କେନ୍ଦୁଝର,୨୨ା୭(ନରେଶ ପଟ୍ଟନାୟକ): ତେଲକୋଇ ଥାନା ଅନ୍ତର୍ଗତ ଗୋଡ଼ା ପଞ୍ଚାୟତର ବଡ଼କୁମୁଣ୍ଡୁ ଗ୍ରାମର ଡିଲେଶ୍ୱର ମହାକୁଡ଼ ନାମକ ଜଣେ ବ୍ୟକ୍ତି ଦାଦନ ଖଟିବାକୁ ଯାଇ ନିଖୋଜ ହୋଇଯାଇଛନ୍ତି। ଗତ ୧୮ ଜୁନ୍ ୨୦୨୨ରେ ସେ କାମ କରିବାକୁ ଯାଇଥିଲେ। ସେ ଅନ୍ୟମାନଙ୍କ ସହିତ ତେଲକୋଇ ଅଞ୍ଚଳର ସନ୍ତୋଷ ମହାକୁଡ଼ଙ୍କ ଜରିଆରେ ଯାଇଥିଲେ। ତେବେ ସେ ଯିବା ପରଠାରୁ ଫୋନ୍ରେ ଯୋଗାଯୋଗ ହୋଇପାରିନାହିଁ। ଏପରିକି ତାଙ୍କୁ ନେଇଥିବା ଦଲାଲ ସନ୍ତୋଷ ମଧ୍ୟ ଫୋନ୍ ଉଠାଇ ନ ଥିବା ସୁକାନ୍ତି ମହାକୁଡ଼ ଅଭିଯୋଗ କରିଛନ୍ତି। ଏନେଇ ଗତ ୨୫ଜୁନ୍ ୨୦୨୨ରେ ତେଲକୋଇ ଥାନାରେ ଜଣାଇଥିବା କହିଛନ୍ତି। ତେବେ ଆଜି ପର୍ଯ୍ୟନ୍ତ ସ୍ବାମୀଙ୍କ ପତ୍ତା ମିଳି ନ ଥିବା ସୁକାନ୍ତି ଅଭିଯୋଗ କରିଛନ୍ତି। ସ୍ବାମୀଙ୍କ ସହିତ ଯାଇଥିବା ଗ୍ରାମର ରଞ୍ଜନ ମହାକୁଡ଼, ବସନ୍ତ ମହାକୁଡ଼ ଫେରିଥିଲେ ହେଁ ତାଙ୍କ ସ୍ବାମୀ ଫେରି ନ ଥିବା କହିଛନ୍ତି। ସେମାନଙ୍କୁ ପଚାରିବାରୁ କହିଲେ, ତାଙ୍କ ସ୍ବାମୀଙ୍କ ମୁଣ୍ଡ ଖରାପ ହୋଇଯିବାରୁ କେଉଁଆଡ଼େ ପଳାଇଯାଇଛନ୍ତି। ଏଣୁ ଏହାର ବିଚାର କରିବାକୁ ସେ ତେଲକୋଇ ଥାନାର ଦ୍ୱାରସ୍ଥ ହୋଇଛନ୍ତି। ସ୍ତ୍ରୀ, ଦୁଇ ଶିଶୁ ସହିତ ବୃଦ୍ଧା ଶାଶୁ ଘରେ ତାଙ୍କ ଫେରିବା ଅପେକ୍ଷାରେ ରହିଛନ୍ତି। ଜମିବାଡ଼ି ନ ଥିବାରୁ ରୋଜଗାର ପାଇଁ ପ୍ରଲୋଭିତ ହୋଇ ଦାଦନ ଖଟିବାକୁ କେରଳ ଯାଇଥିଲେ। ତେବେ ଏହା ମଧ୍ୟରେ ପ୍ରାୟ ଏକ ବର୍ଷ ବିତିଯାଇଥିଲେ ହେଁ ଡିଲେଶ୍ୱର ଫେରି ନ ଥିବାରୁ ଆଶା ଆଶଙ୍କା ମଧ୍ୟରେ ପରିବାର ଲୋକ ରହିଥିବା ବେଳେ ଏନେଇ ଏସ୍ପି ଓ ଜିଲାପାଳ ହସ୍ତକ୍ଷେପ କରିବାକୁ ପରିବାର ତଥା ସ୍ଥାନୀୟ ଲୋକେ ଦାବି କରିଛନ୍ତି। ଆଜି ସ୍ଥାନୀୟ ପୋଲିସ ରଞ୍ଜନ ଓ ବସନ୍ତଙ୍କୁ ଡାକି ପଚରା ଉଚରା କରିଛନ୍ତି। ବିଜୟ କୁମାର ବିହାରୀ କହିଛନ୍ତି, ଏନେଇ ଏସ୍ପିଙ୍କ ସହିତ ଆଲୋଚନା କରି ପଦକ୍ଷେପ ନେବେ। ସେମାନେ ଗରିବ ପରିବାର ହୋଇଥିବା ବେଳେ ରୋଜଗାରକ୍ଷମ କେହିନାହାନ୍ତି। ଏଣୁ ସେମାନଙ୍କୁ ସହାୟତା କରିବା ସହ ତାଙ୍କ ସ୍ବାମୀଙ୍କୁ ଫେରାଇ ଆଣିବାକୁ ପଦକ୍ଷେପ ନେବାକୁ ସ୍ଥାନୀୟ ସାମାଜିକ କର୍ମୀ କୃଷ୍ଣପ୍ରସାଦ ସାହୁ ପ୍ରଶାସନଙ୍କୁ ନିବେଦନ କରିଛନ୍ତି। ଏନେଇ ଦଲାଲ ସନ୍ତୋଷର ପତ୍ତା ମିଳୁ ନ ଥିବାରୁ ଯୋଗାଯୋଗ ହୋଇ ପାରିନାହିଁ।
ସୂଚନାଯୋଗ୍ୟ, କେନ୍ଦୁଝର ଜିଲାରୁ ବହୁ ଗରିବ ଲୋକ କାମଧନ୍ଦା ମିଳୁନ ଥିବାରୁ ବାହାରକୁ ଦାଦନ ଖଟିବାକୁ ଯାଇ ମୃତ୍ୟୁ ବରଣ କରିବା ସହ ଅନେକ ନିଖୋଜ ଓ ନିର୍ଯାତିତ ହୋଇ ଫେରୁଛନ୍ତି। ସେହିପରି ଅନେକ ନିଖୋଜ ହେଉଥିଲେ ହେଁ ଏନେଇ ପ୍ରଶାସନ ପାଖରେ କୌଣସି ସଠିକ୍ ସୂଚନା ବା ତଥ୍ୟ ନାହିଁ।
