ମୂଷାର ବୁଲିବାରେ ଥିଲା ସଉକ, ମୃତ୍ୟୁ ପରେ ଅସ୍ଥି ଧରି ଦୁନିଆ ଦେଖାଇବାକୁ ବାହାରିଲେ ମହିଳା

ମଣିଷ ଏବଂ ପଶୁମାନଙ୍କ ମଧ୍ୟରେ ସମ୍ପର୍କ ଅତ୍ୟନ୍ତ ସ୍ବତନ୍ତ୍ର। ଉଭୟ ପରସ୍ପର ପାଇଁ ଯେକୌଣସି ସ୍ତରକୁ ଯାଇପାରନ୍ତି। କିନ୍ତୁ ଏକ ସାଧାରଣ ଅନୁଭବ ହେଉଛି, ପଶୁମାନେ ମଣିଷକୁ ଯେତିକି ଭଲ ପାଆନ୍ତି ମଣିଷ ପଶୁମାନଙ୍କୁ ସେତିକି ପରିମାଣରେ ଭଲ ପାଏ ନାହିଁ। କିନ୍ତୁ ପ୍ରତ୍ୟେକ ବ୍ୟକ୍ତି ସମାନ ନୁହନ୍ତି। ଏହି କଥାକୁ ଜଣେ ବ୍ରିଟିଶ ମହିଳା ପ୍ରମାଣ କରି ଦେଖାଇଛନ୍ତି। ସାରା ବିଶ୍ୱ ଦେଖାଇବାକୁ ନିଜର ମୃତ ପୋଷା ମୂଷାର ଅସ୍ଥି ନେଇ ବାହାରିଛନ୍ତି।

ଏକ ରିପୋର୍ଟ ଅନୁଯାୟୀ, ବ୍ରିଟେନର ବର୍ମିଂହାମ ନିବାସୀ ୪୭ ବର୍ଷୀୟା ଲିସା ମୁରେ-ଲାଙ୍ଗଙ୍କର ହାମଷ୍ଟର ପ୍ରଜାତିର ଏକ ପୋଷା ମୂଷା ଥିଲା। ମାର୍ଚ୍ଚ ୨୦୨୨ରେ ତା’ର ମୃତ୍ୟୁ ହୋଇଥିଲା। ଲିସା ତାଙ୍କ ମୂଷାକୁ ନିଜ ପିଲା ପରି ଭଲ ପାଉଥିଲେ। ଯେତେବେଳେ ଏହି ମୂଷାର ମୃତ୍ୟୁ ହେଲା, ସେତେବେଳେ ତା’ର ଅସ୍ଥିକୁ ଆମେରିକାର ମିଆମିସ୍ଥିତ ଓ୍ବାଇକିକି ବିଚ୍‌କୁ ନିଆଯାଇଥିଲା। ଏଥିପାଇଁ ସେ ବିମାନରେ ୧୧ ହଜାର କିଲୋମିଟର ଯାତ୍ରା କରିବା ପରେ ସେଠାରେ ପହଞ୍ଚିଥିଲେ।
କିନ୍ତୁ ଲିସା ସବୁବେଳେ ତାଙ୍କ ସ୍ମୃତିରେ ନୁହେଁ, ତାଙ୍କ ଜୀବନରେ ମୂଷାକୁ ରଖିବାକୁ ଚାହୁଁଥିଲେ। ଏହି କାରଣରୁ, ସେ ମୂଷା ହାଡ଼ର କିଛି ଅଂଶ ତାଙ୍କ ପାଖରେ ରଖି ଏକ ଲକେଟ ତିଆରି କରିଛନ୍ତି। ବର୍ତ୍ତମାନ ସେ ଏହି ଲକେଟ୍‌ ପିନ୍ଧି ଦୁନିଆ ଭ୍ରମଣ କରିବାକୁ ଯାଇଛନ୍ତି। ଲିସା କହିଛନ୍ତି, ତାଙ୍କ ପୋଷା ମୂଷା ଲଣ୍ଡନ, ପ୍ୟାରିସ୍‌ ଏବଂ ଆମଷ୍ଟରଡାମ୍‌ରେ ରହିବାକୁ ଭଲ ପାଉଥିଲା। ସେ ପ୍ରକୃତରେ ସେହି ସହରଗୁଡିକୁ ଯାଇ ନ ଥିଲା। କିନ୍ତୁ ଲିସା ମୂଷା ବ୍ୟବହାର କରୁଥିବା ସହରଗୁଡ଼ିକର କାର୍ଡବୋର୍ଡ ପ୍ରତିକୃତି ତିଆରି କରିଥିଲେ। ସେ ସଂଗ୍ରହାଳୟ ଏବଂ ରେଷ୍ଟୁରାଣ୍ଟର ଏକ କପି ମଧ୍ୟ କରିଥିଲେ।

ବର୍ତ୍ତମାନ ଲିସା ଏହି ସହରଗୁଡିକ ପରିଦର୍ଶନ କରିବାକୁ ଯାଉଛନ୍ତି ଏବଂ ତାଙ୍କ ପୋଷା ମୂଷାର ଅସ୍ଥିକୁ ସାଙ୍ଗରେ ନେଇ ଯାଉଛନ୍ତି। ଜାଣି ଆଶ୍ଚର୍ଯ୍ୟ ହେବେ ଯେତେବେଳେ ସେ ପ୍ରଥମ ଥର ପାଇଁ ବିମାନରେ ମୂଷାର ଅସ୍ଥି ନେଉଥିଲେ, ସେତେବେଳେ ତାଙ୍କୁ କେବଳ ଏହି ଅସ୍ଥି ବହନ କରିବା ପାଇଁ ବିମାନ କମ୍ପାନୀକୁ ୩ ଲକ୍ଷ ଟଙ୍କା ଦେବାକୁ ପଡୁଥିଲା। ଲିସା ଜଣେ ଗ୍ରାଫିକ ଡିଜାଇନର୍‌। ସେ କହିଛନ୍ତି ଯେ ସେ ମୂଷା ହାଡ଼ରୁ ହାର ତିଆରି କରି ଦୁନିଆର ବିଭିନ୍ନ ସହରକୁ ନେଇ ଯାଉଛନ୍ତି। ଏହି ବର୍ଷ ସେ ସେପ୍ଟେମ୍ବରରେ ପ୍ୟାରିସ୍‌ ଏବଂ ନଭେମ୍ବରରେ ଲଣ୍ଡନ, ତା’ପରେ ଡିସେମ୍ବରରେ ଆମଷ୍ଟରଡାମ ଯିବେ।