ନୂଆଦିଲ୍ଲୀ,୨୮।୨ : ଦିଲ୍ଲୀ ଏକ୍ସାଇଜ ପଲିସିରେ ହୋଇଥିବା ଦୁର୍ନୀତିର ଯାଞ୍ଚ ପଞ୍ଜାବ ଆଡକୁ ଯାଇପାରେ। ଏହି ନୀତିରେ ଅନିୟମିତତା ହୋଇଥିବା ନେଇ ମନୀଷ ସିସୋଡିଆଙ୍କ ଅଭିଯୋଗରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ରେ ଅଭିଯୋଗ କରିଥିବା ଭାଜପା ନେତା ମନଜିନ୍ଦର ସିଂ ସିର୍ସା ଏହା ସୂଚିତ କରିଛନ୍ତି। ଅନୁମାନ କରାଯାଉଛି ଯେ ଇଡି ଶୀଘ୍ର ପଞ୍ଜାବକୁ ଯାଇପାରେ।
ସୂଚନାଯୋଗ୍ୟ ଯେ ଦିଲ୍ଲୀର ମଦ ନୀତି ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଦ୍ୱାରା ଦିଲ୍ଲୀ ସରକାରରେ ସଙ୍କଟ ସୃଷ୍ଟି ହୋଇଛି। ପଞ୍ଜାବରେ ମଧ୍ୟ ସମାନ ନୀତି କାର୍ଯ୍ୟକାରୀ କରାଯାଇଛି। ଏହା ପରେ, ବର୍ତ୍ତମାନ ଇଡି ପଞ୍ଜାବରେ ଏହା ସହ ଜଡିତ ଲୋକଙ୍କୁ ପଚରାଉଚରା କରିପାରେ, ଏହି ଘଟଣାର ଅନୁସନ୍ଧାନର ପରିସର ମଧ୍ୟ ବଢ଼ିପାରେ।
ଦିଲ୍ଲୀ ଭଳି ପଞ୍ଜାବରେ ଲାଗୁ ହୋଇଥିବା ଏକ୍ସାଇଜ ନୀତି ସମ୍ପର୍କରେ ଭାଜପା ନେତା ମନଜିନ୍ଦର ସିଂ ସିର୍ସା ଟୁଇଟ କରିଛନ୍ତି। ସିର୍ସା ଗତ ବର୍ଷ ଇଡିକୁ ଏନେଇ ଏକ ଅଭିଯୋଗ ମଧ୍ୟ ପଠାଇ ସାରିଛନ୍ତି। ସିର୍ସା ଦାବି କରିଛନ୍ତି ଯେ ତାଙ୍କ ଅଭିଯୋଗ ପରେ ଇଡି ଅନେକ ଅଧିକାରୀଙ୍କୁ ଡକାଇଛି।