଷୟରେ ସବୁଠାରୁ କୌତୁହଳର ବିଷୟ ହେଉଛି, ଦର୍ଶକଙ୍କ ମଧ୍ୟରେ ବହୁ ସଂଖ୍ୟାରେ ବୃଦ୍ଧ ବ୍ୟକ୍ତି ଯେଉଁମାନେ ମ୍ୟାଚ ଦେଖିବାକୁ ଆସିଥିଲେ। ମ୍ୟାଚ ଦେଖିବାକୁ ଆସିଥିବା ଅନେକ ବୃଦ୍ଧ କହିଛନ୍ତି, ଧୋନୀଙ୍କ ଫିଟନେସ ଅନ୍ୟମାନଙ୍କ ପାଇଁ ପ୍ରେରଣା ଭାବରେ କାର୍ଯ୍ୟ କରୁଛି।
ଧୋନୀଙ୍କ ଟେନିସ ପ୍ରତି ଭଲ ପାଇବା କିଛି ନୂଆ ନୁହେଁ। ଅତୀତରେ ମଧ୍ୟ ସେ ଅନେକ ଥର ଟେନିସ ଖେଳୁଥିବା ଦେଖିବାକୁ ମିଳିଛି। ସେପ୍ଟେମ୍ବର ମାସରେ ମହେନ୍ଦ୍ର ସିଂ ଧୋନୀଙ୍କୁ ୟୁଏସ ଓପନ ମ୍ୟାଚ ଦେଖୁଥିବା ଦେଖିବାକୁ ମିଳିଥିଲା। ତାଙ୍କ ସହ ଭାରତର ପ୍ରଥମ ଦିନିକିଆ ବିଶ୍ୱକପ ଜିତିଥିବା ଭାରତୀୟ ଦଳର ପୂର୍ବତନ ଅଧିନାୟକ କପିଲ ଦେବ ଯୋଗ ଦେଇଥିଲେ। କପିଳ ଏବଂ ଧୋନୀ ଯଥାକ୍ରମେ ୧୯୮୩ ଏବଂ ୨୦୧୧ରେ ସମ୍ମାନଜନକ ଆଇସିସି କ୍ରିକେଟ ଦିନିକିଆ ବିଶ୍ୱକପ ଜିତି ଦେଶକୁ ପୁରସ୍କାର ଆଣିଛନ୍ତି।
ଅନ୍ତର୍ଜାତୀୟ କ୍ରିକେଟରୁ ଅବସର ନେବା ସତ୍ତ୍ୱେ ମହେନ୍ଦ୍ର ସିଂ ଧୋନୀ ଆଇପିଏଲରେ ଖେଳୁଛନ୍ତି। ସେ ୨୦୨୩ରେ ଆୟୋଜିତ ହେବାକୁ ଥିବା ଆଇପିଏଲରେ ମଧ୍ୟ ଖେଳିବେ ଏବଂ ଚେନ୍ନାଇ ସୁପର କିଙ୍ଗ୍ସର ନେତୃତ୍ୱ ନେବେ। ସେ ୧୫ ଅଗଷ୍ଟ ୨୦୨୦ରେ ଅନ୍ତର୍ଜାତୀୟ କ୍ରିକେଟ ପାଇଁ ବିଦାୟ ନେଇଥିଲେ।