ମହାକାଳପଡ଼ା, ୧୩ା୧୦(ପ୍ରତାପ ଚନ୍ଦ୍ର ସ୍ବାଇଁ): ପ୍ରେମ ବୁଝେନା ବୟସ, ଜାତି କି ଗୋତ୍ର। ରଙ୍ଗ୍ ଫୋନ ନମ୍ବରରୁ ପ୍ରେମ ଉଜାଡ଼ି ଦେଲା ସୁଖର ସଂସାର। ଉଭୟ ସ୍ତ୍ରୀ ସ୍ବାମୀ ନିଜ ଜନ୍ମ କଲା ପୁତ୍ର ସ୍ନେହ ଛାଡ଼ି ପ୍ରେମରେ ହେଲେ ବାଇଆ। ଏହାର ଏକ ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପେଟଛେଲା ପଞ୍ଚାୟତର ଶବରପଡ଼ା ଗଁାରେ। ଗଁାର ମଣିଆ ଭକ୍ତା (୩୮) ବାଲେଶ୍ୱର ଅଞ୍ଚଳର ଲକ୍ଷ୍ମୀ ଭକ୍ତା (୨୮)ଙ୍କୁ ବିବାହ କରିଥିଲେ। ବିବାହର କିଛିବର୍ଷ ପର୍ଯ୍ୟନ୍ତ ପରିବାର ମଧ୍ୟରେ ଖୁବ୍ ଖୁସିରେ ଚଳୁଥିଲେ। ସେମାନଙ୍କ ଔରସରୁ ଏକ ପୁତ୍ର ସନ୍ତାନ ଜନ୍ମ ଲାଭ ହୋଇଥିଲା। ପୁତ୍ର ସନ୍ତାନ ଜନ୍ମ ଲାଭ ପରେ ବୈବାହିକ ଜୀବନରେ ସୃଷ୍ଟି ହେଲା ଝଡ଼। ଏହି ସମୟରେ ଏକ ଅଜଣା ରଙ୍ଗ୍ ନମ୍ବରରୁ ଫୋନ କଲ୍ ସୃଷ୍ଟି କଲା ପରିବାର ମଧ୍ୟରେ ଫାଟ। ସ୍ବାମୀ ମଣିଆ ଘରେ ଅନୁପସ୍ଥିତ ଥିବା ବେଳେ ଲକ୍ଷ୍ମୀ ଏହି ରଙ୍ଗ୍ ନମ୍ବରରୁ ଯୁବକଙ୍କ ସହ ପ୍ରେମାଳାପରୁ ଧୀରେ ଧୀରେ ଉଭୟଙ୍କ ମଧ୍ୟରେ ସମ୍ପର୍କ ନିବିଡ଼ ହେଲା। ଏହି ଘଟଣା ସ୍ବାମୀ ଜାଣିବା ପରେ ଉଭୟ ସ୍ତ୍ରୀ ସ୍ବାମୀଙ୍କ ମଧ୍ୟରେ ମାନମନାନ୍ତର ସୃଷ୍ଟି ହେଲା। ସ୍ବାମୀ ସ୍ତ୍ରୀଙ୍କୁ ସନ୍ଦେହ କରିବାରୁ ପରିବାରରେ ଅଶାନ୍ତି ଲାଗି ରହିଲା। ଶେଷରେ ନିଜର ଜନ୍ମ କଲା ୮ବର୍ଷର ପୁଅକୁ ଛାଡ଼ି ମା’ ଲକ୍ଷ୍ମୀ ବାରିପଦା ଅଞ୍ଚଳର ଜଣେ ଯୁବକଙ୍କ ସହ ଫେରାର ହୋଇଗଲେ। ଅନ୍ୟପକ୍ଷରେ ମଣିଆ କିଛିବର୍ଷ ପରେ ନିଜ ପୁଅ ମୋହ ଛାଡ଼ି ସେ ମଧ୍ୟ ବାଲେଶ୍ୱର ଅଞ୍ଚଳର ଜଣେ ଯୁବତୀଙ୍କୁ ସାଙ୍ଗରେ ଧରି ପଳାଇ ଗଲେ। ଏପଟେ ୮ବର୍ଷର ପୁଅ ମା’ବାପା ସ୍ନେହ ଆଦରରୁ ବଞ୍ଚତ୍ତ ହେଲା। ମା’ ବାପା ଅନ୍ୟତ୍ର ବିବାହ କରିବା ପରେ ମଣିଆ ଭକ୍ତାଙ୍କ ଭାଉଜ କାଞ୍ଚନ ଭକ୍ତା (୬୫) ଭିନ୍ନକ୍ଷମ ହୋଇ ମଧ୍ୟ ଭିକ ମାଗି ପୁତୁରା ମୁହଁରେ ଆହର ଦେଉଛନ୍ତି। ଅଭାବୀ ଜନଜାତି ପରିବାରର କାଞ୍ଚନ ପରିଣତ ବୟସରେ ଆଉ କେତେଦିନ ପୁତୁରା ମୁହଁରେ ଆହାର ଦେବେ ସେହି ଚିନ୍ତା ଏବେ ତାଙ୍କୁ ଘାରିଛି। ପୁତୁରା ମୁହଁକୁ ଚାହିଁ ସବୁ ଦୁଃଖ କଷ୍ଟ ଭୁଲିଯାଏ ବୋଲି କହିଛନ୍ତି ବଡ଼ ମା’ କାଞ୍ଚନ। ଅନ୍ୟ ପକ୍ଷରେ ମା’ର ପୁରୁଣା ଫଟୋକୁ ଦେଖି ଗୁମୁରି ଗୁମୁରି କାନ୍ଦି ଆଖିରୁ ଲୁହ ନିଗାଡୁଛି ପୁଅ । ମା’କୁ ନେହୁରା ହୋଇ କହୁଛି ମା’ ତୁ ଫେରି ଆ। ବଡ଼ ମା’ କାଞ୍ଚନ କହିବା କଥା ପୁତୁରାକୁ ସରକାରୀ ଆବାସିକ ବିଦ୍ୟାଳୟରେ ତା’ର ପାଠ ପଢା ସହ ଖାଇବା ପିଇବା ବନ୍ଦୋବସ୍ତ କରି ଦିଆ ଗଲେ ସେ ନିଶ୍ଚିନ୍ତ ହୁଅନ୍ତେ । ସାମାଜିକ କର୍ମୀ ଲକ୍ଷ୍ମୀକାନ୍ତ ସ୍ବାଇଁ ଓ ପବିତ୍ର କୁମାର ବେହେରାଙ୍କ କହିବା କଥା ଜିଲା ପ୍ରଶାସନ ଏଥିପ୍ରତି ତୁରନ୍ତ ଦୃଷ୍ଟି ଦେଇ ବେସାହାରା ବାଳକଙ୍କୁ ଥଇଥାନ କରିବା ପାଇଁ ଦାବି କରିଛନ୍ତି। ଏ ସଂକ୍ରାନ୍ତରେ କେନ୍ଦ୍ରାପଡ଼ା ଜିଲାପାଳ ଅମୃତ ଋତୁରାଜଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ କିଛି ମତାମତ ଦେଇନାହାନ୍ତି।