ନୟାଗଡ଼ ଅଫିସ,୧୨।୧: ନୟାଗଡ଼ ବନଖଣ୍ଡ ପଞ୍ଚରିଡ଼ା ରେଞ୍ଜର ଶରଣକୁଳ ଝାଡେଶ୍ୱରୀ ପୀଠର ସୌନ୍ଦର୍ଯ୍ୟ ବଢ଼ାଇବା ଓ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇଁ ୬୨ ଲକ୍ଷ ଟଙ୍କା ବ୍ୟୟରେ ଶିଶୁ ଉଦ୍ୟାନ କାମ ଚାଲୁ ରହିଛି । ଏହି କାମ ଭଲ ହେଲେ ସେହି ସ୍ଥାନ ଇକୋ ଟୁରିଜମର ମାନ୍ୟତା ପାଇବ। ତେବେ ଏହାର ଶିଶୁ ଉଦ୍ୟାନ ପାଇଁ ଭଣ୍ଡାର ପାହାଡ଼କୁ ପଡୁଥିବା ରାସ୍ତାରେ ପ୍ରାୟ ୧୫ ଫୁଟ୍ ବ୍ୟବଧାନରେ ଗଛ ବାଡ଼ ଦିଆଯାଉଛି । ଜଙ୍ଗଲରୁ ଗଛ କାଟି ରାସ୍ତା ମଝିରେ ବାଡ଼ ଦେବା ପରେ ଏହାକୁ ନେଇ ଅସନ୍ତୋଷ ପ୍ରକାଶ ପାଇଛି ।ସେହିପରି ଶିଶୁ ଉଦ୍ୟାନର ଉନ୍ନୟନ କାମ ହେଉଥିଲେ ମଧ୍ୟ ନାମ ଫଳକ ଦିଆଯାଇ ନାହିଁ । ପୁଣି ରାସ୍ତା କାର୍ଯ୍ୟ ବର୍ଷା ନ ହେଉଣୁ ଦବିବାରୁ କାର୍ଯ୍ୟର ସ୍ଥାୟିତ୍ୱ ନେଇ ପ୍ରଶ୍ନ ଉଠିଛି ।
ସେହିପରି ଉନ୍ନୟନ କାର୍ଯ୍ୟରେ ଜେସିବି ଲଗାଇ କାମ କରାଯାଉଛି । ପର୍ଯ୍ୟଟନ ପୀଠ ପାଖ ଗଁା ଶରଣକୁଳ ହୋଇଥିଲେହେଁ ଏଠାକାର ଅଞ୍ଚଳର ଶ୍ରମିକଙ୍କୁ ଅଣଦେଖା କରାଯାଇ ନନ୍ଦିଘୋର ଜବ୍କାର୍ଡଧାରୀଙ୍କ ନଁାରେ ବିଲ୍ କରାଯାଉଛି ବୋଲି ଅଭିଯୋଗ ଉଠିଛି । ପୁଣି ଏଠାର ଉନ୍ନୟନ କାର୍ଯ୍ୟ ଠିକାଦାର କରୁ ନ ଥିବାବେଳେ ପଞ୍ଚରିଡ଼ା ବନବିଭାଗ ପକ୍ଷରୁ କରାଯାଉଛି। ବନବିଭାଗର କର୍ମଚାରୀ ଓ ଅଧିକାରୀ ଜଙ୍ଗଲ ତଦାରଖ ଓ ସୁରକ୍ଷା କାର୍ଯ୍ୟ ଛାଡି ନିର୍ମାଣ କାର୍ଯ୍ୟରେ ସମୟ ଦେଉଥିବାରୁ ଜଙ୍ଗଲ ପଦା ହେବାରେ ଲାଗିଛି।
ଅଭିଯୋଗ ଅନୁଯାୟୀ, ହରିଣ ପାର୍କର କାର୍ଯ୍ୟ ଠିକ୍ ଭାବେ କରାଯାଉନି । ପାହାଡ଼କୁ ଉଠିବା ରାସ୍ତା କାର୍ଯ୍ୟ କେବଳ ମାଟି ଉପରେ ଇଟା ପକାଇ ସିମେଣ୍ଟ ବାଲି ପୋତା ଯାଉଛି । ବର୍ଷା ହେଲେ ଏହା ଦବିବାର ସମ୍ଭାବନା ରହିଛି । ବର୍ଷ ନ ହେବା ପୂର୍ବରୁ କେତେକ ସ୍ଥାନରେ ରାସ୍ତା ଦବିବାକୁ ଲାଗିଛି। ଶ୍ରମିକଙ୍କ କାମ ଜେସିବି କରୁଛି। କିନ୍ତୁ କାଗଜାତ୍ ଜବ୍କାର୍ଡଧାରୀଙ୍କ ନଁାରେ ବିଲ୍ ହେଉଛି ।
କିଛି ମାସ ତଳେ ଲାଞ୍ଚ ନେଇ ନିଲମ୍ବିତ ହୋଇଥିବା ବନପାଳ ଉନ୍ନୟନ କାମ କରୁଥିବାରୁ ଅସନ୍ତୋଷ ବଢ଼ୁଛି । ଏନେଇ ପଞ୍ଚରିଡା ରେଞ୍ଜର ଅର୍ଚ୍ଚନା ଗମାଙ୍ଗକୁ ପଚାରିବାରୁ ସେ କିଛି ନ କହି ଏଡାଇ ଯାଇଥିଲେ । ଡିଏଫ୍ଓ କ୍ଷମା ଷଡ଼ଙ୍ଗୀଙ୍କୁ ପଚାରିବାରୁ କହିଥିଲେ, ରାସ୍ତା ମଝିରେ ଯେଉଁ ଗଛର ବାଡ଼ ଦିଆଯାଉଛି ତାହା ସ୍ଲୋପ୍ ପାଇଁ ବ୍ୟବହାର କରାଯାଉଛି।
ପାର୍କ ଖୋଳା ବେଳେ ବାହାରିଥିବା କିଛି ଗଛକୁ କାଟି ଦିଆଯାଉଛି, ଯାହାକି ପାର୍କର ସୌନ୍ଦର୍ଯ୍ୟକୁ ବଢ଼ାଇବ । ଏହି ଗଛଗୁଡିକ ନଷ୍ଟ ନ କରି ଏହାର ଅଂଶକୁ ବ୍ୟବହାର କରାଯାଇଛି । ରାସ୍ତା ଦବିବାରେ ସତ୍ୟତା ନାହିଁ । ଜେସିବି ନ ଲଗାଇଲେ କାମ ଠିକ ସମୟରେ ଶେଷ ହେବନି । ପୁଣି ଶ୍ରମିକ ଦ୍ୱାରା କାମ କଲେ ଅନୁଦାନ ପାଇବ ନାହିଁ । ନାମ ଫଳକ କାମ ଶେଷ ହେଲେ ଲାଗିବ । ଶିଶୁ ଉଦ୍ୟାନ କୁହାଯାଉଥିଲେ ହେଁ ସମ୍ପୃକ୍ତ ପୀଠ ଇକୋ ଟୁରିଜିମର ମାନ୍ୟତା ପାଇବ । ସ୍ଥାନୀୟ ଲୋକଙ୍କୁ ବନବିଭାଗ ହସ୍ତାନ୍ତର କରିବ । ଉନ୍ନୟନ କାମ ଠିକ୍ ଭାବେ କରାଯାଉଛି । ଯଦି କିଛି ଅସୁବିଧା ରହୁଛି ତାର ତୁରନ୍ତ ପରିବର୍ତ୍ତନ କରାଯିବ ।
ଆରସିଏଫ୍ ମନୋଜ ମହାପାତ୍ର କୁହନ୍ତି, ଝାଡେଶ୍ୱରୀ ପୀଠର ଶିଶୁ ଉଦ୍ୟାନ କାର୍ଯ୍ୟ ଭଲ ଭାବେ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଯଦି କିଛି ତ୍ରୁଟି ବା ଅସୁବିଧା ରହୁଛି ସେ ଏନେଇ ଅନୁଧ୍ୟାନ କରିବେ ବୋଲି କହିଛନ୍ତି । ଜିଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ କୁହନ୍ତି, ମୁଁ ଝାଡେଶ୍ୱରୀ ପୀଠକୁ ଯାଇ ଅଭିଯୋଗର ତଦନ୍ତ କରି ପଦକ୍ଷେପ ନେବି ।