ଜୁନାଗଡ଼,୧୬।୭(ଡି.ଏନ୍.ଏ.): କଳାହାଣ୍ଡି ଜିଲା ଜୁନାଗଡ଼ ବ୍ଲକ ବଣ୍ଡାକୁଟ୍ରା ନିକଟସ୍ଥ ହାଲେର ଯୋରରେ ବନ୍ୟା ପାଣି ଆସିବା ଫଳରେ ଗତ ୧୨ତାରିଖରୁ ଆପ୍ରୋଚ ପୋଲ ଧୋଇ ହୋଇଯାଇଥିଲା। ଏଣୁ ଜୁନାଗଡ଼-ଧର୍ମଗଡ଼ ଜାତୀୟ ରାଜପଥ ୧୩୦-ସିରେ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଘଟଣାର ୪ଦିନ ପରେ ଅସ୍ଥାୟୀ ପୋଲ ନିର୍ମାଣ ପରେ ଶନିବାରଠାରୁ ଏହି ରାସ୍ତାରେ ଯାତାୟାତ ସ୍ବାଭାବିକ ହୋଇଛି। ୪ ଦିନ ଧରି ମୁଖ୍ୟ ରାସ୍ତା ବନ୍ଦଥିବାରୁ ସ୍ଥାନୀୟ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଏପରି କି ଉକ୍ତ ରାସ୍ତାଟି ଛତିଶଗଡ଼ ରାଜ୍ୟର ଦେଭୋଗକୁ ମଧ୍ୟ ସଂଯୋଗ କରୁଛି। ତେବେ ନୂତନ ପୋଲ କାମ ବିଳମ୍ବ ଓ ଅଧାପନ୍ତରିଆ ହୋଇଥିବାରୁ ପାଣି ବଢ଼ିଲେ ପୁଣି ଥରେ ଏପରି ଅବସ୍ଥା ହେବାର ସମ୍ଭାବନାକୁ ଏଡାଇ ଦିଆଯାଇ ନ ପାରେ।
